18 ފެބުރުއަރީ 2018 - 06:28
ހޮލީވުޑްގައި އަންހެން ފަންނާނުންގެ ވަރުގަދަކަން މި ފަހަކަށް އައިސް ދައްކަމުން އަންނައިރު، މި ވެސް ހަމަ އެ ކަހަލަ ޕްރޮޖެކްޓެއްގެ ވާހަކަ އެވެ. މި ޓީމްގައި ވެސް އިސްކޮށް ނަގާކިޔާ ބަޔަކަށް ތިބީ އަންހެނުންނެވެ. ފިލްމްގެ މުހިއްމު ރޯލްތަކެއް ކުޅެނީ ދެ ބަތަލާއިންނެވެ. ޑައިރެކްޓަރަކީ ވެސް އަންހެނެކެވެ.
މިއީ "ދަ ކިޗަން" ގެ ވާހަކަ އެވެ. އެމެރިކާގެ ހެލްސް ކިޗަންގައި 1970ގެ އަހަރުތަކުގައި އޮތް މާފިއާގެ ކުށުގެ ވެށީގެ ވާހަތަކެއް ސްކްރީނަށް ގެނެސް ދޭ ފިލްމްގެ އެއް ބަތަލާއަކަށް ޓިފެނީ ހެޑިޝް މިހާރު ވެސް ވަނީ ސޮއިކޮށްފަ އެވެ. އޭނާއާ އެކު ދެން ކާސްޓަށް އިތުރުވާ ވަރުގަދަ އަންހެން ނަމަކީ "ބްރައިޑްސް މެއިޑް" އާއި "ދަ ސްޕައި" ފަދަ ފިލްމްތައް ކުޅެފައިވާ މެލީސާ މެކާތީ އެވެ.
ގޯލްޑެން ގްލޯބް ހާސިލްކޮށްފައިވާ ބަތަލާ ފިލްމްގެ ކާސްޓަށް ގެންނަން ވާހަކަ ދައްކަމުން ދިޔަ ނަމަވެސް، އޭނާ ފިލްމަށް ސޮއިކުރިކަން އަދި ކަށަވަރެއް ނުވެ އެވެ.
"ދި ކިޗަން" ގައި ދައްކުވައި ދޭނީ ހެލްސް ކިޗަންގެ މާފިއާގެ ގިނަ އަދަދެއްގެ ފިރިހެނުންތަކެއް ހައްޔަރު ކުރުމާ އެކު، އެ މީހުންގެ އަނބިން ނިކުމެ ހިންގާ ކަންތައްތަކެވެ. މި ފިލްމްގެ ޑައިރެކްޓަރަކީ 2015 ގައި ރިލީް ކުރި "ސްޓްރެއިޓް އައުޓާ ކޮމްޕްޓަން" ލިޔެގެން، އެ ފަހަރުގެ އޮސްކާ އަށް ނޮމިނޭޓްވި ސްކްރީންރައިޓަރު އެންޑްރިއާ ބަލޮފް އެވެ. "ކިޗަން" ވެގެން ދާނީ އޭނާގެ ފުރަތަމަ ޑައިރެކްޝަނަށެވެ.
މީގެ ކުރިން ކޮމިކް ވާހަކައެއްގެ ގޮތުގައި ގެނެސް ދީފައިވާ "ދަ ކިޗަން" ބޮޑު ސްކްރީނަށް ގެންނަނީ ވެސް އެންޑްރިއާގެ ސްކްރިޕްޓަކާ އެކުގަ އެވެ. އެކަމަކު ފިލްމްގެ މަސައްކަތް ފަށާނެ ތާރީހަކާއި ސިނަމާތަކަށް ގެންނާނެ ތާރީހެއް އަދި އިއުލާނެއް ނުކުރެ އެވެ.