06 ފެބުރުއަރީ 2018 - 05:54
އިންޑިއާގައި ކޮށްފައިވާ ދިރާސާއަކުން ހާމަވެފައިވާ ގޮތުގައި އެ ގައުމުގައި އުފަންވާ ކޮންމެ 1000 ކުއްޖަކުން އެއް ކުއްޖަކީ އުފަންވާއިރު ތުންފަތް ފެޅިފައި ތިބޭ ކުދިންނެވެ. އިންޑިއާ ނޫނަސް ވަރަށް ގިނަ ގައުމުތަކުގައި މިކަހަލަ ކުދިން އުފަން ވުމަކީ އާއްމު ކަމެކެވެ. މިއީ ޖެނެޓިކް މައްސަލައެއްގެ ސަބަބުން ނުވަތަ އެހެން ސަބަބަކާ ހުރެ ވެސް ދިމާވެދާނެ ކަމެކެވެ.
އުފަންވާއިރު މި މައްސަލަ ހުންނަ ކުދިން އޮޕަރޭޝަން ކޮށްގެން މައްސަލަ ހައްލު ނުކުރާ ނަމަ ކެއުމާއި ވާހަކަ ދެއްކުމަށް ދަތިތައް ދިމާވެ އެވެ.
އިންޑިއާގެ ޕޫނާގެ އޯރަލް އަދި މެކްސިލޯފޭޝަލް ސާޖަން ޑރ. ޕުޝްކަރް ވަކްނީސް އަކީ ތުންފަތްފެޅިފައި ތިބޭ ކުދިންނަށް ހިލޭ ފަރުވާދީ އެކުދިންގެ ތުންފަތަށް ހިނިތުންވުން ގެނެސްދޭ ޑޮކްޓަރެކެވެ.
އޭނާ ކައިރިއަށް ދާ ހުރިހާ ކުދިންނަށް ވެސް ޑރ. ވަކްނީސް އޮޕަރޭޝަންކޮށްދީ ފަރުވާ ދެނީ މުޅިން ހިލެ އެވެ. ޑޮކްޓަރު ވިދާޅުވާ ގޮތުގައި މިގޮތަށް އުފަންވާ ކުދިންގެ އޮަޕަރޭޝަން ވީހާވެސް ޅަ އުމުރެއްގައި ކުރުމަކީ އެންމެ ރަނގަޅު ގޮތެވެ. މި އޮޕަރޭޝަންގެ އަގު ބޮޑުކަމުން ފަގީރުންނަށް މިކަން ކުރުމަށް ދަތިތަކާ ކުރިމަތިވާތީ ޑޮކްޓަރު އަލަށް ފެށި ޕްރޮގްރާމެއްގެ ދަށުން، މި އައިބު ހުންނަ ކުދިންނަށް މުޅިން ހިލޭ ފަރުވާ ލިބެ އެވެ.
ޑރ. ވަކްނީސް އަށް މިކަން ކުރުމުގެ ހިތްވަރާއި ޚިޔާލު ލިބުނީ އޭނާގެ ޕްރޮފެސަރު ޑރ. ޕީޓާ ކިސްލާގެ ފަރާތުންނެވެ. މި މަސައްކަތް ހިލޭ ކޮށްދޭން ވިސްނާ މިކަމަށް ޑރ. ވަކްނީސް މަސައްކަތް ފެށިތާ އެތައް އަހަރެއް ވީއިރު ވެސް މިކަމުގައި އެހީތެރިވާނެ ހޮސްޕިޓަލެއް ނުވި އެވެ. އެތައް އަހަރެއް ވަންދެން ހޮސްޕިޓަލެއް ހޯދުމުގެ މަސައްކަތުގައި އޭނާ އުޅުނެވެ. އެންމެ ފަހުން އަމިއްލަ މަސައްކަތުން "ސްޕްރެޑިން ސްމައިލްސް"ގެ ނަމުގައި މި ޕްރޮގްރާމް 2012 ގައި ވުޖޫދަށް ގެނައެވެ.
ޑރ. ވަކްނީސްގެ މަސައްކަތުގައި އޭނާއަށް އެހީތެރިކަން ފޯރުކޮށްދެނީ އެކުގައި މަސައްކަތް ކުރާ ޑރ. ނީރަޖް އަދްކަރް އެވެ. ޑރ. ނީރަޖް އަކީ ޕޫނާގެ އާ ހޮސްޕިޓަލެއްގައި މަސައްކަތް ފަށައިގަން ޑޮކްޓަރެކެވެ. އެހެންވެ ޑރ. ވަކްނީސްގެ މި ޕްރޮގްރާމްގައި އޭނާ އުފަލުން ބައިވެރިވެ "ސްޕްރެޑިން ސްމައިލްސް"ގެ އިންފްރާސްޓްރަކްޗާ އާއި އެތަން ވުޖޫދަށް ގެނައުމުގައި ގިނަގުނަ އެހީތެރިކަން ޑރ. ނީރަޖް ވަނީ ފޯރުކޮށްދީފަ އެވެ.
މިތަނުން އަހަރަކު 40 އަށް ވުރެ ގިނަ ކުދިންނަށް ހިިލޭ ފަރުވާ ދެއެވެ. އަދި ރަށްފުށު ހިސާބުތަކަށް މި މަސައްކަތް ފުޅާކުރަން އެމީހުން މިހާރު އަންނަނީ ވިސްނަމުންނެވެ. އޭރުން އެހިސާބުގަނޑުގައި ދިރިއުޅޭ މީހުންނަށް ފަސޭހައިން އެފަދަ ތަންތަނުން ޚިދުމަތް ހޯދޭނެތީ އެވެ.