06 ފެބުރުއަރީ 2018 - 21:48
ހައި ކޯޓުގެ ގޮފިތަކުގައި ދާއިމީކޮށް ފަނޑިޔާރުން ތިބުމުގެ ބަދަލުގައި ސުުޕްރީމް ކޯޓުން ކަނޑައަޅާ ޝަރުއީ ވަފުދަކުން ގޮފިތަކަށް ހުށަހެޅޭ މައްސަލަތައް ބަލާ ގޮތަށް ސުޕްރީމް ކޯޓުން މިރޭ ހަމަޖައްސައިފި އެވެ.
ކޯޓުތަކުގެ ގާނޫނަށް 2014 ގައި ގެނައި އިސްލާހެއްގެ ދަށުން ހައި ކޯޓުގެ ދެ ގޮތްޕެއް ރާއްޖޭގެ ދެ ސަރަހައްދެއްގައި ގާއިމްކޮށް، އެއިން ކޮންމެ ގޮތްޕަކަށް ތިން ފަނޑިޔާރުން ހަމަޖައްސަން ޖެހެ އެވެ. އެހެންވެ އައްޑޫގައި ހުންނަ ދެކުނު ގޮފީގައި ދާއިމީކޮށް ތިން ފަނޑިޔާރަކު ތިބޭ ގޮތަށް ސުޕްރީމް ކޯޓުން ކުރިން އޮތީ ހަމަޖައްސައިފަ އެވެ. އުތުރު ގޮފީގެ މަސައްކަތް އަދި ނުފެށޭތީ އެ ގޮތްޕަށް ފަނޑިޔާރުން އޮތީ އަދި ކަނޑަނާޅަ އެވެ.
ސުޕްރީމް ކޯޓުން މިރޭ ނެރުނު ގަރާރެއްގައިވާ ގޮތުން ގޮފިތަކަށް އެކަށީގެންވާ އަދަދަކަށް މައްސަލަ ހުށަހެޅުމުން އެ މައްސަލަތައް ބަލާނީ ސުޕްރީމް ކޯޓުން ކަނޑައަޅާ ހައި ކޯޓުގެ ތިން ފަނޑިޔާރުންގެ ޝަރުއީ ވަފުދަކުންނެވެ. އަދި އެ ނިންމުމާ ގުޅިގެން ހަމަޖައްސަންޖެހޭ އިދާރީ ކަންކަން ހަމަޖައްސަން ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން(ޑީޖޭއޭ) އިން ހަމަޖައްސަން ޖެހޭނެ ކަމަށް ވެސް އެ ގަރާރުގައިވެ އެވެ.
މީގެ އިތުރުން ދެކުނު ގޮތްޕަށް ފަނޑިޔާރުން ކަނޑައަޅަން ސުޕްރީމް ކޯޓުން ކުރިން ނެރުނު ގަރާރުތައް ވެސް މިރޭގެ ގަރާރުގައިވަނީ ބާތިލްކޮށްފަ އެވެ. އެހެންވުމުން އެއްވެސް ގޮތްޕެއްގައި ދެން ދާއިމީކޮށް ފަނޑިޔާރުން ނުތިއްބަވާނެ އެވެ. އޭގެ ބަދަލުގައި ދެން ގޮފިތަކުން މައްސަލަ ބަލާނީ ސުޕްރީމް ކޯޓުން ކަނޑައަޅާ ވަފުދަކުންނެވެ.
ސުޕްރީމް ކޯޓުން މިރޭ އެ ގަރާރު ނެރުނުއިރު ސުޕްރީމް ކޯޓުން މިދިޔަ ބުރާސްފަތި ދުވަހު ނެރުނު އަމުރުގައި އިދިކޮޅު ލީޑަރުން ދޫކޮށްލަން އެންގި ބަޔާއި ސުޕްރީމް ކޯޓުގެ އެއްވެސް މައްސަލައެއް ޖުޑިޝަލް ސާވިސް ކޮމިޝަނަށް ނުބެލޭނެ ކަމަށް ކަނޑައެޅި ބައި ސުޕްރީމް ކޯޓުން މިރޭ ވަނީ ބާތިލްކޮށްފަ އެވެ.
ރާއްޖޭގައި ކުއްލި ހާލަތު އިއުލާންކޮށް، އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދު މުހައްމަދު ރޭ ވަނީ ހައްޔަރުކޮށްފަ އެވެ. އެހެންވެ، މިވަގުތު ސުޕްރީމް ކޯޓުގައި މަސައްކަތް ކުރައްވަނީ ފަނޑިޔާރު އަބްދުﷲ އަރީފާއި ފަނޑިޔާރު އާދަމް މުހައްމަދުގެ އިތުރުން ފަނޑިޔާރު ޑރ. އަހުމަދު އަބްދުﷲ ދީދީ އެވެ.