05 ފެބުރުއަރީ 2018 - 16:47
ރާއްޖޭގައި މިހާރު ހިނގަމުންދާ ސިޔާސީ ހަމަނުޖެހުންތަކާ ގުޅިގެން، ޗައިނާ މީހުން މި ވަގުތު ރާއްޖެ ނައުމަށް އެ ގައުމުގެ ސަރުކާރުން އެދެފި އެވެ.
އެ ގައުމުގެ ފޮރިން މިނިސްޓްރީގެ ތަރުޖަމާނާ ހަވާލާދީ ރޮއިޓާސް ނޫހުގައި ބުނެފައިވަނީ، ރާއްޖޭގެ ސިޔާސީ މަސްރަހު ހަމައަކަށް އެޅެންދެން، ކައިރި މުސްތަގުބަލެއްގައި ރާއްޖެ އަންނަން ނިންމާފައިވާ މީހުންގެ ދަތުރު ފަސް ކުރުމަށް ޗައިނާ ސަރުކާރުން އެދޭ ކަމަށެވެ.
ރާއްޖެއާ ގާތް ގުޅުމެއް އޮންނަ އަދި އެންމެ ގިނަ ޓޫރިސްޓުން އަންނަ ޗައިނާ އިން އިއްޔެ ވަނީ ޓްރެވެލް އެޑްވައިޒަރީ އެއް ވެސް ނެރެފަ އެވެ. އެ އެޑްވައިޒަރީ ނެރެފައިވަނީ އަންނަ ހުކުރު ދުވަހުގެ ނިޔަލަށެވެ.
ޗައިނާގެ އާ އަހަރާ ދިމާކޮށް، މި ދުވަސްވަރު އެ ގައުމުން ގިނަ އަދަދެއްގެ ޓޫރިސްޓުން ރާއްޖެ އާދެ އެވެ.
ޖަލުގައި ތިއްބެވި ސިޔާސީ ބޭފުޅުން ދޫކޮށްލުމަށް ސުޕްރީމް ކޯޓުން މިދިޔަ ބުރާސްފަތި ދުވަހު ނެރުނު އަމުރު ތަންފީޒު ކުރުން ލަސްވުމާ ގުޅިގެން ރާއްޖޭގެ ސިޔާސީ މަސްރަހު އަނެއްކާ ވެސް ހަލަބޮލިވެފައި ވާތީ އިނގިރޭސި ވިލާތުން ވެސް ވަނީ ޓްރެވެލް އެޑްވައިޒަރީ ނެރެފަ އެވެ.