24 މެއި 2016 - 07:42
ރޯދަ މަހާ އެކު ދިވެހިން އެންމެ ބޮޑަށް ހަނދާން ވާނީ މަޝްހޫރު ކޮމެޑިއަން ޔޫސުފް ރަފީއު (ޔޫސޭ)ގެ މަތިންނެވެ. ރޯދަ މަސް ބޯމަތިވެފައި އޮތް އިރު، މި އަހަރުގެ ރޯދަ މަހު ވެސް ޔޫސޭ ބެލުންތެރިންނާ ބައްދަލު ކުރާނެ އެވެ.
އޭނާ ގެނެސްދޭ ހެއްވާ މަޖާ ޑްރާމާ "ދިރިއުޅުމަކީ މިއީބާ"އާ އެކުގަ އެވެ. މިދިޔަ އަހަރު ސަންގު ޓީވީން އެ ޑްރާމާ ގެނެސް ދިން ނަމަވެސް މި ފަހަރު އެ ޑްރާމާތައް ގެނެސް ދޭނީ ޗެނަލް 13 އިންނެވެ. އެ ޗެނަލާ އެކު ޔޫސޭ ވަނީ ޑްރާމާތައް ގެނެސް ދިނުމުގެ އެއްބަސްވުމެއް ވެސް ހަދައިފަ އެވެ.
ޔޫސޭ ބުނި ގޮތުގައި އޭނާ އުފައްދަމުން އަންނަތާ މިހާރު 36 އަހަރުވީ ޑްރާމާ މި އަހަރު ގެނެސްދޭ އިރު ވެސް، ބެލުންތެރިންނަށް ކަމުދާނެ، ހެއްވާލާނެ ޑްރާމާތަކެއް ފެނިގެން ދާނެ އެވެ.
"ދިރިއުޅުމަކީ މިއީބާ" ގައި ގެނެސްދޭ ޑްރާމާތަކަކީ އަބަދު ވެސް މުޖުތަމައުގެ ތެރޭގައިި ހުންނަ ނޭދެވޭ ކަންތައްތަކަށް އަލި އަޅުވާލައިގެން ގެނެސްދޭ ޑްރާމާތަކެކެވެ. އެހެންވެ އެ ޑްރާމާތަކަކީ މެސެޖްތަކެއް މުޖުތަމައަށް ފޯރުކޮށްދޭ، އިބްރަތްތެރިި ޑްރާމާތަކެކެވެ. މީގެ ބޭނުމަކީ ވެސް ހަމަމަގުން ނެއްޓިފައި ހުންނަ ކަންކަން ރަނގަޅު ކުރުމެވެ.
ޗެނަލް 13 އިން މި އަހަރުގެ ޑްރާމާތައް ފެނިގެންދާ އިރު، އޭގެ ފުރަތަމަ އެޕިސޯޑްގެ ޓްރެއިލާ ވެސް މިހާރު ވަނީ ދައްކާލައިފަ އެވެ. ކުރީ އަހަރުތަކެކޭ އެއްގޮތަށް މި ފަހަރު ވެސް ޔޫސޭ އާ އެކު އާންމުކޮށް ފެންނަ ޓީމް، ޑްރާމާތަކުން ފެނިގެން ދާނެ އެވެ.
އޭނާ ބުނަން އޮތް ވާހަކައަކީ ޑްރާމާތަކަށް އިންތިޒާރު ކޮށްލާށޭ އެވެ. ޔަގީނުން ވެސް ބެލުންތެރިން ހެއްވާލަ ދޭނެ އެވެ.
ޔޫސޭ ބުނީ އެންމެ ފުރަތަމަ ޓީވީއެމުން ގެނެސް ދިން "ދިރިއުޅުމަކީ މިއީބާ" ގެ މި އަހަރުގެ ފުރަތަމަ އެޕިސޯޑް ޗެނަލް 13 އިން މި އަހަރު ދައްކާ އިރު، ޑްރާމާގެ ފުރަތަމަ އެޕިސޯޑް ވެގެން ދާނީ މި ސިލްސިލާގެ 189 ވަނަ ޑްރާމާ އަށް ކަމަށެވެ.