25 ފެބުރުއަރީ 2018 - 14:56
ހިންދީ ސިނަމާއަށް އެރި އެންމެ އަލިގަދަ އެއް ތަރި ކަމަށްވާ ޝްރީދޭވީ، 54، ވަރަށް ކުއްލި ގޮތަކަށް މަރުވި ޚަބަރުން ބޮލީވުޑްގެ އިތުރުން އިންޑިއާގެ އެތައް މިލިއަނަށް ބަޔަކަށް ވަރަށް ބޮޑު ޝޮކެއް ލިބުނެވެ.
ސްރީދޭވީ މަރުވީ އޭނާގެ ފިރިމީހާ ބޯނީ ކަޕޫރަށް ބޮޑުބޭބެ ކިޔާ މޯހިތު މަރުވާގެ ކައިވެނީގެ ރަސްމިއްޔާތުގައި ބައިވެރިވުމަށް ޑުބާއީ އަށް ގޮސް އުޅެނިކޮށެވެ. މި ދަތުރުގައި އޭނާއާއެކު ފިރިމީހާ އާއި ދަރިފުޅު ޚުޝީ ވެސް ބައިވެރިވި އެވެ.
ސްރީދޭވީގެ ކުއްލި މަރާ ގުޅިގެން ހިތާމަ ފާޅުކުރައްވައި އިންޑިއާގެ ބޮޑުވަޒީރު ނަރެންދުރަ މޯދީ ވެސް ޓްވީޓް ކުރެއްވި އެވެ. މޯދީ ވިދާޅުވީ ސްރީދޭވީގެ ދިގު ފިލްމީ ކެރިއަރުގައި ވަރަށް މޮޅު ޕާފޯމަންސްތަކެއް ދައްކާފައިވާ ކަމަށެވެ.
ޒުވާން ބަތަލާ އާލިއާ ބަޓްގެ ޓުވީޓްގައި ބުނެފައިވަނީ ޝްރީދޭވީ މަރުވި ޚަބަރު ލިބުމުން ބުނާނެ އެއްޗެއް ވެސް ނޭނގޭ ކަމަށެވެ. ސްރީދޭވީ އަކީ އަބަދުވެސް އޭނާގެ ރޯލް މޮޑެލްގެ ގޮތުގައި ބަލަމުންދިޔަ ބަތަލާ ކަމަށް ވެސް އާލިއާގެ ޓުވީޓްގައި ބުނެފައިވެ އެވެ.
ސްރީދޭވީގެ ފިލްމީ ކެރިއަރުގެ ރަން ޒަމާނުގައި އޭނާއާ އެންމެ ބޮޑަށް ވާދަކުރި ބަތަލާ މާދުރީ ޑިކްޝިޓްގެ ޓުވީޓްގައި ބުނި ގޮތުގައި އޭނާއަށް ހެނދުނު ހޭލެވުނީ ސްރީދޭވީ މަރުވި ހިތާމަވެރި ޚަބަރާ އެކުގައި ކަމަށެވެ. ދުނިޔެއަށް ގެއްލިގެން ދިޔައީ ވަރަށް ހުނަރުވެރި އެކްޓަރެއް ކަމަށާއި ފިލްމުތަކުގެ ލެގަސީއެއް ސްރީދޭވީ ދޫކޮށްފައިވާ ކަމަށް ވެސް މާދުރީގެ ޓުވީޓްގައިވެ އެވެ.
ކުރީގެ މަޝްހޫރު ބަތަލާ ހެމާ މާލިނީގެ ޓުވީޓްގައި ބުނި ގޮތުގައި ސްރީދޭވީ މަރުވި ޚަބަރު ލިބުމުން އޭނާއަށް ވަނީ ޝޮކެއް ލިބިފަ އެވެ. މަޖާ ކުޅަދާނަ އެކްޓަރެއްގެ ގޮތުގައި ހެމާ ވަނީ ސްރީދޭވީ ސިފަ ކޮށްފަ އެވެ. އަދި ސްރީދޭވީ ނެތުމުގެ އުނިކަން ފިލްމު އިންޑަސްޓްރީއަށް ދުވަހަކުވެސް ފޫނުބެއްދޭނެކަމަށް ހެމާގެ މެސެޖުގައި ބުނެފައިވެ އެވެ. ބޯނީ އަކީ ގާތް ރައްޓެއްސެއް ކަމަށާއި ބޯނީ އާއި ސްރީދޭވީގެ ދެ ދަރިން ބޮޑެތިވީ އޭނާގެ ލޯ ކުރމަތީގައި ކަމަށް ބުނަމުން ހެމާ ވަނީ އެ އާއިލާއަށް ތައުޒިޔާ ކިޔާފަ އެވެ.
ސްރީދޭވީގެ ކުއްލި މަރުމުން އެންމެ ބޮޑު ހިތާމައެއް ލިބުނު އެއް އެކްޓަރަކީ އާމިރު ޚާނެވެ. އާމިރުގެ ޓުވީޓްގައި ބުނެފައިވާ ގޮތުގައި ސްރީދޭވީ މަރުވި ޚަބަރު ލިބުމުން ލިބުނު ހިތާމައިން ހިތަށް ވަނީ ވަރަށް އުނދަގޫވެފަ އެވެ.
"އަހަރެންނަކީ އަބަދުވެސް ސްރީދޭވީގެ ވަރަށް ބޮޑު ފޭނެއް. އަދި އޭނާގެ އަބުރުވެރި ގަދަރުވެރި ދިރިއުޅުން ވަރަށް ބަލައިގަންނަ މީހެއް. އޭނާގެ އާއިލާއަށް އަހަރެންގެ ހިތުގެ އެންމެ ފުންމިނުން ތައުޒިޔާ ކިޔަން. އަދި އޭނާ މަރުވުމުގެ ހިތާމައިގައި ބައިވެރިވާ އެތައް މިލިއަން މީހުންނަކާ އެކު އަހަރެން ވެސް އެ ހިތާމައިގައި ބައިވެރިވަން. އަހަރެމެން އަބަދުވެސް މެޑަމް (ސްރީދޭވީ)ގެ ހަނދާން ލޯތްބާއި ގަދަރާއެކު ކުރާނަން،" އާމިރުގެ ޓުވީޓްގައިވެ އެވެ.
ރިޝީ ކަޕޫރު، އަކްޝޭ ކުމާރު ފަދަ އެކްޓަރުން ވެސް ސްރީދޭވީ މަރުވުމުގެ ހިތާމަ ފާޅުކޮށްފައިވެ އެވެ.
ސައުތު އިންޑިއާގެ މަޝްހޫރު ސުޕަސްޓާ ރަޖްނީކާންތާއި ކަމަލް ހަސަން އަދި މަޝްހޫރު ޑައިރެކްޓަރު ޝޭކަރް ކަޕޫރު ވެސް ވަނީ ހިތާމަ ފާޅުކޮށް ޓްވީޓްކޮށްފަ އެވެ.