17 ފެބުރުއަރީ 2018 - 11:15
މެންޗެސްޓާ (ފެބްރުއަރީ 17) - ބެލްޖިއަމްގެ މިޑްފީލްޑަރު ކެވިން ޑިބްރޭނާ 2015 ވަނަ އަހަރު މެންޗެސްޓާ ސިޓީ އަށް ބަދަލުވުމުގެ ކުރިން އޭނާގެ ސޮއި ހޯދަން ޔޫރަޕްގެ ނަން މަޝްހޫރު ފަސް ކްލަބަކުން ވާހަކަ ދެއްކި ކަމަށް ޑިބްރޭނާގެ އޭޖެންޓް ޕެޓްރިކް ޑީ ކޯސްޓާ ބުނެފި އެވެ.
އެ ފަހަރު ޖަރުމަނުގެ ވުލްފްސްބާގް ދޫކޮށް ޑިބްރޭނާ ސިޓީ އަށް ބަދަލުވީ 75 މިލިއަން ޔޫރޯ އަށެވެ. ޑީ ކޮސްޓާ ބުނީ ޑިބްރޭނާ ހޯދަން މަސައްކަތްކުރި އެއް ކްލަބަކީ އޭރު ޕެޕް ގާޑިއޯލާގެ އިރުޝާދުގެ ދަށުން ކުޅުނު ބަޔާން މިއުނިކް އެވެ.
"ޔޫރަޕްގެ ނަން މަޝްހޫރު ފަސް ކްލަބަކުން ޑިބްރޭނާ ހޯދަން ވާހަަކަ ދެއްކި. އެންމެ ބޮޑަށް ވާހަކަ ދެކެވުނީ ބަޔާންއާ. ދެ ބައްދަލުވުމަށް ފަހު ޑިބްރޭނާ ވެސް އެ ޓީމާ ގުޅެން ނިންމި. އެކަމަކު މައްސަލަ ޖެހުނީ ވުލްފްސްބާގުން ބޭނުންވި އަގު ބަޔާނުުން ދޭން ބޭނުމެއްނުވި. ބަޔާނުން ބޭނުންވީ ހަމައެކަނި 50 މިލިއަން ޔޫރޯ ދޭން،" ޑީ ކޮސްޓާ ބުންޏެވެ.
ރިޕޯޓްތައް ބުނާގޮތުގައި އެ ފަހަރު ޑިބްރޭނާ ހޯދަން ޔުވެންޓަސް އާއި ޕީއެސްޖީ އަދި އިންޓަ އިން ވެސް މަސައްކަތް ކުރި އެވެ.
އޭނާ ބުނީ ސިޓީން އޮތީ ޑިބްރޭނާގެ ސޮއިހޯދަން ފުލްފްސްބާގުން ބުނި ކޮންމެ އަގެއްދޭން ވެސް ތައްޔާރަށް ކަމަށެވެ.
"އަހަރެމެން ސިޓީއާ މަޝްވަރާކުރިއިރު ވަރަށް ރަނގަޅަށް ކަންތައް ދިޔައީ. އެ މީހުން (ސިޓީ) އިން ބުނީ ކޮންމެ އަގެއް ދައްކާފައިވެސް ޑިބްރޭނާ ބޭނުންވާ ކަަމަށް. އެ ހިސާބުން އަހަރެމެން ހުރިހާ ކަމެއް ނިންމައިފިން،" އޭނާ ބުންޏެވެ.
ޑިބްރޭނާ އެންމެ ފުރަތަމަ 2012 ވަނަ އަހަރު ބެލްޖިއަމްގެ ގެންކް ދޫކޮށް ބަދަލުވީ ޗެލްސީ އަށެވެ. އެ ޓީމުގައި ކުޅުމުގެ ފުރުސަތު ނުލިބޭތީ އޭނާ ދެން ބަދަލުވީ ލޯން އެއްބަސްވުމެއްގެ ދަށުން ޖަރުމަނުގެ ވާޑާ ބްރެމެން އަށެވެ. ބްރެމެންގައި އޭނާ ދެއްކި ކުޅުން ކަމުދިޔުމުން ވުލްފްސްބާގުން 2014 ވަނަ އަހަރުގެ ޖެނުއަރީ މަހު 18 މިލިއަން ޕައުންޑްގެ ފީއެއް ދެއްކުމަށް ފަހު ޑިބްރޭނާގެ ސޮއިި ހޯދި އެވެ. އެ ޓީމަށް ކުޅުނު ދެ އަހަރާއި ބަައިގައި ޑިބްރޭނާ ވަނީ މޮޅު ކުޅުމެއް ދައްކައިފަ އެވެ.
މި ސީޒަނުގައި ގާޑިއޯލާގެ ކޯޗުކަމުގައި ސިޓީން ދައްކަމުން އަންނަ ތަފާތު މޮޅު ކުޅުމުގެ ފަހަތުގައި ޑިބްރޭނާގެ ދައުރު ބޮޑެވެ.