16 ޖުލައި 2016 - 06:58
ބޮލީވުޑް ތަރި ކަރީނާ ކަޕޫރާއި ފިރިމީހާ ސައިފް އަލީ ޚާން އަލަތު ދަރިފުޅަށް އިންތިޒާރު ކުރަމުންދާއިރު ދެ މީހުން ލަންޑަނަށް ގޮސް ކުއްޖާގެ ޖިންސު ދެނެގަތުމަށް ޓެސްޓު ހެދިކަމަށް ދެކެވޭ ވާހަކަތައް އެ ދެމަފިރިން ދޮގުކޮށްފި އެވެ.
އިންޑިއާގެ ބައެއް ނޫސްތަކުން ކުރިން ބުނެފައި ވަނީ ސައިފް އާއި ކަރީނާ ލަންޑަނަށް ގޮސް ޑޮކްޓަރަށް ދައްކައިގެން ދަރިފުޅުގެ ޖިންސް ބެލި ކަމަށާއި އެއީ ފިރިހެން ކުއްޖެއް ކަމަށެވެ.
"މި ވާހަކައިގައި އެއްވެސް ހަގީގަތެއްނެތް. މިއީ މީހަކު ހަދައިގެން ދައްކާފައިވާ ޚިޔާލީ ވާހަކައެއް. ލަންޑަންގެ އެއްވެސް ޑޮކްޓަރަކާ އެކު މިފަދަ އެއްވެސް މުއާމަލާތެއް ނުކުރޭ،" ސައިފް އާއި ކަރީނާގެ ތަރުޖަމާނު ނެރެފައިވަ ބަޔާނެއްގައި ބުނެފައިވެ އެވެ.
މި ބަޔާނުގައި ބުނެފައި ވަނީ ސައިފް އާއި ކަރީނާ އެމީހުންގެ ޒާތީ ވާހަކަތައް ނުދެއްކުމަށް އެމީހުން އެދޭ ކަމަށެވެ.
ސައިފް އާއި ފުރަތަމަ އަންހެނުން އަމްރިތާ ސިންގަށް ސާރާ އާއި އިބްރާހިމް ކިޔާ އަންހެންކުއްޖަކާއި ފިރިހެން ކުއްޖެއް ލިބިފައި ވެއެވެ. ސައިފް، 45، އާއި ކަރީނާ، 33، ކައިވެނިކުރީ 2012 ގައެވެ.