16 ޖުލައި 2016 - 06:53
މަލްޓިވިޓަމިންގެ ބޭނުންކުރަންޖެހޭ މާބަނޑު މީހުން މަދު ކަމަށާއި މާބަނޑު މީހުންނަށް މި ދިނުމަކީ ބޭކާރު ކަމެއްގެ ގޮތުގައި ރިސާޗަރުް ފާހަގަކޮށްފި އެވެ.
ޑްރަގް އެންޑް ތެރަޕިއުޓިކް ބުލެޓިންގައި ޝާއިއުކޮށްފައިވާ ދިރާސާ ރިޕޯޓެއްގައި ބުނެފައި ވަނީ މަލްޓިވިޓަމިން ސަޕްލިމެންޓް ބޭނުންކުރުމުން މައިމީހާ އާއި ދަރިފުޅަށް ކުރާ އަސަރުތަކާ ބެހޭ ގޮތުން ހުރިހާ ހެއްކެއް އެއްކޮށްފައިވާ ކަމަށެވެ. މި ހެކިތަކުން އެނގުނު ގޮތުގައި ސަޕްލިމެންޓް ބޭނުންކޮށްގެން މައިމީހާ އަދި ދަރިފުޅުގެ ސިއްހަތަށް ވެސް އޭގެ ސަބަބުން ކުރިއެރުމެއް ނާދެ އެވެ.
ދިރާސާގައި ބުނެފައި ވަނީ މާބަނޑު އިރު މަލްޓިވިޓަމިން ބޭނުން ނުކުރި ކަމުގައި ވިޔަސް ފޯލިކް އެސިޑް އަދި ވިޓަމިން ޑީ ކޮންމެހެން ވެސް ބޭނުންކުރަން ޖެހޭނެ ކަމަށާއި ހަށިގަނޑަށް ފައިދާހުރި ކާނާ ވެސް ކާންޖެހޭނެ ކަމަށެވެ.
މަލްޓިވިޓަމިނާ ބެހޭ ދިރާސާއިން އެނގުނު ގޮތުގައި މައިމީހާ އާއި ދަރިފުޅުގެ ސިއްހަތަށް ބޭނުންވާ ކަންތައްތައް ލިއްބައިދިނުމުގެ މައިގަނޑު މަސައްކަތްކުރަނީ ފޯލިކް އެސިޑުންނެވެ. އެގޮތުން ފޯލިކް އެސިޑްގެ 400 މައިކްރޮގްރާމްސް ކޮންމެ ދުވަހަކު ބޭނުންކުރާ ނަމަ ދަރިފުޅުގެ ހަށިގަނޑުގައި އައިބު ހުރުމުގެ ފުރުސަތު ވަރަށް ބޮޑަށް ކުޑަކޮށްދެ އެވެ. އަދި ވިޓަމިން ޑީގެ 10 މައިކްރޮގްރާމްސް ކޮންމެ ދުވަހަކު ބޭނުންކުރުމުން ދަރިފުޅާއި މައިމީހާގެ ކަށީގެ ސިއްހަތު ރަނގަޅުކޮށްދޭކަން ވަނީ ހޯދިފަ އެވެ.
މާބަނޑު ދުވަސްވަރު މާގިނައިން ވިޓަމިން އޭ ބޭނުންކުރުމުން ދަރިފުޅުގެ ސިއްހަތަށް ގެއްލުން ލިބެ އެވެ.
މާބަނޑު މީހުން އަގުބޮޑު މަލްޓިވިޓަމިން ސަޕްލިމެންޓް ބޭނުންކުރަނީ އެތަކެތި މާކެޓްކުރާ ގޮތުން މިފަދަ ސަޕްލިމެންޓްތަކުގައި ބުނާ ފައިދާއެއް ސިއްހީ ގޮތުން ނުފެންނަ ކަމަށް ދިރާސާ ޓީމުން ވަނީ ބުނެފަ އެވެ. ބަދަލުގައި ބޭނުންކުރަންވީ ގުދުރަތީ ރަނގަޅު ކާނާ ކަމަށާއި އޭރުން ހުރިހާ ގޮތަކުން ވެސް މައިމީހާ އާއި ދަރިފުޅަށް ރަނގަޅު ކަމަށް ބުނެފައިވެ އެވެ.