15 ފެބުރުއަރީ 2018 - 11:04
ޕެރިސް (ފެބްރުއަރީ 15) – ޕީއެސްޖީގައި ހުރީ އުފަލުގައި ކަމަށް، ރެއާލް މެޑްރިޑަށް ބަދަލުވާން އުޅޭ ކަމަށް އަޑުއަރާފައިވާ ފޯވާޑް ނޭމާ ބުނެފި އެވެ.
ބާސެލޯނާ ދޫކޮށް ދުނިޔޭގެ ރެކޯޑް އަގަކަށް މި ސީޒަނުގައި ޕީއެސްޖީ އަށް ބަދަލުވި ނޭމާ ވަރަށް އަވަހަށް މެޑްރިޑަށް ބަދަލުވާނެ ކަމަށް ވަނީ އަޑުއަރައިފަ އެވެ. އޭގެ އެންމެ ބޮޑު ސަބަބަކީ، ޕީޢެސްޖީ އަށް ބަދަލުވެ ލިއޮމަލް މެސީގެ ހިޔަނިން ނެއްޓުނު ނަމަވެސް، ފްރާންސް ލީގުގައި ހުރެގެން ދުނިޔޭގެ އެންމެ މަތީ ފަންތިއަށް އެރުމަށް ހުރަސްތަކެއް ހުރުމުން ކަމަށް ލަފާކުރެވެ އެވެ. އަނެއްކޮޅުން އޭނާ ގެންދަން މެޑްރިޑުން ވެސް ވަރަށް ބޮޑަށް ހިފާ ކަމަށްވެ އެވެ.
ޗެމްޕިއަންސް ލީގުގެ ދެ ވަނަ ބުރުގައި ރޭ މެޑްރިޑް އަތުން 3-1 އިން ޕީއެސްޖީ ބަލިވި މެޗަށް ފަހު ނޭމާ ވަނީ އެ ވާހަކަތަކަށް މިވަގުތަށް ހިހޫ ފެން އަޅައިފަ އެވެ.
"ޕީއެސްޖީއާ އަހަރެންގެ ކޮންޓްރެކްޓެއް އެބައޮތް. އަހަރެން މިހިރީ މި ޓީމުގެ ކުޅުންތެރިންނާ މެދު ހިތްހަމަޖެހިގެން. އަހަރެން ހަމައެކަނި ވިސްނަނީ މި ޓީމުގައި އަހަރެން ވޭތުކުރާނެ ދުވަސްތަކާ މެދު،" ނޭމާ ބުންޏެވެ.
ޕީއެސްޖީ އަށް ނޭމާ ގެނައި އެންމެ ބޮޑު ސަބަބަކީ ވެސް، ރިޕޯޓްތައް ބުނާ ގޮތުގައި އެ ކްލަބުން ޔޫރަޕުގައި ކާމިޔާބު ހޯދުމެވެ. އެހެން އެކަން އޮއްވާ ޗެމްޕިއަންސް ލީގުގެ ދެ ވަނަ ބުރުން ކަޓައިފި ނަމަ އެއީ މައްސަލައަކަށްވާނެ އެވެ.
"އަދި އެއްވެސް ކަމެއް ނުނިމޭ. އަހަރެމެންގެ އަމިއްލަ ދަނޑުގައި، ސަޕޯޓަރުންގެ ކުރިމަތީގައި އިތުރު މެޗެއް އެބައޮތް. އެ މެޗު ވެސް ވަރަށް އުނދަގޫވާނެ މެޑްރިޑުގައި ކުޅުނު މެޗު ފަދައިން،" ނޭމާ ބުންޏެވެ. "އެކަމަކު އަހަރެން އުއްމީދުކުރަން އަހަރެމެންނަށް އެކަން ވާނެ ކަމަށް."