01 ފެބުރުއަރީ 2018 - 23:07
މިނިވަން ކުރުމަށް ސުޕްރީމް ކޯޓުން އަމުރުކުރި އިދިކޮޅު ސިޔާސީ ނުވަ ބޭފުޅުންގެ ފަރާތުން ކްރިމިނަލް ކޯޓަށް ހުށަހެޅި ހެބިއަސްކޯޕަސްގެ މައްސަލަ ބަލައި ނުގަންނަން ކްރިމިނަލް ކޯޓުން ނިންމައިފި. އެގޮތަށް ނިންމީ، ސުޕްރީމް ކޯޓުން ވަކި ގޮތަކަށް ކަނޑައަޅާފައިވާތީ އެއާ މެދު ސުވާލު އުފައްދާނެ ޖާގައެއް ނެތުމުން ކަމަށް ކްރިމިނަލް ކޯޓުން ބުނެފައިވޭ.
ޕީޖީ އޮފީސް ކައިރިއަށް އެއްވި މީހުން މިހާރު ވަނީ ދެވަނަ ފަހަރަށް ފަހަތަށް ޖައްސާފައި. އަދި އެއްވުން ކަވަރު ކުރުމަށް ހަރަކާތްތެރިވި މީޑިއާ ވެސް ވަނީ ވަރަށް ބޮޑަށް ފަހަތަށް ޖައްސާފައި.
ޕީޖީ އޮފީސް ކައިރިއަށް އެއްވި އިސް ބޭފުޅުންގެ ތެރޭގައި ކެންދޫ ދާއިރާގެ ޖޭޕީގެ މެމްބަރު އަލީ ހުސެއިނާއި މެދު ހެންވޭރު ދާއިރާގެ އެމްޑީޕީގެ މެމްބަރު އަލީ އާޒިމާއި މަޑުއްވަރީ ދާއިރާގެ މެމްބަރު މުހައްމަދު އަމީތާއި ކުޅުދުއްފުށީ އުތުރު ދާއިރާގެ އެމްޑީޕީގެ މެމްބަރު އަބްދުލް ޣަފޫރު މޫސާ ހިމެނިވަޑައިގަންނަވާ.
ޕީޖީ އޮފިސް ކައިރިއަށް އެއްވި މީހުން އެ ސަރަހައްދުން ފޮނުވާލުމަށް އެސްއޯ ފުލުހުން ހަރަކާތްތެރިވާން ފަށައިފި. އަދި ޕެޕާ ސްޕްރޭ ޖަހައި ބައެއް މީހުން ވަނީ ފަހަތަށް ޖައްސާފައި.
ޕީޖީ އޮފީހުން މިރޭ ނެރުނު ބަޔާނެއްްގައި ބުނެފައި ވަނީ، އިދިކޮޅު ސިޔާސީ ލީޑަރުންނާއި ސިޔާސީ އެހެން ބޭފުޅުން ދޫކޮށްލަން ސުޕްރީމް ކޯޓުން ނެރުނު އަމުރު ތަންފީޒު ކުރުމަށްޓަކައި ކުރަންޖެހޭ މަސައްކަތްތައް ކުރަމުން އަންނަ ކަމަށް، އަދި އެ އަމުރާ ގުޅިގެން ސުޕްރީމް ކޯޓަށް ހުށަހަޅަން ޖެހޭ ކަންކަން ހުށަހެޅުމަށް ތައްޔާރުވަމުންދާ ކަމަށް ޕީޖީ އޮފީހުން ބުނެފައިވޭ.
އިދިކޮޅު ފަރާތްތަކުން މިހާރު ތިބީ ޕީޖީ އޮފީސް ކުރިމަތީގައި އިށީނދެގެން.
ޕީޖީގެ އޮފީސް ކައިރިއަށް އެއްވި މީހުން ގެންދަނީ، ސުޕްރީމް ކޯޓުގެ އަމުރު ތަންފީޒު ކުރުމަށް ގޮވާލަމުން. ސިޔާސީ ބޭފުޅުން މިނިވަން ކުރުމަށް ސުޕްރީމް ކޯޓުން ކުރި އަމުރަށް 24 ގަޑިއިރަށް ވުރެ ގިނައިރު ވެސް އެ އަމުރު ސަރުކާރުން ތަންފީޒު ނުކުރާ މައްސަލަ ވަނީ ހޫނުވެފައި. ސުޕްރީމް ކޯޓުގެ އަމުރު ތަންފީޒު ކުރުމަށް ގޮވާލަމުން އިދިކޮޅު ފަރާތްތަކުން މިރޭ ދަނީ މާލޭގެ އެކި ސަރަހައްދުތަކުގައި އިހުތިޖާޖު ކުރަމުން.
އިދިކޮޅު ފަރާތްތަކުން ޕްރޮސެކިއުޓަ ޖެނެރަލްގެ އޮފީސް ކައިރިއަށް އެއްވެއްޖެ.
ނިހާން: އަޅުގަނޑަކީ ސާބިތުކަންމަތީގައި ހުންނަ މީހެއް. ރާއްޖޭގައި އޮތީ އެމްޑީޕީގެ ފިކުރު ނުވަތަ "ފަނާކުރާ ފިކުރު" އާއި ބިނާކުރަނިވި ފިކުރު ނުވަތަ ޕީޕީއެމްގެ ފިކުރު ކަމަށް އޭނާ ވިދާޅުވި. ނިހާން ވިދާޅުވީ އޭނާ ރާއްޖޭގައި މިވަގުތު ނެތަސް، ރާއްޖޭގައި މިހާރު ހިނގާ ކަންކަމުގައި ޕީޕީއެމަށް އެހީތެރިވެ ދެއްވުމުގައި ސާބިތުކަންމަތީގައި ދެމިހުންނެވި ކަމަށް.
ޕީޕިއެމްގެ ޕާލަމެންޓްރީ ގުރޫޕުގެ ލީޑަރު ނިހާން ޗެނަލް 13 ގައި ވާހަކަ ދައްކަވަމުން ވިދާޅުވީ، ފެބްރުއަރީ 7 ފަދަ ދުވަހެއް ގެނެވޭނެ ކަމަށް އިދިކޮޅު މީހުން ދެކޭ ނަމަ އެއީ ކުށްހީއެއް ކަމަށް. އަދި އެއީ ކަނޑުކޮސް ހިޔާލެއް ކަމަށް އޭނާ ވިދާޅުވި، އެމްޑީޕީން އެއްވުމަކަށް ގޮވާލައިފި ނަމަ، ފުލުހުންނަށް ހަމަލަ ދިނުމާއި މުދަލަށް ގެއްލުން ދިނުން ފަދަ ކަންކަން ތާރީޚުން ފެންނަ ކަމަށް ނިހާން ވިދާޅުވި. ރަށްރަށުން މީހުން ގެނައުމަށް އެމްޑީޕީން ގޮވަނީ ރައްޔިތުން އަނެއްކާ ވެސް ގާނޫނީ ގޮޅިއަކަށް ފައްތަން ކަމަށް ނިހާން ވިދާޅުވި. އެހެންވީމާ މިފަދަ ކަމަކަށް ރައްޔިތުން ނައުމަށް ގޮވާލައްވާ ކަމަށް ވިދާޅުވި.
މާލެ ޖަލު ސަރަހައްދަށް އެއްވި މީހުން އެތަނުން ފޮނުވާލުމުން މާލޭގެ އެކި މަގުތަކުގައި މިހާރު ދަނީ ހިނގަމުން. އެއް ބަޔަކު އެމްޑީޕީގެ ހަރުގެ ކައިރިއަށް ދާން އުޅުމުން، ބްރިޖް ސަރަހައްދުން ފުލުހުން ވަނީ އެ މީހުންނަށް ހުރަސް އަޅައި އެތަނުން ވެސް ފަހަތަށް ޖައްސާލާފައި.
މާލޭ ޖަލު ސަރަހައްދު ކައިރީގައި ބެރިކޭޑް ޖަހައި، އެ ސަރަހައްދަށް އާންމުންނަށް ނުވަދެވޭ ގޮތަށް ފުލުހުން ބަންދުކޮށްފި. އަދި މާލޭ ޖަލު ސަރަހައްދަށް އެއްވި މީހުން މިހާރު ވަނީ ފަހަތަށް ޖައްސާފައި.
މާލޭ ޖަލު ކައިރިއަށް އެއްވި މީހުން އެ ސަރަހައްދުން ފޮނުވާލުމަށް އެސްއޯ ފުލުހުން ހަރަކާތްތެރިވާން ފަށައިފި.
ސުޕްރީމް ކޯޓުގެ އަމުރު ތަންފީޒު ކުރުމަށް ގޮވާލައި އިދިކޮޅު ފަރާތްތަކުން އަދިވެސް ގެންދަނީ މާލޭ ޖަލު ކައިރީގައި އަޑު އުފުލަމުން. ބޮޑުތަކުރުފާނުމަގުގައި ހުންނަ މާލޭ ޖަލު ކުރިމަތިން މަގު މެދުގައި ގިނަ ބަޔަކު އިށީނދެގެން ތިބެ އަންނަނީ ޝުއޫރު ފާޅުކުރަމުން. އެމީހުން ހުއްޓުވުމަށް ފުލުހުން މީގެ އިރުކޮޅެއް ކުރިން މަސައްކަތް ކުރި ނަމަވެސް މިވަގުތު އެއްވެސް ކަމެއް ނެތް.
ކުރީގެ ރައީސް މައުމޫން ކުރެއްވި ޓުވީޓެއްގައި ވިދާޅުވީ، ސުޕްރީމް ކޯޓުގެ އަމުރަށް ވަގުތުން އަމަލު ކުރާނެ ކަމުގެ ޔަގީންކަން ފުލުހުން ދިނުމަށް ފަހު، މިރޭ އެހެން ގޮތަކަށް އެ ވާހަކަ ދެއްކުމުން ހިތާމަ ކުރައްވާ ކަމަށް. ފުލުހުން މިރޭ ނެރުނު ނޫސްބަޔާނެއްގައި ބުނީ، ސުޕްރީމް ކޯޓުގެ އަމުރާ ގުޅިގެން ބަންޑާރަ ނައިބާއި ޕްރޮސިކިއުޓާ ޖެނެރަލްގެ ލަފާގެ މަތިން ފުރިހަމަކުރަންޖެހޭ ގާނޫނީ އިޖުރާއަތުތައް ފުރިހަމަ ކުރުމަށް ފަހު، އެ އަމުރު ތަންފީޒު ކުރުމުގެ މަސައްކަތް ކުރަމުން އަންނަ ކަމަށް.
ޕީޕީއެމްގެ ނިއުސް ކޮންފަރެންސް ނިންމާލައިފި
އަބްދުއްރަހީމް: މާދަމާގެ ހެނދުނު 11:00 އިން ފެށިގެން ކޮންމެ ދެ ގަޑިއިރަކުން ޕީޕީއެމްގެ ނިއުސް ކޮންފަރެންސް ބާއްވާނެ.
ޕީޕީއެމްގެ ނައިބު ރައީސް އަބްދުއްރަހީމް: ގައުމުގެ ސުލްހަ މަސަލަސްކަން ނަގާލުމަށް ކުރާ ކަންކަމުގައި އެއްބާރުލުން ނުދިނުމަށް ގޮވާލަން. ގާނޫނީ ސަރުކާރަކާ ދެކޮޅަށް މާލެ އަންނަން ގޮވާލާ ކޮންމެ ގޮވާލުމަކީ ގާނޫނާ ޚިލާފު ކަމެއް. އެފަދަ ކަންކަން ނުކުރުމަށް ދިވެހި ރައްޔިތުންނަށް ގޮވާލަން.
ސަރުކާރުގެ ކުންފުނިތަކުގެ އެމްޑީންގެ ފަރާތުން ފެނަކައިގެ އެމްޑީ ޝަރީފް: ދިވެހިންނަށް ޔަގީންކަން އަރުވަން ބޭނުންވަނީ މި ހުތޫރަތްތެރި ދަނޑިވަޅުގައި ކުންފުނިތަކުގެ އެންމެން ތިބީ ރައީސް ޔާމީނާއެކު. ދިވެހި މުޖުތަމައުގައި ހަލަބޮލިކަން އުފެއްދުމަށް އިދިކޮޅު ފަރާތްތަކުން ދައްކަނީ ދޮގު ވާހަކަތަކެއް. އަޅުގަނޑުމެންގެ ތެރެއިން އެއްވެސް އެމްޑީއަކު އިދިކޮޅު ފަރާތްތަކާ ވާހަކަ ނުދައްކާ ކަމުގެ ޔަގީންކަން އަރުވަން. އަދި ކުންފުނިތަކުން އާންމުންނަށް ދޭ ޚިދުމަތްތަކަށް ހުއްޓުމެއް ނާންނާނެ.
ހައުސިން މިނިސްޓަރު ޑރ. މުއިއްޒު: ރާއްޖޭގެ އަމާންކަން ނަގާލަން އިދިކޮޅު ފަރާތްތަކުން މަސައްކަތް ކުރަމުން އެބަދޭ. އެކަމަކު ދިވެހި ރައްޔިތުންނަކީ ކުރިއަށް ވުރެ ހޭލުންތެރި ބައެއް. އެހެންވީމާ އެކަން އިދިކޮޅު ފަރާތްތަކަށް ކާމިޔާބެއް ނުވާނެ. ރޭ ވެސް އިދިކޮޅު ފަރާތްތަކާ އެކު ފެނުނީ ވަރަށް މަދު ބައެއް. އިދިކޮޅު ފަރާތްތަކުން ކުރާ މަސައްކަތްތަކަށް އެއްގޮތަކަށް ވެސް ފުރުސަތު ދޭކަން ނުޖެހޭ. ބަޔަކު އެ ދަނީ އަމިއްލަ އެޖެންޑާއެއް ކުރިއަރުވަން. އެކަމަށް ފުރުސަތު ދީގެން ނުވާނެ. ރައީސް ޔާމީން ހުންނެވީ، މަގާމުގެ ހައިސިއްޔަތުން ހުރިހާ މަސައްކަތެއް ކުރެއްވުމުގައި ސާބިތުވެ.
މިނިސްޓަރު އަބްދުﷲ ނާޒިމް: އިދިކޮޅު ފަރާތްތަކުން ދަނީ ކުށުގެ މާހައުލަކަށް ދިވެހިން ގެންދަން. މިދިޔަ 10 ވަރަކަށް އަހަރު ވެސް އެބޭފުޅުން ކުރެއްވީ އެ މަސައްކަތް. އެކަމަކު މިއަދު ދިވެހި ރައްޔިތުން އެ ވާހަކަތައް ގަބޫލެއް ނުކުރާނެ. ސަރުކާރުގެ ހުރިހާ މުއައްސަސާތަކުން ދަނީ އާންމު ހާލަތުގައި ދިވެހިންނަށް ޚިދުމަތް ދެމުން. އިދިކޮޅު ފަރާތްތަކުން ގައުމު ހަލަބޮލި ކުރަން ކުރާ މަސައްކަތް ހުއްޓާލުމަށް ގޮވާލަން.
ޒަމީރު: ސަރުކާރުގެ ކުންފުނިތަކުގެ ބޯޑު މެމްބަރުންނާއި ސަރުކާރުގެ ސިޔާސީ ބޭފުޅުން އިދިކޮޅު ފަރާތްތަކާ ގުޅިގެން ސިޔާސީ މަސައްކަތްތަކެއް ނުކުރައްވާނެ. އަޅުގަނޑުމެން މިތިބީ ވަރަށް ބަދަހިކޮށް ގުޅިގެން މަސައްކަތް ކުރަން.
ޕީޕީއެމްގެ އޮފީހުގައި މިހާރު ކުރިއަށް ގެންދާ ޕްރެސް ކޮންފަރެންސެއްގައި އެ ޕާޓީގެ ނައިބު ރައީސް މުސާ ޒަމީރު ވިދާޅުވީ، މާދަމާ މެންދުރު ފަހު ހުރިހާ ރަށެއްގައި ވެސް ޕީޕީއެމްގެ ހަރަކާތްތަކެއް ކުރިއަށް ގެންދާނެ ކަމަށް. އެކަމަކު އެއީ މުޒާހަރާއެއް ނޫން ކަމަށް އޭނާ ވިދާޅުވި.
ރައީސް ޔާމީން މާދަމާ ރޭ ސިންގަޕޫރަށް ފުރާވަޑައިގަންނަވަން އުޅުއްވާ ކަމަށް ބުނެ، ސޯޝަލް މީޑިއާގައި އާންމު ކޮށްފައިވާ ޓިކެޓުގައި އެއްވެސް ހަގީގަތެއް ނެތް ކަމަށް ރައީސް އޮފީހުގެ ތަރުޖަމާން އިބްރާހިމް މުއާޒް ވިދާޅުވެއްޖެ. އޭނާ ކުރެއްވި ޓުވީޓެއްގައި ވިދާޅުވީ، ރައީސް ޔާމީން ސިންގަޕޫރަށް ފުރާވަޑައިގަންނަވަން އުޅުއްވާ ބުނެ ފަތުރަނީ ދޮގު ވާހަކަތަކެއް ކަމަށް.
ޑރ. މުއިއްޒު: އިދިކޮޅު ފަރާތްތަކަށް އިންތިޚާބަކުން ކާމިޔާބު ނުވާނެކަން ޔަގީން. ރައީސް ޔާމީން ގެނެސް ދެއްވާ ތަރައްގީ ކޮންމެ ރަށަކުން އަންނަނީ ފެންނަމުން. މާލެ އާއި ރަށްރަށުގެ ތަފާތު ނައްތާލުމަށް އެންމެ ބޮޑަށް މަސައްކަތް ކުރައްވަނީ ވެސް ރައީސް ޔާމީން. އެހެންވެ އިދިކޮޅު އެއްވެސް ފަރާތްތަކަށް ފުރުސަތެއް ނެތް. އިދިކޮޅު ފަރާތްތަކުން މިހާރު އެގޮތަށް މަސައްކަތް ކުރަނީ ވެސް އެހެންވެ.
ޑރ. މުއިއްޒު: ރާއްޖޭގެ ދުސްތޫރީ ނިޒާމު ނެގެހެއްޓުމުގެ އެންމެ އިސްވެރިއަކީ ރައީސުލްޖުމްހޫރިއްޔާ. އަދި ދައުލަތުގެ މުއައްސަސާތަކުން އެކަން ނަގަހައްޓާ ކަމުގެ ޔަގީންކަން ހޯއްދަވަން ޖެހިވަޑައިގަންނަވާ ބޭފުޅަކީ ވެސް ރައީސް ޔާމީން. އަދި އެމަނިކުފާނު އެ ގެންދަވަނީ އެ ޒިންމާ ވަރަށް ފުރިހަމައަށް ނަންގަވަމުން. މި ދައުރުގައި ވެރިކަން ބަދަލުކުރެވޭނީ ރިޔާސީ އިންތިޚާބުގެ ތެރެއިން އެކަނި. އެ ނޫން ގޮތަކަށް ވެރިކަން ބަދަލުކުރަން ދިވެހި ރައްޔިތުން ވެސް ފުރުސަތު ނުދޭނެ.
ޓީވީއެމްގައި ވާހަކަ ދައްކަވަމުން ހައުސިން މިނިސްޓަރު ޑރ. މުއިއްޒު ވިދާޅުވީ، އިންތިޚާބަކަށް މަޑުކުރަން އިދިކޮޅު ފަރާތްތަކުން ބޭނުން ނުވާ ކަމަށާއި ކޮންމެހެން ވެސް ބޭނުންވަނީ އޭގެ ކުރިން ވެސް ވެރިކަން ހޯދަން ކަމަށް.
ޔޫތު މިނިސްޓަރު އިބްތިޝާމް: މަގުތައް ހަލަބޮލިކޮށް ކުށުގެ ވެއްޓަށް ޒުވާނުން ވަނުމަށް އިދިކޮޅު ފަރާތްތަކުން ގޮވިޔަސް އެކަމަށް އިޖާބަ ނުދިނުމަށް އެދެން. ރައީސް ޔާމީނަކީ ހިތްވަރުގަދަ ވެރިއެއް. ސުޕްރީމް ކޯޓުގެ އަމުރު ސަރުކާރުން ތަންފީޒު ކުރާނެ. ބަލަންޖެހޭ ކަންކަމާއި މަޝްވަރާތައް ދަނީ ކުރިއަށް.
އަނެއްކާވެސް ޕީޕީއެމްގެ ޕްރެސް ކޮންފަރެންސެއް. އެ ޕާޓީގެ ނައިބު ލީޑަރު ޓޫރިޒަމް މިނިސްޓަރު މޫސާ ޒަމީރު ވިދާޅުވީ ސުޕްރީމް ކޯޓުގެ އަމުރަށް ފަހު އިދިކޮޅު ފަރާތްތަކުން ދޮގު ޚަބަރު ފަތުރަމުން އަންނަ ކަމަށާއި ސަރުކާރުން އަންނަނީ އަމުރު ތަންފީޒު ކުރުމަށް މަސައްކަތް ކުރަމުން ކަމަށް.
އަދާލަތު ޕާޓީގެ ނައިބު ލީޑަރު އަލީ ޒާހިރު ވިދާޅުވީ ކޯޓު އަމުރުގައި ބުނެފައިވާ މީހުން މިނިވަން ނުކޮށް ތިބުމަކީ އެ ބޭފުޅުން ރަހީނުކުރުން ކަމަށް
ފުލުހުންގެ ތެރޭގައި ކަންކަން ސިޔާސީ ނުކުރުމަށާއި ޣައިރު ގާނޫނީ އަމުރުތަކަށް ތަބާ ނުވުމާ ބެހޭ ގޮތުން ރިޔާޒް ވާހަކަ ދެއްކެވި.
ރިޔާޒް ވިދާޅުވީ ކޯޓުގެ އަމުރު ތަންފީޒު ކުރުމަށް އެކްޒެކަޓިވް ބޯޑުންނާއި ގާނޫނީ ޓީމުން ނިންމިކަން އެނގިވަޑައިގެންފައިވާ ކަމަށް. އެގޮތަށް ނިންމީ އިއްޔެ ޕޮލިސް ކޮމިޝަނަރުކަމުގެ މަގާމުން ދުރުކުރި އަރީފް އިންނަވައިގެން ކަމަށް ވިދާޅުވި.
ޖޭޕީގެ ޑެޕިއުޓީ ލީޑަރު، ކިނބިދޫ ދާއިރާގެ މެންބަރު އަބްދުﷲ ރިޔާޒް: ރައީސް ޔާމީނަށް ޖެހިވަޑައިގަންނަވާނީ ސުޕްރީމް ކޯޓުގެ އަމުރަށް ތަބާވާން. ގާނޫނު ނެގެހެއްޓުމުގެ އެންމެ ބޮޑު ޒިންމާއެއް ސަލާމަތީ ހިދުމަތްތަކަށް އޮންނައިރު އެ ފަރާތްތަކުން ވެސް ރައީސަށް އެގޮތަށް ދަންނަވަން ޖެހޭނެ ކަމަށް ދެކެން.
އިބޫ ވިދާޅުވީ ސުޕްރީމް ކޯޓުގެ އަމުރާ ބެހޭ ގޮތުން ފަނޑިޔާރުންނާ މަޝްވަރާކޮށްފައިވާ ކަމަށް ސަރުކާރުން ބުނި ކަމުގައި ވިޔަސް އެއީ ދޮގެއް ކަމަށް. އަދި އަމުރު ތަންފީޒު ކުރުމަށް ރައްޔިތުން މާލެ އައުމަށާއި އެކުވެރި ގައުމުތަކާއި ޖަމާއަތްތަކުން އެހީވުމަށް ވެސް އެދިވަޑައިގެންނެވި.
ހިންނަވަރު ދާއިރާގެ މެންބަރު އިބްރާހިމް މުހައްމަދު ސޯލިހް (އިބޫ) ސުޕްރީމް ކޯޓުގެ އަމުރުގައިވާ ކަންކަން ތަފްސީލްކޮށްދެެއްވަނީ.
އިދިކޮޅު ޕާޓީތަކުގެ ލީޑަރުންގެ ފަރާތުން ކުނޫޒްގައި ނޫސްވެރިންނާ ބައްދަލުކުރަނީ.
އެމްޑީޕީން ބޭއްވި އެ ޕާޓީގެ ގައުމީ މަޖިލީހުގެ ޖަލްސާގައި ހުށަހެޅި ގަރާރު ފާސްކޮށް، ޖަލްސާ ނިންމާލައިފި. ގަރާރުގައި ވަނީ ކޯޓުގެ އަމުރު ތަންފީޒުކުރުމަށް ބާރު އެޅުމަށް ރަށްރަށުން މީހުން މާލެއަށް ޖަމާވުމަށް ގޮވާލަން.
ފުލުހުންގެ ނޫސްބަޔާން: ސުޕްރީމް ކޯޓުން ނެރުނު އަމުރާ ގުޅިގެން ބަންޑާރަ ނައިބާއި ޕްރޮސިކިއުޓާ ޖެނެރަލްގެ ލަފާގެ މަތިން ފުރިހަމަކުރަންޖެހޭ ގާނޫނީ އިޖުރާއަތުތައް ފުރިހަމަކުރުމަށް ފަހު ކޯޓުގެ އަމުރު ތަންފީޒު ކުރުމުގެ މަސައްކަތް މި އަންނަނީ ކުރަމުން.
ގައުމީ މަޖިލީހުގެ މެންބަރުން ގެންދަވަނީ ގަރާރަށް ތާއީދުކުރައްވައި ވާހަކަ ދައްކަވަމުން.
މަޖިލީހުގެ ކުރީގެ ރައީސް އަބްދުﷲ ޝާހިދު: ބާރުތައް ފެށިގެން އަންނަނީ ރައްޔިތުންގެ ކިބައިންކަން އަންގާލަން އެބަޖެހޭ. ސުޕްރީމް ކޯޓުން އަމުރު ނެރުމުން ރައީސަށް ހެއްދެވުނީ ގޯހެއް. ރައީސް ޔާމީނަކީ ކޯޓުގެ ހުކުމްތަކާ ބީރައްޓެހި ބޭފުޅެއް. އޭނާ ވެސް ވަނީ ރަށްރަށުން މާލެއަށް މީހުން ޖަމާވާން ގޮވާލާ ގަރާރަށް ތާއީދުކުރައްވާފައި.
އީވާ އަބްދުﷲ: ގައުމަށް އިންސާފު ހޯދައިދޭން މިއޮތީ ފުރުސަތު ލިބިފައި. ސުޕްރީމް ކޯޓުގެ ހުކުމް ތަންފީޒު ކުރަން އެންމެން މާލެ އަންނަންވީ.
އީވާ އަބްދުﷲ: އަޅުގަނޑުމެން މި ގޮވާލަނީ ސިފައިންނާއި ފުލުހުންނަށް އެހެން މުއައްސަަސާތަކަށް ވެސް، ސުޕްރީމް ކޯޓުގެ ހުކުމް ތަންފީޒު ކުރާށޭ. އެހެން ނޫނީ އެތިބެނީ ޖިނާއީ ކުށެއްގައި. އަޅުގަނޑުމެން އެ ފަރާތްތަކާ ދެކޮޅަށް ދައުވާ ކުރާނަން.
އީވާ އަބްދުﷲ: ރައްޔިތުންގެ މަޖިލީހުގެ ފުރަތަމަ ޖަލްސާ އަށް އަޅުގަނޑުމެން ވަންނާނަން. ރައީސް ޔާމީން ހިތޯބު ދެއްވަންޏާ ދެއްވަންވީ.
ޗެއާޕާސަން ހަސަން ލަތީފް ރިޔާސަތުގައި އިންނެވި މި ޖަލްސާ ކުރިއަށް ގެންދާނީ އެއް ގަޑިއިރަށް ކަމަށް، ޖަލްސާ ފެށުމުގެ ކުރިން ވަނީ އިއުލާނުކޮށްފައި. ގަރާރާ ބެހޭ ގޮތުން ވާހަކަ ދެއްކުމަށް ގައުމީ މަޖިލީހުގެ މެންބަރުންނަށް ވަނީ ފުރުސަތު ހުޅުވާލާފައި.
ޗެއާޕާސަންގެ ނައިބު އަލީ ނިޔާޒް ގަރާރު ހުށަހަޅުއްވަނީ: ގަރާރުގައި ގޮވާލަނީ ސުޕްރީމް ކޯޓުން ނެރުނު އަމުރު ތަންފީޒުކުރުމަށް ބާރު އެޅުމުގެ ގޮތުން ރާއްޖޭގެ ރަށްރަށުން ވީހާވެސް ގިނަ ބަޔަކު މާލެއަށް އައުމަށް.
އެމްޑީޕީގެ ގައުމީ މަޖިލީހުގެ ޖަލްސާއެއް ފަށައިފި.
އަބްދުއްރަހީމް ވިދާޅުވި ގޮތުގައި ޕްރެސް ކޮންފަރެންސުން ބައެއް މެންބަރުން ނުފެންނަނީ ޕާޓީ ތެރޭގައި މައްސަލައެއް ޖެހިގެން އުޅޭތީއެއް ނޫން. އެއީ އެ މެންބަރުންގެ އަމިއްލަ ބައެއް ކަންކަމާ ހެދި ބައިވެރިވެ ވަޑައިނުގެންނެވުނީ ކަމަށް ވިދާޅުވި.
އަބްދުއްރަހީމް: ނައިބު ރައީސް އަބްދުﷲ ޖިހާދު ހުންނެވީ ސާބިތުކަމާ އެކު ސަރުކާރާ އެކު. ވަޒީރެއްގެ ވެސް ނައިބު ރައީސްގެ ވެސް އެއްވެސް ހިތްހަމަނުޖެހުމެއް ނެތް.
އިސްލާމިކް މިނިސްޓަރު ޒިޔާދު ބާގިރު: ޝަރުއީ ހަމަތަކުގެ މަތިން އިންތިހާބުކޮށްފައި ހުރި ވެރިޔަކާ ދެކޮޅަށް ނިކުތުމަކީ ފާފަވެރި ވެދާނެ ކަމެއް ކަމަށް.
ޕީޕީއެމްގެ ނައިބު ލީޑަރު އަބްދުއްރަހީމް ވިދާޅުވީ ސަރުކާރުން ސިފައިންނާއި ފުލުހުންނަށް ޣައިރު ގާނޫނީ އަމުރު ނުކުރާނެ ކަމަށާއި ކޮންމެ ތަނަކުން ނެރުނު ކަމުގައި ވިޔަސް ޣައިރު ގާނޫނީ އަމުރަކަށް ކިޔަމަންވާން ނުޖެހޭނެ ކަމަށް.
ޕީޕީއެމްގެ ނޫސް ކޮންފަރެންސެއް ކުރިއަށް ދަނީ
އިދިކޮޅު ލީޑަރުން ދޫކޮށްލަން ސުޕްރީމް ކޯޓުން ނެރުނު އަމުރު ތަންފީޒު ކުރުމަށްޓަކައި ކުރަންޖެހޭ މަސައްކަތްތައް ކުރަމުން އަންނަ ކަމަށާއި އަދި އެ އަމުރާ ގުޅިގެން އެ ކޯޓަށް ހުށަހަޅަން ޖެހޭ ކަންކަން ހުށަހެޅުމަށް ތައްޔާރުވަމުންދާ ކަމަށް ޕްރޮސެކިއުޓާ ޖެނެރަލްގެ އޮފީހުން ބުނެފި.
އެކިއެކި ކުށްތަކުގައި ހުކުމް ތަންފީޒު ކުރައްވަމުން ގެންދަވާ ސިޔާސީ އިދިކޮޅު ބޭފުޅުން ދޫކޮށްލުމަށް ސުޕްރީމް ކޯޓުން ކުރި އަމުރަށް ތަބާވުމަށް، ޔޫއެން. ހިއުމަން ރައިޓްސް ކޮމިޝަނުން ރާއްޖެއަށް ގޮވާލައިފި. އދ. އިން ބުނީ ރާއްޖޭގެ ހާލަތާ މެދު އެ ޖަމާއަތުން ކަންބޮޑުވުން ފާޅުކުރަމުން އަންނަތާ ގިނަ އަަހަރުތަކެއް ވެފައިވާ ކަމަށް. އެެހެންކަމުން ސުޕްރީމް ކޯޓުގެ ނިންމުމާއެކު، ރާއްޖޭގެ ހާލަތާއި ސަރުކާރާއި ސަލާމަތީ ބާރުތަކުން ކަންތައްތައް ކުރަމުންދާ ގޮތް ވަރަށް ގާތުން ބަލަމުން އަންނަ ކަމަށް ބަޔާނުގައި ވޭ.
ޕްރެސް ކޮންފަރެންސްގަައި ބައިވެރިވެ ވަޑައިގެންނެވި ހުރިހާ ވަކީލުން ވެސް ވިދާޅުވީ ސުޕްރީމް ކޯޓުން އަމުރެއް ކުރުމުން އިސްތިއުނާފުގެ އިތުރު މަރުހަލާއެއް ނޯންނާނެ ކަމަށާއި ވަގުތުން ވަގުތަށް އެ އަމުރު ޖެހޭނީ ތަންފީޒުކުރަން ކަމަށް.
ސުޕްރީމް ކޯޓުން އަމުރު ނެރުނު އިރު، އަމުރު ތަންފީޒުކުރުމަށް ހުރަސް އަޅައި ފަރުވާކުޑަކުރާ މީހުންނާ މެދު ދައުވާކުރުމަށް ބުނެފައި އޮތީ އެ އަމުރު ތަންފީޒު ނުކޮށްފާނެ ކަމަށް ނުވަތަ ހުރަސް އަޅާފާނެ ކަމަށް ވިސްނަވައިގެން: މަހްފޫޒު
ވަކީލް މަހްފޫޒް: ރައީސް ނަޝީދުގެ މައްޗަށް ކުރި ދައުވާ ބަދަލުކޮށް އަދި ހުކުމް ކުރީ ސިޔާސީ ނުފޫޒު ފޯރުވައިގެން ކަމަށް އަޅުގަނޑުމެން ބުނަމުން އައި ވާހަކަ ސުޕްރީމް ކޯޓުގެ އަމުރުން ވަނީ ސާބިތުވެފައި.
ސުޕްރީމް ކޯޓުގެ އަމުރާ ގުޅިގެން ސަރުކާރުގެ އަމަލުތައް ހުރި ގޮތުން ސަރުކާރުގެ ނިޔަތް ރަނގަޅު ނޫންކަން ވަރަށް ރަނގަޅަށް ހާމަވޭ: ރިފްއަތު
ވަކީލް އިބްރާހިމް ރިފްއަތު: ސުޕްރީމް ކޯޓުން ނެރުނީ މި ވަގުތު ގައުމަށް ވަރަށް މުހިންމު އަމުރެއް. އެއީ ރައްޔިތުންގެ މަޖިލީހުގެ މެންބަރުންތަކެއްގެ ގޮނޑިއާ މެދު ގާނޫނީ ސުވާލުތަކެއް އުފެދި ގިނަ ދުވަސްތަކެއް ވެފައި ވަނިކޮށް. ސުޕްރީމް ކޯޓުން ވަނީ ގާނޫނީ ސުވާލު އުފެދުނު ގަޒިއްޔާ ބާތިލްކޮށް، އެ މެންބަރުންގެ ގޮނޑި ނުގެއްލޭ ކަމަށް ބުނެފައި. ކުރިން ސުވާލު އުފެދިފައި އޮތް އިރު 12 މެންބަރެއްގެ ގޮނޑިއާ މެދު ސުވާލު އުފެދިގެން އެއްވެސް މުއައްސަސާއަކުން މަޝްވަރާކޮށްފައެއް ނުވޭ.
ވަކީލް ޝަފީގު: ސުޕްރީމް ކޯޓުގެ އަމުރާ މެދު މަޝްވަރާކުރާ ނަމަ އެކަން ކުރަން ޖެހޭނީ އެ އަމުރު ތަންފީޒު ކުރުމަށް ފަހު
ސުޕްރީމް ކޯޓުގެ އަމުރުގައި ބުނާ ނުވަ މީހުން ބަންދުގައި ބައިތިއްބަން ކޯޓު އަމުރެއް ނެތް. އެހެންވެ އެ މީހުން ވަގުތުން ދޫކޮށްލަން ޖެހޭނެ. ދޫކޮށްނުލައި ހޭދަވާ ކޮންމެ ވަގުތަކީ މިކަމުގައި ޝާމިލުވާ މީހުން ކުށްވެރިވާނެ ކަމެއް.
ވަކީލް ހުސައިން ޝަމީމް: ބަންދުން ދޫކޮށްލަން ސުޕްރީމް ކޯޓުން އަމުރުކުރި ނުވަ މީހުންގެ ހެބިއަސްކޯޕަސް މައްސަލަ ކްރިމިނަލް ކޯޓަށް ހުށަހަޅައިފިން. މިރޭ ކްރިމިނަލް ކޯޓުގައި މީގެ އަޑުއެހުމެއް އޮންނާނެ ކަމަށް ބެލެވޭ. މިފަދަ މައްސަލަތައް ކުރިއަށް ގެންދާނީ ބަންދުގައި ހުންނަ މީހާ ކޯޓަށް ހާޒިރުކޮށްގެން. ކޯޓު އަމުރުގައި ބުނާ ނުވަ މީހުންނާ ވަކީލުންނާ ބައްދަލު ކުރެވޭނެ ގޮތެއް ހަމަޖައްސައިދީފައެއް ނުވޭ.
އޮޅުން ނާރާ ގޮތަށް، ސާފުކޮށް ކޯޓުން ކަމެއް ލާޒިމް ކުރީމަ ދައުލަތުގެ ދުސްތޫރީ ނިޒާމު ހައިޖެކްކޮށްގެން ހުރުމަކީ ގާނޫނީ ކުށެއް.
ކޯޓު އަމުރަކުން މީހަކު ވަގުތުން ދޫކޮށްލަން އަމުރުކުރުމުން، އެކަމަށް މަޝްވަރާކުރުމަށް ކަމަށް ބުނެ ބަންދުކޮށްގެން ގެންގުޅުމަކީ ރަހީނު ކުރުމުގެ އަމަލެއް ކަމަށް ބެލެވިދާނެ. އަދި ގާނޫނުލް އުގޫބާތުގައި ބުނާ ގާނޫނު ތަންފީޒުކުރަން ހުރަސްއެޅުމުގެ އަމަލަކަށް ވެސް ވެދާނެ.
ކޯޓުން ވަކި ކަމެއް ވަކި ގޮތަކަށް ކުރުމަށް ވަކި ބަޔަކަށް އަމުރު ކުރުމުން އެއަށް އަމަލު ނުކޮށެއް ނުތިބެވޭނެ. މިކަމުގައި އިތުރު މަރުހަލާއެއް ނޯންނާނެ. ސަރުކާރުން އެ ދައްކަނީ ގާނޫނީ ގޮތުން ގަބޫލުކުރެވޭ ވާހަކަތަކެއް ނޫން.
ވަކީލް ހިސާން ހުސައިން: ސުޕްރީމް ކޯޓުގެ އަމުރުގައި، ފާހަގަކޮށްފައިވާ ސިޔާސީ ފަރާތްތަކުގެ ނަންނަތަކަކީ އެ ބޭފުޅުންގެ ޝަރީއަތްތަކާ މެދު މިއަދު ސުވާލު އުފެދިގެން އުޅޭ ކަންކަމެއް ނޫން. އެއީ ރާއްޖޭގެ ގާނޫނު އަސާސީ އާއި ގާނޫނުތަކާއި ބައިނަލްއަގުވާމީ ގާނޫނުތަކާ ވެސް ޚިލާފަށް ކޮށްފައިވާ ހުކުމްތަކެއް ކަމަށް ކުރިން ވެސް އަޅުގަނޑުމެން އައީ ބުނަމުން.
އިދިކޮޅު ހަރަކާތުގެ ފަރާތުން ވަކީލުންގެ ޕްރެސް ކޮންފަރެންސް ފަށައިފި
އެކިއެކި ކުށްތަކުގައި ހުކުމް ތަންފީޒު ކުރައްވަމުން ގެންދަވާ ސިޔާސީ އިދިކޮޅު ބޭފުޅުން ދޫކޮށްލުމަށް ސުޕްރީމް ކޯޓުން ކުރި އަމުރު އެއްވެސް ޝަރުތެއް ނެތި ވީ އެންމެ އަވަހަކަށް ދިވެހި ސަރުކާރުން ތަންފީޒު ކުރާނެ ކަމަށް އުއްމީދު ކުރައްވާ ކަމަށް އިނގިރޭސި ވިލާތުން ރާއްޖެ އަށް ކަނޑައަޅާފައި ހުންނަވާ ސަފީރު ޖޭމްސް ޑޯރިސް ވިދާޅުވެއްޖެ. ޑޯރިސް ކުރެއްވި ޓްވީޓެއްގައި ވިދާޅުވީ، ސުޕްރީމް ކޯޓުގެ ނިންމުމާއެކު ރާއްޖޭގެ ޝަރުއީ ދާއިރާ މިނިވަން ވާނެ ކަމަށް އުއްމީދު ކުރައްވާ ކަމަށް.
އަނިލް ފާހަގަކުރެއްވި ގޮތުގައި، އަމުރާ ގުޅޭ ކަންކަން ކުރިއަށް ގެންދަވާނީ ޑިއު ޕްރޮސެސްގެ ތެރެއިން ކަމަށް އުއްތަމަ ފަނޑިޔާރު ވިދާޅުވި. އަދި ފުލުހުންނާއެކު ޕީޖީ ވަރަށް އަވަހަށް މަޝްވަރާ ކުރައްވައި، ގާނޫނީ ކަންބޮޑުވުންތައް އުއްތަމަ ފަނޑިޔާރާ ހިއްސާ ކުރައްވާނެ ކަމަށް އަނިލް ވިދާޅުވި.
މި ނިއުސް ކޮންފަރެންސްގައި އެޓާނީ ޖެނެރަލް އަނިލް ވިދާޅުވީ، ސުޕްރީމް ކޯޓުގެ އަމުރުގައި ވާ ކަންބޮޑުވުންތަކާ ގުޅޭ ގޮތުން އުއްތަމަ ފަނޑިޔާރު އަބްދުﷲ ސައީދާ ސީދާ މަޝްވަރާ ކުރައްވާފައިވާ ކަމަށް. އަދި ޕްރޮސެކިއުޓާ ޖެނެރަލް އައިޝަތު ބިޝާމް ފާހަގަކުރައްވާ ގާނޫނީ ކަންބޮޑުވުންތައް އުއްތަމަ ފަނޑިޔާރަށް ހުށަހަޅުއްވާނެ ކަމަށް އަނިލް ވިދާޅުވި.
ސަރުކާރުގެ ޕްރެސް ކޮންފަރެންސެއް ފަށައިފި
އެމްޑީޕީގެ ހަރުގެ ކައިރިން ދެ މީހަކު ހައްޔަރު ކޮށްފައިވާއިރު، އާންމުންނާއި ފުލުހުންނާ ދެމެދު ހަމަނުޖެހުންތަކެއް ވަނީ ހިނގާފައި. ހަމަނުޖެހުން ހިނގި ވަގުތު، އިދިކޮޅު މީހުން ކޮންޓްރޯލް ކުރުމަށް ފުލުހުން ޕެޕާ ސްޕްރޭ ޖެހި މަންޒަރު ވެސް ފެނިފައިވޭ.
އެމްޑީޕީގެ ހަރުގެ ކައިރިއަށް އެއްވެ އިދިކޮޅު ފަރާތްތަކުން އަޑުގަދަ ކުރަނީ ސުޕްރީމް ކޯޓުގެ އަމުރު ތަންފީޒު ކުރުމަށާއި ގާނޫނުއަސާސީ އަށް ހުރުމަތްތެރިކޮށް ހިތުމަށް.
އެމްޑީޕީގެ ހަރުގެ ކައިރިއަށް އިދިކޮޅު ފަރާތްތަކުން އެއްވެފައިވާއިރު، އެތަނަށް އެސްއޯ ފުލުހުން ގޮސް އާންމުން ފޮނުވާލުމުގެ މަސައްކަތް ފަށައިފި.
ޕީޕީއެމްގެ ޕްރެސް ކޮންްފަރެންސް ނިންމާލައިފި
ޕީޕީއެމްގެ ނައިބު ރައީސް އަބްދުއްރަހީމް: އިދިކޮޅު ފަރާތްތަކުން ވަރަށް ފާޑުފާޑުގެ ވާހަކަތައް އެބަ ދައްކާ. ކެބިނެޓް އޮތީ ވަރަށް ބަދަހިކޮށް. އަޅުގަނޑު ދަންނަވާލާނީ ޕީޕީއެމްގެ ޕާލަމެންޓްރީ ގުރޫޕުގެ އެއްވެސް ބޭފުޅަކު މަހުލޫފަކާ ވާހަކައެއް ނުދައްކާ. ކެބިނެޓްގެ އެކަކު ވެސް އިސްތިއުފާއެއް ވެސް ނުދެއްވާ. ރައީސް ވަރަށް ކެރިގެން އެ ވިދާޅުވޭ މަގު ހޯއްދަވައިދެއްވާނަމޭ.
ޕީޕީއެމްގެ ނައިބު ރައީސް އަބްދުއްރަހީމް: އިދިކޮޅު ފަރާތްތަކުން ފެށުނީއްސުރެ ދަނީ ސަރުކާރުން ވައްޓާލަން މަސައްކަތް ކުރަމުން. ހަގީގަތަކީ މަގުމަތި ހަލަބޮލިކުރަން އެ ބޭފުޅުން ކުރި މަސައްކަތް ކާމިޔާބެއް ނުވި އިއްޔެ ވެސް.
ޕީޕީއެމްގެ ނައިބު ރައީސް އަބްދުއްރަހީމް: ގައުމުގެ ސިޔާސީ މަސްރަހު ގޯހެއް ނޫން. އަޅުގަނޑު ގަބޫލެއް ނުކުރަން ސިޔާސީ މަސްރަހަށް ބަދަލެއް އަތުވެއްޖެ ކަމަކަށް.
އެމްޑީއޭގެ ނައިބު ލީޑަރު އަލީ މައުރޫފު: އަލުގަނޑުމެންގެ ސްޓޭންޑަކީ ޕީޕީއެމާ އެކު އަބަދު ވެސް ތިބުން. ދިވެހި ސަރުކާރުގެ ދިފާއުގައި ކުރަން ޖެހުނު ކޮންމެ ކަމެއް އަޅުގަނޑުމެން ކުރާނެ. އަޅުގަނޑުމެންގެ ދެ ޕާޓީއަކީ ވެސް ސުލްހަ އަށް ލޯބިކުރާ ދެ ޕާޓީ. މަގުމަތިން ގާނޫނީ ސަރުކާރެއް ވައްޓާލާކަށް، ބަގާވާތެއް ކުރާކަށް އަޅުގަނޑުމެން ފުރުސަތެއް ނުދޭނަން.
ޕީޕީއެމްގެ ނައިބު ރައީސް އަބްދުއްރަހީމް: ރައްޔިތުންގެ މަޖިލީހުގެ ޖަލްސާތައް ހިނގާނެ ގޮތެއް އިދިކޮޅު ފަރާތްތަކަކަށް ނޭނގޭނެ. މަޖިލިސް ތެރެއިން އިދިކޮޅު ފަރާތްތަކަށް މާ ބޮޑު ކަމެއް ނުވާނެ. އަޅުގަނޑުމެންގެ އަތުގައި މި ވަގުތު ވެސް މެޖޯރިޓީ އެބައޮތް.
ފިޝަރީޒް މިނިސްޓަރު މުހަންމަދު ޝައިނީ: މިއީ މި ސަރުކާރަށް ދިމާވި ފުރަތަމަ ކަމެއް ނޫން. މީގެ ކުރިން ވެސް މިފަދަ ކަންތައްތަކުން ރައީސް ޔާމީން ވަނީ ކުރިއެރުން ހޯއްދަވާފައި. ރައީސް ޔާމީން އަބަދުވެސް ވިދާޅުވަނީ ގާނޫނުގެ ކުރިމަތީގައި އެންމެން ހަމަހަމަ ބައެއް.
އިކޮނޮމިކް މިނިސްޓަރު މުހަންމަދު ސައީދު: ރައީސް ޔާމީނަކީ ގައުމީ ބަތޮލެއް. ރައީސް ޔާމީނަކީ މި ގައުމު އަމާން ބަނދަރަކަށް ގެންގޮސްދޭނެ ބަތޮލެއް. މިއީ ތަރައްގީ އަށް ހަސަދަ ވެރިވާ ބައެއްގެ ރޭވުން.
ޕީޕީއެމްގެ ނައިބު ރައީސް މޫސާ ޒަމީރު: މި ހުކުމަކީ ސަރުކާރު ހިންގުމަށް އޮތް ހުރަހެއް ނޫން.
މި ބައްދަލުވުމުގައި ސަރުކާރުގެ ވަޒީރުންނާއި ޕީޖީ ގުރޫޕުގެ މެމްބަރުން ބައިވެރިވޭ
ޕީޕީއެމްގެ ނައިބު ރައީސް މޫސާ ޒަމީރު: ޕާޓީ އޮތީ ރައީސް ޔާމީންގެ ފަހަތްޕުޅުގައި. އަޅުގަނޑުމެން އަދިވެސް ދާނީ ރައީސް ޔާމީންގެ ތަރައްގީ ފުރިހަމަ ކުރުމަށް.
ޕީޕީއެމްގެ ނައިބު ރައީސް އަބްދުއްރަހީމް: ދިމާވެގެން އުޅޭ މައްސަލައަކީ އިދިކޮޅު ފަރާތްތަކުން ވެރިކަން ބޭނުންވެގެން މިއުޅެނީ. މި ވަގުތަކީ ރައްޔިތުން ސާބިތުކަން ދައްކަންވީ ވަގުތު. ރައްޔިތުން ކަންބޮޑުވެ ވަޑައިގަންނަވާނެ ކަމެއް ނެތް. ރައީސް ޔާމީން ހުންނެވީ ރައްޔިތުންގެ ހައްގުގައި ގުރުބާންވާން.
ޕީޕީއެމްގެ ނައިބު ރައީސް އަބްދުއްރަހީމް: ސަރުކާރުގެ، ސިފައިންގެ އަދި ދައުލަތުގެ އެންމެ މަތީވެރިޔަކީ ރައީސް. އެ ވާޖިބު އަދާކުރައްވަން އެމަނިކުފާނު ފަސްޖެހިވަޑައެއް ނުގަންނަވާނެ.
ޕީޕީއެމްގެ ނައިބު ރައީސް އަބްދުއްރަހީމް: ސުޕްރީމް ކޯޓުގެ ހުކުމާ ބެހޭ ގޮތުން ދަންނަވާނެ އެއްޗެއް ނެތް. ރައީސް ޔާމީންގެ ސަރުކާރު ވެއްޓޭނެ އެއްވެސް ވާހަކައެއް ހުކުމަކު ނެތް.
ޕީޕީއެމްގެ ނައިބު ރައީސް އަބްދުއްރަހީމް: ރައީސް ޔާމީނަކީ މި ކަހަލަ ކަންތައްތަކުގައި ވަރަށް ވިސްނުންތެރިކަމާ އެކު ކަންތައް ކުރައްވާ ބޭފުޅެއް. އަޅުގަނޑުމެންގެ މިއަދުގެ ބޭނުމަކީ ރައްޔިތުންނަށް ޔަގީންކަން އަރުވަން އަޅުގަނޑުމެން މިތިބީ ސާބިތުކަން މަތީގައި.
ޕީޕީއެމްގެ ނައިބު ރައީސް އަބްދުއްރަހީމް: ގައުމު ދޫކޮށްލައްވާފައި ވަޑައިގަންނަވާ ރައީސަކަށް ރައީސް ޔާމީން ވެ ވަޑައެއް ނުގަންނަވާނެ
ޕީޕީއެމްގެ ޕްރެސް ކޮންފަރެންސް ކުރިއަށް ދަނީ
ފުލުހުން ދެންމެ ކުރި ޓުވީޓެއްގައި ބުނީ، ފުލުހުން ރޭ ހިންގި އޮޕަރޭޝަންގައި ފުލުހެއްގެ ބޮލުގައި ގަލަކުން ޖެހި އަނިޔާވެފައިވާ ކަމަށް. ޕޮލިސް ސާޖަންޓް އަސްއަދު އަބްދުލް މުހުސިންގެ ބަލަށް ވި، އެ އަނިޔާގައި އިންޓާނަލް ބްލީޑިންއެއް ހުރުމުގެ ސަބަބުން، މިހާރު އޭޑީކޭ ހޮސްޕިޓަލްގައި ސާޖަރީއެއް ހަދަމުންދާ ކަމަށް ފުލުހުން ބުނޭ.
ޖަލު ހުކުމް އިއްވާފައިވާ ސިޔާސީ ލީޑަރުންނާއި ސިޔާސީ އެހެން ބޭފުޅުން ދޫކޮށްލުމަށް ރޭ ސުޕްރީމް ކޯޓުން ނެރެފައިވާ އަމުރަށް ދިވެހި ސަރުކާރުން އަމަލު ކުރުމަށް އިންޑިއާގެ ސަރުކާރުން ގޮވާލައިފި. އިންޑިއާގެ އެކްސްޓާނަލް އެފެއާޒުން ނެރުނު ނޫސް ބަޔާނެއްގައި ބުނީ ސިޔާސީ މީހުން ދޫކޮށްލުމަށް ސުޕްރީމު ކޯޓުން ނެރުނު އަމުރު ފެނިފައިވާ ކަމަށާއި ޑިމޮކްރަސީގެ ރޫހާ އެއްގޮތަށް، އަދި ގާނޫނު ނެގެހެއްޓުމަށް ސަރުކާރުގެ ހުރިހާ މުއައްސަސާތަކަކުން ވެސް އެއަށް އަމަލު ކުރުން މުހިއްމު ކަމަށް. އިންޑިއާއިން ބުނެފައިވާ ގޮތުން، ރާއްޖޭގެ ހާލަތު އެ ގައުމުން ކައިރިން ބަލަމުން ދާނެ. އަދި ގާތް އަވައްޓެރި ގައުމެއްގެ ހައިސިއްޔަތުން ރާއްޖޭގައި އަމާން ވެއްޓެއް ގާއިމް ވެފައި އޮންނަ ތަން ދެކެން ބޭނުންވާ ކަމަށް އިންޑިއާއިން ބުނޭ.
ޕީޕީއެމްގެ އިސްބޭފުޅުންގެ ބައްދަލުވުމެއް އެ ޕާޓީގެ އޮފީހުގައި ފަށައިފި. މި ބައްދަލުވުމުގައި ބައެއް ވަޒީރުންނާއި ރައްޔިތުންގެ މަޖިލީހުގެ ޕީޕީއެމްގެ ބައެއް މެމްބަރުން ބައިވެރިވެވަޑައިގަންނަވާ.
ސުޕްރީމް ކޯޓުން ރޭ ނެރުނު އަމުރުގެ އިނގިރޭސި ތަރުޖަމާ ވެސް ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަނުން މިއަދު ވަނީ އާންމުކޮށްފައި. އެހެން އަމުރުތަކާ ޚިލާފަށް މި އަމުރުގެ އިނގިރޭސި ތަރުޖަމާ މި އާންމުކުރީ، ސުޕްރީމް ކޯޓުގެ ފަސް ފަނޑިޔާރުންގެ އިއްތިފާގުން ނެރުނު އަމުރާ މެދު ދިވެހި ސަރުކާރުގެ ބައެއް އިސް ބޭފުޅުން ސުވާލު އުފައްދަވައި، މި މައްސަލާގައި ސަރުކާރުން ބޭރުގެ ފަރާތްތަކަށް އަމާޒުކޮށް އިނގިރޭސި ބަހުން ބަޔާންތައް ނެރެމުންދާ ދަނޑިވަޅެއްގައި.
ކުރީގެ ރައީސް މުހައްމަދު ނަޝީދާއި ޖުމްހޫރީ ޕާޓީގެ ލީޑަރު ގާސިމް އިބްރާހީމާއި އަދާލަތު ޕާޓީގެ ރައީސް އިމްރާން އަބްދުﷲ އާއި ކުރީގެ ޑިފެންސް މިނިސްޓަރު މުހައްމަދު ނާޒިމާއި ދިއްގަރު ދާއިރާގެ މެމްބަރު އަހުމަދު ފާރިސް މައުމޫނާއި ކުރީގެ ނައިބު ރައީސް އަހުމަދު އަދީބާއި ކުރީގެ ޕްރޮސިކިއުޓާ ޖެނެރަލް މުހުތާޒް މުހުސިނާއި އދ. މާމިގިލީ ކޯޓުގެ އިސް މެޖިސްޓްރޭޓް އަހުމަދު ނިހާންގެ އިތުރުން ވިޔަފާރިވެރިޔާ ހާމިދު އިސްމާއިލް (ހާމިދު ސޭޓް) މިނިވަން ކުރުމަށް ސުޕްރީމް ކޯޓުން ކަމާ ގުޅޭ މުއައްސަސާތަކަށް އަމުރުކޮށްފައިވީ ނަމަވެސް، މިހާތަނަށް އެކަން ތަންފީޒު ނުކުރާތީ ވަނީ ސަރުކާރަށް ފާޑުކިޔުންތައް އަމާޒުވެފައި. އިދިކޮޅު ހަރަކާތުގެ އިސް ބޭފުޅުން ތަފާތު ފޯރަމްތަކުގައި، އެކަން ތަންފީޒު ކުރުމަށް ސަރުކާރަށް ގޮވަމުން ދިޔަ ނަމަވެސް ސަރުކާރުން ބުނަނީ ސުޕްރީމް ކޯޓުގެ އަމުރު ދިރާސާ ކުރަމުން އަންނަ ކަމަށް. ފުލުހުން ބުނެފައި ވަނީ ސުޕްރީމް ކޯޓުގެ އަމުރު ތަންފީޒު ކުރުމަށްޓަކައި ކުރަންޖެހޭ ކަންކަން ކުރަމުން އަންނަ ކަމަށް. މޯލްޑިވްސް ކަރެކްޝަނަލް ސާވިސްއިން ރޭ ދަންވަރު ބުނެފައި ވަނީ، އެ އަމުރު ތަންފީޒު ކުރުމަށް ފުރިހަމަ ކުރަންޖެހޭ އިޖުރާއަތުތައް ފުރިހަމަ ކުރުމުގެ މަސައްކަތް އެ އިދާރާއިން ކުރާ ކަމަށް.
ސުޕްރީމް ކޯޓުގެ އަމުރުގައިވާ ގޮތުގެ މަތިން، ސިޔާސީ ބޭފުޅުން ދޫކުރުން ލަސްވާތީ މާލޭގެ އެކި ސަރަހައްދުތަކުގައި އިދިކޮޅު ހަރަކާތުގެ އެއްވުންތައް އަދި ފުލުހުންނާ ދެމެދު ރޭ ހަމަނުޖެހުންތައް ހިނގި ނަމަވެސް މިވަގުތު މާލެ އޮތީ ވަރަށް އޮމާންކޮށް. ޖުމްހޫރީ މައިދާން ހިމެނޭ ސަރަހައްދު ވެސް ހުޅުވާލާފައިވާއިރު، އިދިކޮޅު ހަރަކާތުގެ މައި ޖަގަހަ މ. ކުނޫޒަށް އެއްވެފައ ތިބި ބަޔަކު ފިޔަވައި އިތުރު މީހުންތަކެއް މަގުމަތިން ފެންނާކަށް ނެތް.
ސުޕްރީމް ކޯޓުގެ ފަސް ފަނޑިޔާރުންގެ އިއްތިފާގުން ނެރުނު އަމުރު ތަންފީޒު ކުރުމަށް ސިފައިންނާއި ފުލުހުން އަދި ކަމާ ގުޅޭ މުއައްސަސާތަކަށް ކުރީގެ ރައީސް މައުމޫން އަބްދުލް ގައްޔޫމް އަނެއްކާވެސް ގޮވާލައްވައިފި. އެމަނިކުފާނު ވިދާޅުވީ، ގާނޫނު ދެމެހެއްޓުމާއި ގައުމުގެ ސަލާމަތާއި ހަމަޖެހުމަށްޓަކައި، ސުޕްރީމް ކޯޓުގެ އަމުރުގައިވާ ހުރިހާ ކަންކަން ތަންފީޒު ކުރުމަށް ގޮވާލައްވާ ކަމަށް.
ދެންމެއަކު ފުލުހުން ކުނޫޒަށް ވަދެ އެ ތަނުގަ ތިބި މީހުންގެ ތެރެއަށް ޕެޕަސްޕްރޭ ޖަހައި މީހުންތައް ފޮނުވާލަން ފަށައިފި
ސުޕްރީމް ކޯޓުގެ އަމުރުގައި މިނިވަންކުރަން ބުނެފައިވާ ސިޔާސީ ބޭފުޅުންނާ ހަވާލުވުމަށް މާލޭ ޖަލަށް ގޮސް ތިބި އެ އާއިލާތަކުގެ މީހުން އެތަނުން ނުކުތުމަށް ކަރެކްޝަންސްގެ އޮފިސަރުން އަންގައިފި. އެ ތަނުން ބުނީ ކޮންމެ އާއިލާއަކުން ވެސް ހުރެވޭނީ އެކަކަށް ކަމަށް
މަހްލޫފް: ސަރުކާރުން ސުޕްރީމް ކޯޓުގެ އަމުރު ތަންފީޒު ކުރަންދެން އަޅުގަނޑުމެން މަގުމަތީގައި ތިބޭނަން. އިދިކޮޅު ފަރާތްތަކުން ކުރަމުން މިދާ މަސައްކަތް ކާމިޔާބު ކުރާނެ
މަހްލޫފް: ރަށްރަށުން މީހުން ދަނީ މާލެ އަންނަމުން. މިކަމުގައި ބައިވެރިވުމަށް ރާއްޖޭގެ އެކި ކަންކޮޅުތަކުން މީހުން އަންނަންޖެހޭ
ގުޅިފައިވާ އިދިކޮޅު ފަރާތްތަކުން ބާއްވާ ނޫސްވެރިންގެ ބައްދަލުވުން ކުނޫޒުގައި މިހާރު ފަށައިފި. މައުލޫމާތު ދެއްވަނީ ގަލޮޅު ދެކުނު ދާއިރާގެ މެމްބަރު އަހްމަދު މަހްލޫފް
ގުޅިފައިވާ އިދިކޮޅު ފަރާތްތަކުން ބާއްވާ ނޫސްވެރިންގެ ބައްދަލުވުމެއް ފެށުމަށް މިހާރު ތައްޔާރުވެއްޖެ. މި ބައްދަލުވުން އޮންނާނީ ޖުމްހޫރީ ޕާޓީގެ މައި ޖަގަހަ މ. ކުނޫޒުގައި. އިރުކޮޅެއްގެ ތެރޭގައި މި ބައްދަލުވުން ފެށޭނެ
އަދާލަތު ޕާޓީ: ކަރެކްޝަނަލް ސާވިސް އިން ވަނީ ރައީސް ޔާމީންގެ އަމުރަށް އަދާލަތު ޕާޓީގެ ރައީސް ޝައިޚް އިމްރާން އަބްދުﷲ ރަހީނު ކޮށްފައި. ސުޕްރީމް ކޯޓުގެ އަމުރު ތަންފީޒު ކުރާނެ ކަމަށް ބުނީ އޮޅުވާލަން. އަމުރު ތަންފީޒު ނުކުރަނީ އެކަން ކުރުމުގެ ނިޔަތެއް ނެތުމުން. އިހުމާލުވާ ފަރާތްތަކާ މެދު ގާނޫނީ ފިޔަވަޅު އެޅޭނެ. ޝައިޚް އިމްރާން މިނިވަން ކުރޭ!
ކުނޫޒު ދޮށަށް އެއްވެ ތިބި މީހުން އެ ސަރަހައްދު ދޫކޮށް ދިޔުމަށް އެ ތަނުގައި ތިބި އެސްއޯ ފުލުހުން މިހާރު ދަނީ އަންގަމުން
ސުޕްރީމް ކޯޓުގެ އަމުރަށް ތަބާނުވާ މައްސަލާގައި ބަންޑާރަ ނައިބު މުހައްމަދު އަނިލްއާ މެދު ފިޔަވަޅުއަޅައިދޭން އެދި ޖުމްހޫރީ ޕާޓީން ސުޕްރީމް ކޯޓަށް ސިޓީއެއް ފޮނުވައިފި.
ސުޕްރީމް ކޯޓުގެ އަމުރުގައި ބުނެފައިވާ ސިޔާސީ ބޭފުޅުން ދޫކުރުން ލަސްވާތީ، އިދިކޮޅު ހަރަކާތުގެ ބައެއް އިސް ބޭފުޅުން މާލޭ ޖަލަށް ވަޑައިގެންފި. ފުލުހުން ދެންމެ ޓީވީއެމްގައި ބުނީ ކޯޓު އަމުރު ތަންފީޒު ކުރުމަށް ޓަކައި ކުރަން ޖެހޭ މަސައްކަތް ކުރަމުން އަންނަ ކަމަށް.
އަބްދުއްރަހީމް އަބްދުﷲ (ޕީޕީއެމްގެ ނައިބު ރައީސް): ރައީސް ޔާމީން ހުންނެވީ ސާބިތުކަންމަތީގައި. އަޅުގަނޑުމެންނަކީ އަބަދުވެސް ޝަރުއީ ނިޒާމަށް އިހުތިރާމް ކުރާ ބައެއް. ސުޕްރީމް ކޯޓުގެ އަމުރާ މެދު ޕީޕީއެމަށް ވަކި އެއްޗެއް ބުނެވޭނީ ބަންޑާރަ ނައިބު ސާފު ކުރައްވާ ކަންކަން ސާފުކުރައްވައި ނިންމެވުމުން. މުޅި ގައުމުގެ މަސްލަތާއި ސަލާމަތާއި ރައްކާތެރި ކުރުމުގެ ހުރިހާ ޒިންމާއެއް ރައީސް އަދާކުރައްވާނެ ކަމުގެ ޔަގީންކަން އެބައޮތް.
އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ނަވާޒް: ކޯޓު އަމުރު ތަންފީޒު ކުރުމަށް ޓަކައި ކުރަން ޖެހޭ މަސައްކަތް މި ދަނީ ކުރަމުން. އަދި ސަލާމަތާއި ރައްކާތެރި ކަމަށް އެޅެން ހުރި ހުރިހާ ފިޔަވަޅެއް އަޅާނެ ވާހަކަ ދަންނަވަން.
އަލީ އާރިފް (ޕީޕީއެމްގެ ތަރުޖަމާން): ގާނޫނުއަސާސީގެ ހުރިހާ ކަމަކަށް ޕީޕިއެމުން ހުރުމަތްތެރިކޮށް ހިތާނެ. އަޅުގަނޑުމެން މިތިީ ރައީސް ޔާމީންގެ ފަހަތްޕުޅުގައި. ގާނޫނުއަސާސީ ބުނާގޮތުން ދައުލަތުގެ އެންމެ މަތީ ވެރިއަކީ ރައީސުލްޖުމްހޫރިއްޔާ ކަަމަށް ވާއިރު، މުޅި ދައުލަތުގެ މަސްލަހަތު ހިމާޔަތް ކުރައްވަން އެމަނިކުފާނަށް ޖެހިވަޑައިގަންނަވާ. ވިއްސަކަށް މީހުންގެ މަސްލަހަތަށް ވުރެ މުޅި ގައުމުގެ މަސްލަހަތު ރައީސަށް މުހިންމު ވާނެ. ސުޕްރީމް ކޯޓުގެ އަމުރާ ބެހޭ ގޮތުން ޕީޕީއެމަށް ވަކި ބަހެއް ބުނެވޭނީ ދައުލަތަށް ކަންކަން ސާފުވުމުން. ދައުލަތުގެ މަސްލަހަތު ރައީސް ޔާމީން ހިމާޔަތް ކުރައްވާނެ ކަމުގެ ޔަގީންކަން ދެން. މުޅި ދިވެހި ރައްޔިތުންގެ މިނިވަންކަމާއި މަސްލަހަތު ހިމާޔަތް ކުރެއްވުމަށް ކުރައްވަންޖެހޭ ހުރިހާ ކަމެއް ރައީސް ޔާމީން ކުރައްވާނެ ކަމުގެ ޔަގީންކަން އެބައޮތް. އަޅުގަނޑުމެން އެންމެން މިތިބީ ރައީސް ޔާމީންގެ ފަހަތްޕުޅުގައި.
ފުލުހުންގެ ފަރާތުން ދެންމެ ނޫސްވެރިންނާ ވާހަކަ ދައްކަވަމުން އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ނަވާޒު ވިދާޅުވީ ސުޕްރީމް ކޯޓުގެ ހުކުމް ލިބިފައިވާ ކަމަށް.
ސަރުކާރުގެ ބަޔާން: ސުޕްރީމް ކޯޓުން ނެރުނު އަމުރު ދިރާސާކޮށް އިތުރަށް ސާފުކުރަންޖެހޭ ކަންކަން މި އަންނަނީ ބަލަމުން. މި އަމުރަކީ ގާނޫނު އަސާސީ އާއި ޖިނާއީ އިޖުރާއަތުގެ ގާނޫނާ ފުށުއެރުންތައް ހުރި އަދި ދައުލަތުގެ ފަރާތުން ބަންޑާރަ ނައިބު ނުވަތަ ޕްރޮސިކިއުޓާ ޖެނެރަލްގެ ވެސް ބަހެއް ނެތި ނެރެފައިވާ އަމުރެއް. އެހެންވެ ސުޕްރީމް ކޯޓުގެ ލަފާ ހޯދައި ގާނޫނީ އަމުރުތަކަށް ތަބާވުމަށް ކުރަންޖެހޭ ކަންކަން ކުރާނަން.
ދިއްދޫ ދާއިރާގެ މެމްބަރު އަބްދުއްލަތީފު: އެއްވެސް ޝަރުތެއް އަޅުގަނޑުމެންގެ އުންޏެއް ނުވޭ. އަދިވެސް އަޅުގަނޑުމެންނަކީ މެމްބަރުން. އިރާދަކުރެއްވިއްޔާ ދިވެހި ގައުމު އަމާން އައްސޭރިއަކަށް ގެންދަން އަޅުގަނޑުމެން މަސައްކަތް ކުރާނަން. މި ސަރުކާރު ނިމިގެން މި ދަނީ ގާނޫނުތަކާ ހިލާފަށް ކުރާ ކަންތައްތަކުގެ ސަބަބުން. އަޅުގަނޑުމެން އެތައް ފަހަރަކު އެދުނިން ރައީސަށް ކަންތައްތައް އިސްލާހު ކުރަން. ދެހާސް ތޭރަ ވަނަ އަހަރު ގެނައި ރައީސަކީ އުންމީދު ކުރި ކަހަލަ ރައީސެއް ނޫން.
އިހަވަންދޫ ދާއިރާގެ މުހަންމަދު އަބްދުﷲ: އަޅުގަނޑުމެން 12 މެމްބަރު މި ކުރީ ރައްޔިތުންގެ ހައްގުގައި މަސައްކަތެއް. އަޅުގަނޑުމެން މި ކުރި މަސައްކަތަކީ ގާނޫނީ މަސައްކަތެއް ކުރުމަށް އިތުރު ފުރުސަތެއް ލިބޭތޯ ކުރި މަސައްކަތެއް. އަޅުގަނޑުމެން ނެތި މަޖިލީހުގެ އެތައް ގާނޫނެއް ހަދައިފި. ބަޖެޓް ފާސްކޮށްފި. މަޖިލީސް ހުޅުވޭ ދުވަހު މަޖިލީހަށް ވަނުމަށް މިހާރު އެއްވެސް ހުރަހެއް ނެތް. މަޖިލީހުގެ ރައީސަށް ވެސް ދަންނަވާނީ އަޅުގަނޑުމެންނަށް ހުރަސް ނާޅުއްވާށޭ.
ތުލުސްދޫ ދާއިރާގެ އިބްރާހިމް ވަހީދު ވައްޑެ: ސުޕްރީމް ކޯޓުން އެ އޮތީ ވަރަށް ވަރުގަދަ އަމުރެއް ނެރެފައި. މިއޮތީ ދިވެހި ސަރުކާރަށް، ފުލުހުންނާއި ސިފައިންނަށް ވެސް އަދި ކަމާ ބެހޭ އެންމެހާ މުއައްސަސާތަކަށް ވެސް އަމުރުކޮށްފައި. އަޅުގަނޑުމެންގެ ރަސްމީ ވާޖިބަށް ހުރަސް އަޅައި ގޯނާތަކެއް ކޮށްފީމު. އެކަން ކުރީ ދައުލަތުގެ މުއައްސަސާއެއްގެ ނަމުގައި ވިޔަސް، އެކަމާ ބެހޭ ގޮތުން އަޅުގަނޑުމެން ގޮތެއް ނިންމާނަން.
ތިމަރަފުށީ ދާއިރާގެ މުހަންމަދު މުސްތޮފާ: މަޖިލީހުގެ އަމީންއާންމަށް އަޅުގަނޑު ގޮވާލަން އެއްވެސް ބިރެއް ގަންނާނެ ކަމެއް ނެތޭ.
ތިމަރަފުށީ ދާއިރާގެ މުހަންމަދު މުސްތޮފާ: އަޅުގަނޑުމެން އެންމެ ކުރިން ކުރާނެ ކަމަކީ ބަންޑާރަ ނައިބު މުހަންމަދު އަނިލް މަގާމުން ވަކިކުރުން. ދިވެހިރާއްޖޭގެ ސުޕްރީމް ކޯޓަކަށް ގޮންޖެހޭނެ އެއްވެސް ބަޔަކު ނޯންނާނެ.
ތިމަރަފުށީ ދާއިރާގެ މުހަންމަދު މުސްތޮފާ: އަލްހަމްދުލިއްލާހް... އޭރު ވެސް މިހާރު ވެސް އަޅުގަނޑުމެން މިއީ މެމްބަރުން. އަޅުގަނޑުމެން މިތިބީ ހިކިފަސްތަނަކަށް އަރާ. އަޅުގަނޑުމެން ކަނޑުލީ ލައިފް ޖެކެޓެއް ވެސް ނުދީ. މަޖިލީހުގެ ރައީސަށާއި އަމީން އާންމަށް ގޮވާލަން އަޅުގަނޑުމެން ނުލައި އެއްވެސް ޖަލްސާއެއް ނުބޭއްވުމަށް.
މަޑުއްވަރީ ދާއިރާގެ މުހަންމަދު އަމީތު: އަޅުގަނޑުމެން ވަރަށް ބޮޑަށް ޝުކުރު އަދާކުރަން ހަތަރު ލީޑަރުންނަށް. އަޅުގަނޑު މި ހުރީ ﷲ ގަންދީ ކުރި ހުވަޔާ އެއްގޮތަށް. މި ވަގުތުން ފެށިގެން އަޅުގަނޑުމެންގެ ގާނޫނީ ވާޖިބު އަދާކުރުމަށް ރައްޔިތުންގެ މަޖިލީހުން އެއްވެސް ހުރަހެއް އަޅައިގެން ނުވާނެ.
މ. ކުނޫޒްގައި ބާއްވާ ނޫސްވެރިންގެ ބައްދަލުވުމުގައި މާލޭގައި މި ވަގުތު ތިއްބެވި ގިނަ މެމްބަރުން އެބަތިއްބެވި.
ގޮނޑި ގެއްލުނު މެމްބަރުންގެ ނޫސްވެރިންގެ ބައްދަލުވުން ފަށައިފި
އެސްއޯ ފުލުހުން މިހާރު ދަނީ އެމްޑީޕީގެ ހަރުގެ ތެރެއަށް ވަދެ، އެތަނުން މީހުން ނެރެމުން.
މުޅި އެ ސަރަހައްދުގައި ވަނީ ކަރުނަ ގޭހުގެ އަސަރު. އެއްވުން ރޫޅާލުމަށް ފުލުހުން ވަނީ ވަރަށް ގިނައިން ކަރުނަ ގޭސް ޖަހައިފައި. އަދި ބައެއް މީހުން ހައްޔަރު ކުރުމުގެ ތެރޭގައި ބައެއް މީހުންނަށް ވަނީ އަނިޔާ ލިބިފައި.
ހަރުގެ ތެރޭގައި ސިޔާސީ ލީޑަރުން އަދިވެސް އެބަތިއްބެވި. އަދި އެ ބޭފުޅުން އަންނަނީ އެއްވެ ތިބި މީހުންނާ ވާހަކަ ދައްކަވަމުން.
ކްރިމިނަލް ކޯޓުގެ އަމުރާ އެއްގޮތަށް ނަދީމް ދޫކޮށްލައިފި.
އެމްޑީޕީގެ ހަރުގެ ކައިރިން މަގުމަތީގައި ބައެއް މީހުން އޮށޯންނަން ފެށުމުން، އެސްއޯ ފުލުހުން ވަނީ ގަދަކަމުން އެ ސަރަހައްދުން އެ މީހުން ގެންދަން މަސައްކަތް ކޮށްފައި.
އެމްޑީޕީ ހަރުގެ ކައިރިއަށް އެއްވި މީހުން ރޫޅާލުމަށް ކަރުނަ ގޭސް ޖެހި ނަމަވެސް އަނެއްކާ މީހުން އެތަނަށް އެއްވެއްޖެ. އެކަމަކު އަދިވެސް އެ ސަރަހައްދުގައި ފުލުހުން އެބަ ހަރަކާތްތެރިވޭ.
ސުޕްރީމް ކޯޓުގެ އަމުރު ފުރަތަމަ ޝާއިއުކުރި އިރު ފަނޑިޔާރުންގެ ނަމާއި ސޮއެއް ނެތް. އެ ހުކުމް ޝާއިއު ކުރުމާ އެކު، ކޯޓުގެ ވެބް ސައިޓް ހެކް ކުރި ކަމަށް ބުނެ އަޑު ފެތުރެމުން ދަނިކޮށް ދާދި ދެންމެއަކު ވަނީ ފަސް ފަނޑިޔާރުންގެ ނަމާއި ސޮޔާ އެކު އަމުރު ޝާއިއުކޮށްފައި.
އެމްޑީޕީގެ ހަރުގެ ކައިރިއަށް އެއްވި މީހުން ރޫޅާލުމަށް ފުލުހުން ކަރުނަ ގޭސް ޖަހައިފި.
އެމްޑީޕީ ހަރުގެ ކައިރިއަށް އެއްވި މީހުންގެ މުޒާހަރާ ރޫޅާލުމަށް އެސްއޯ ފުލުހުން ހަރަކާތްތެރިވާން ފަށައިފި. ޝީލްޑާއި މުގުރުބުރިއާއެކު ތިބި އެސްއޯ ފުލުހުން އެ ސަރަހައްދުގައި އަންނަނީ ހަރަކާތްތެރިވަމުން.
ސުޕްރީމް ކޯޓުން މިރޭ އަމުރު ނެރެފައި ވަނީ އެ ކޯޓުގެ ފަސް ފަނޑިޔާރުންގެ އިއްތިފާގުން. އެ ބޭފުޅުންގެ ނަމާއި ސޮޔާއެކު ސުޕްރީމް ކޯޓުގެ ވެބް ސައިޓްގައި އެ އަމުރު މިހާރު ވަނީ ޝާއިއުކޮށްފައި.
ކުރީގެ ރައީސް މައުމޫން އަބްދުލް ގައްޔޫމްގެ ދަރިކަނބަލުން ޔުމްނާ މައުމޫންގެ ފިރިކަލުން މުހައްމަދު ނަދީމް ހައްޔަރު ކުރުމަށް މިއަދު ނެރުނު އަމުރު ކްރިމިނަލް ކޯޓުން ބާތިލް ކޮށްފައިވާކަން ކޯޓުން އަންގާފައިވާ ކަމަށް ނަދީމްގެ ވަކީލް ޝަމީމް ވިދާޅުވެއްޖެ. އަދި ނަދީމް ދޫކުރުމާ ގުޅޭ ކަންކަން ކުރިއަށް ދާ ކަމަށް ޝަމީމް ވިދާޅުވި.
ޖަލުގައި ތިބި ސިޔާސީ ބޭފުޅުން މިހާރު މާލެ ގެންނަން ތައްޔާރުވަމުން އަންނަ ކަމަށް ވަނީ އެނގިފައި. އެނގިފައިވާ ގޮތުގައި އެ ބޭފުޅުން ގެންނަނީ އަތޮޅުވެއްސަށް.
ރައީސް ޔާމީން ސިފައިންގެ ތެރޭގައި ދެންމެ އުޅުއްވަނިކޮށް ނަގާފައިވާ ފޮޓޯފުޅެއް ސޯޝަލް މީޑިއާގައި ދެންމެ އާންމުވެއްޖެ.
ފުލުހުންގެ އިތުރުން ސިފައިން ވެސް މިހާރު އަންނަނީ ޝީލްޑާއި މުގުރުބުރިއާއެކު ހަރަކާތްތެރިވަމުން. ބަންޑާރަ މިސްކިތާ ހިސާބުން ފެށިގެން ވެލާނާ ބިލްޑިންގާ ހަމައަށް އެ ސަރަހައްދު ވަނީ ބަންދުކޮށްފައި.
ކުރީގެ ރައީސް ނަޝީދުގެ އިންޓަވިއު ރާއްޖެ ޓީވީން: ހުރިހާ ބޭފުޅުންނަށް ވެސް ވަރަށް ބޮޑަށް ޝުކުރު ދަންނަވަން. އަޅުގަނޑު ހައްޔަރުވުމާ ގުޅިގެން، އަދި އެހެން ބޭފުޅުން ވެސް ހައްޔަރުވުމާ ގުޅިގެން ދިވެހި ރައްޔިތުންނަށް ވަރަށް ބޮޑަށް ޝުކުރު ދަންނަވަން. އެކަން ދުވަހަކު ވެސް ހަނދާނަކުން ނުފިލާނެ.
ކުރީގެ ރައީސް ނަޝީދުގެ އިންޓަވިއު ރާއްޖެ ޓީވީން: ފަނޑިޔާރުން ވެސް އަދި ކޮމިޝަނާ އޮފް ޕޮލިސް ވެސް ހައްޔަރުވެގެން ނުވާނެ. ެ ގޮވާލުން ގޮވާލައިގެން ހުރިހާ ރައްޔިތުން މަގުމައްޗަށް ނުކުތުމަކީ ކޮންމެހެން ބޭނުންތެރިކަމެއް.
ކުރީގެ ރައީސް ނަޝީދުގެ އިންޓަވިއު ރާއްޖެ ޓީވީން: މިރޭ މާލެ ދާ ގޮތަކަށް ނޫން ތައްޔާރުވެގެން މިހިރީ. އެކަމަކު އަޅުގަނޑު ދާނަން މާލެ. އަޅުގަނޑު މި ހުރީ އިއްތިހާދުގެ ވިސްނުމާ އެއްގޮތަށް. ކަށަވަރު ވާންވީ ކަމަކީ ރައީސް ޔާމީން އެހުރީ ނިމިފައި. އަޅުގަނޑަށް އެބަ ފެނޭ ބަންޑާރަ ނައިބާއި ޑިފެންސް މިނިސްޓަރާ ޗީފްް އޮފް ޑިފެންސް ފޯސް އެތާނގައި ތިއްބަވަން ޖެހޭ ސަބަބެއް ނެތް. އަޅުގަނޑަށް ފެންނަ ގޮތުގައި މި ވެރިކަން މާ ގިނަ ދުވަހަކަށް މާ ގިނަ ވަގުތަކަށް ނޯންނާނެ.
ކުރީގެ ރައީސް ނަޝީދުގެ އިންޓަވިއު ރާއްޖެ ޓީވީން: ކޮމިޝަނާ އޮފް ޕޮލިސް އާ ރައީސް ނުގުޅުއްވިގެން އުޅުއްވާ ވާހަކަ އަޑުއެހީން. ރައީސް ގުޅުއްވަން ޖެހޭނީ ހޯމް މިނިސްޓަރާ. ސީދާ ގޮތަކަށް ރައީސުލްޖުމްހޫރިއްޔާ ފުލުހުންނަށް ބާރު ފޯރުއްވަވަންޏާ އިތުރު ތުހުމަތުތަކެއް އެ ލިބެނީ
ކުރީގެ ރައީސް ނަޝީދުގެ އިންޓަވިއު ރާއްޖެ ޓީވީން: މި ވަގުތު އެންމެ ބުއްދިވެރީ ރައީސް ޔާމީން އިސްތިއުފާ ދެއްވުން
ކުރީގެ ރައީސް ނަޝީދުގެ އިންޓަވިއު ރާއްޖެ ޓީވީން: އަޅުގަނޑު ދެކޭ ގޮތުގައި ސާބިތުކަން މަތީގައި ތިބެއްޖެ ނަމަ ހައްގަށް ނަސްރު ލިބޭނެ. އަަބަދުވެސް ދަންނަވަން އަޅުގަނޑުމެންނަށް އަބަދު ވެސް ކާމިޔާބު ލިބޭނެ. ހުރިހާ ރައްޔިތުން ވެސް އެތަން ދެކޭނެ
އެޓާނީ ޖެނެރަލް: ފުލުހުންގެ އިދާރާ މިހާރު ހިންގަވާނީ ޑެޕިއުޓީ ކޮމިޝަނަރު އޮފް ޕޮލިސް އަހުމަދު ސައުދީ
އެޓާނީ ޖެނެރަލް: މި އަމުރު ނުކުތުމާ ހިސާބުން ކޮމިޝަނަރާ ރައީސް ގުޅުއްވަން ވަރަށް މަސައްކަތް ކުރެއްވި. އެކަމަކު ގުޅޭ ގޮތެއް ނުވި. އެހެންވެ ކޮމިޝަނަރު ކަމުން އަރީފު ވަނީ ވަކިކުރައްވާފައި
އެޓާނީ ޖެނެރަލް: މިހާރު މިދަނީ ސުޕްރީމް ކޯޓާ އެކު އެކަން ކުރެވޭތޯ ބަލަމުން
އެޓާނީ ޖެނެރަލް އަނިލް: އަމުރުގައި ހިމެނޭ ގިނަ ކަންތައް އެއީ ދައުލަތުގެ ބަންޑާރަ ނައިބަށް ރައްދުވާ ކަންކަން. އެކަމަކު މިހާތަނަށް އަޅުގަނޑުމެންނަކަށް އެ ހުކުމާ ބެހޭ ސައްހަ ކަމެއް ނޭނގެ.
އާދަމް ޝަރީފް: ގައުމުގެ ސުލްހަ މަސަލަސް ކަމާ އެކު ކުރިއަށް ދިއުން އެދެން،
އާދަމް ޝަރީފް: ގާނޫނީ އިމުގެ ތެރޭގައި ހުރިހާ ބޭފުޅުން ތިއްބެވުން އެދެން. ކުރިއަށް އޮތް ވަގުތުތަކުގައި ސަލާމަތީ ބާރުތަކަށް އެހީތެރިވުމަށް.
ޑިފެންސް މިނިސްޓަރު އާދަމް ޝަރީފް: ހުކުމުގައި ސަރުކާރުން ވިސްނަން ޖެހޭ ބައިވަރު ކަންތައްތައް އެބަހުރި. އެކަން މި ދަނީ ބަލަމުން.
ސަރުކާރުން ބާއްވާ ޕްރެސް ކޮންފަރެސް: ނޫސް ކޮންފަރެންސް ދެއްވަނީ ޑިފެންސް މިނިސްޓަރާއި އެޓާނީ ޖެނެރަލް އަދި ޗީފް އޮފް ސްޓާފް
ރާއްޖެ ޓީވީ "ދުއްވާލާނެ" ކަމުގެ އިންޒާރު ލިބިފައިވާ ކަމަށާއި އެ މައްސަލަ ފުލުހަށް ހުށަހަޅަން ނިންމާފައިވާ ކަމަށް ރާއްޖެ ޓީވީން ދެންމެ ބުނެފި. އަދި އެ ސްޓޭޝަންގެ ސީއޯއޯ ހުސެއިން ފިޔާޒު މޫސާ މިހާރު ވަނީ އެ މައްސަލަ ހުށަހެޅުމަށް ޕޮލިހަށް ގޮސްފައި.
ސުޕްރީމް ކޯޓުގެ ހުކުމާ ގުޅިގެން އެމެރިކާގެ ސަފީރު އަތުލް ކެޝަޕް ކުރެއްވި ޓްވީޓެއްގައި ދެންމެ ވިދާޅުވީ ސިޔާސީ ކުށްވެރިން ދޫކޮށްލަން ސުޕްރީމް ކޯުޓޫން ކުރި ހުކުމަށް މަރުހަބާ ވިދާޅުވާ ކަމަށާއި އަދި އެ ހުކުމަށް ސަރުކާރާއި ސަލާމަތީ ބާރުތަކުން އިހުތިރާމު ކުރުމަށް ގޮވާލައްވާ ކަމަށް.
އެމްޑީޕީގެ ހަރުގޭގައި ވާހަކަ ދައްކަވަމުން އަހުމަދު މަހުލޫފު ވިދާޅުވީ ފުލުހުން ތިބީ ރައްޔިތުންނާ އެކު ކަމަށް. މިރޭ ގެއަށް ވަންނާނީ މި އަނިޔާވެރި ވެރިކަން ނިންމާފައި ކަމަށް ވެސް އޭނާ ވިދާޅުވި.
ސިފައިންގެ ހިމެނޭ ސަރަހައްދަށް ނޫސްވެރިންނަށް ވެސް ނުވަދެވޭ ކަމަށް އެ ސަރަހައްދުގައި ތިބި ނޫސްވެރިން ބުނޭ.
ވެބްސައިޓް ހެކް ކުރެވިފައި ނުވާ ކަމަށް ޑިޕާޓްމެންޓް އޮފް ޖުޑީޝަރީން ބުނެފި
ސިފައިންގެ ހިމެނޭ ސަރަހައްދު ބަންދުކޮށް، ސަލާމަތީ ފިޔަވަޅުތައް ވަރުގަދަކޮށްފި
ޕީޕީއެމްގެ ޕީޖީ ލީޑަރު އަހުމަދު ނިހާން ދެންމެ ކުރެއްވި ޓްވީޓެއްގައި ވިދާޅުވީ އެމްޑީއޭ އާއި ޕީޕީއެމް ޕާލަމެންޓްރީ ގުރޫޕު އޮތީީ ސާބިތުކަމާ އެކު ރައީސް ޔާމީންގެ ގާނޫނީ ސަރުކާރާ އެކު ކަމަށް.
ދިވެހި ސަރުކާރުން ދޭ ނޫސްވެރިންގެ ބައްދަލުވުމެއް ބާއްވަން ތައްޔާރުވެއްޖެ. އެނގިފައިވާ ގޮތުގައި ރައީސް އަބްދުﷲ ޔާމީން ވަނީ ސިފައިންގެ އަށް ދެންމެ ވަޑައިގެންފައި
އެމްޑީޕީގެ ހަރުގޭގައި މިހާރު ކުރިއަށް ދާ އެއްވުމުގައި ގިނަ ބޭފުޅުން ވިދާޅުވަމުން ގެންދަވަނީ ރާއްޖޭގެ ސިޔާސީ ތާރީހުގައި މިރެއަކީ އެންމެ އުފާވެރި ރޭ ކަމަށް. ހުރިހާ ބޭފުޅުން ވެސް ވާހަކަ ދައްކަވަމުން ގެންދަވަނީ ޖޯޝާއި ފޯރީގައި. މިރޭގެ އެއްވުމުގައި އެއްވެސް މީހަކު އެއްޗަކަށް ގެއްލުމެއް ދީ، އެއްވެސް ހަމަނުޖެހުމެއް ނުހިންގުމަށް ދަނީ ގޮވާލަމުން
އެމްޑީޕީ ހަރުގެ ސަރަހައްދުގައި މިހާރު އަންނަނީ ވަރަށް ބޮޑު އެއްވުމެއް ބާއްވަމުން. އެ ސަރަހައްދުގައި ފުލުހުން ތިބި ނަމަވެސް ފުލުހުން އެއްވުން ބާއްވަން އެއްވެސް ހުރަހެއް ނެތް.
ރާއްޖެ އިން ބޭރުގައި ތިއްބެވި ސިޔާސީ ހުރިހާ ލީޑަރުން ފްލައިޓެއްގައި އެބަ ރާއްޖެ ވަޑައިގަންނަވާ ކަމަށް ކިނބިދޫ ދާއިރާގެ މެމްބަރު އަބްދުﷲ ރިޔާޒް ވިދާޅުވެއްޖެ
އެނގިފައިވާ ގޮތުގައި ސިޔާސީ ލީޑަރުންގެ ތެރެއިން މިހާރު ޖަލުގައި ތިއްބެވި އަހުމަދު އަދީބާއި ޝައިހު އިމްރާން މާލެ ގެންނަން ނިންމައި، އެ ބޭފުޅުންނާ ހަވާލުވާން އާއިލާއަށް ކަރެކްޝަންސް އިން ވަނީ އަންގައިފައި
ފުލުހުން ދެންމެ ކުރި ޓްވީޓެއްގައި ބުނެފައި ވަނީ ސުޕްރީމް ކޯޓުން ކުރި އަމުރު ފުލުހުން ތަންފީޒު ކުރާނެ ކަމަށާއި އެކަން ކުރަން ފަށައިފައިވާ ކަމަށް
ސުޕްރީމް ކޯޓުގެ އަމުރަށް ފަހު ކުރީގެ ރައީސް މައުމޫން އަބްދުލް ގައްޔޫމް ކުރެއްވި ޓްވީޓްގައި ވިދާޅުވީ ﷲ އަށް ޝުކުރު ހުރި ކަމަށާއި އިންސާފު ގާއިމް ވެއްޖެ ކަމަށް
އެމްޑީޕީގެ ހަރުގޭގައި މިހާރު ސިޔާސީ އިދިކޮޅު ވަރަށް ގިނަ އިސް ބޭފުޅުން އެބަތިއްބެވި. ހަމަ އެއާއެކު މ. ކުނޫޒަށް ވެސް ވަނީ އާންމުން އެއްވާން ފަށައިފައި. ކުނޫޒްގައި ދުއާ ވެސް ކިޔަމުން އެބަދޭ.
ރާއްޖޭގެ ސިޔާސީ މަސްރަހުގައި ހުރި ބޮޑެތި މައްސަލަތަކެއް އިދިކޮޅު ފަރާތްތަކާ އެއްކޮޅަށް ސުޕްރީމް ކޯޓުން މިރޭ ނިންމުމާ ގުޅިގެން އިދިކޮޅު ފަރާތްތަކުން މާލޭގައި އުފާ ފާޅުކުރަމުން އެބަ ދެ އެވެ.
ބަންދުން ދޫކޮށްލަން ސުޕްރީމް ކޯޓުން އަމުރުކުރި ނުވަ މީހުންގެ ހެބިއަސްކޯޕަސް މައްސަލަ ކްރިމިނަލް ކޯޓަށް ހުށަހަޅައިފިން.
ސުޕްރީމް ކޯޓުން މިރޭ ވަނީ ތިން މައްސަލައެއްގައި މުހިންމު ތިން ނިންމުމެއް ނިންމައިފަ އެވެ. އޭގެ ތެރެއިން އެންމެ ބޮޑު އެއް ކަމަކީ ސިޔާސީ އެކި ކުށްކުށުގައި ޖަލު ހުކުމާއި ހައްޔަރުކޮށްފައި ތިބި ސިޔާސީ ލީޑަރުން ދޫކޮށްލަން ކުރި އަމުރެވެ. އަނެއް އަމުރަކީ ގޮނޑި ގެއްލިއްޖެ ކަމަށް އިލެކްޝަންސް އިން ނިންމާފައިވާ 13 މެމްބަރުންގެ ގޮނޑި ނުގެއްލޭ ކަމަށް ކުރި ހުކުމެވެ. އަދި އަނެއް ނިންމުމަކީ ޕާޓީ ބަދަލު ކުރިޔަސް ގޮނޑި ނުގެއްލޭނެ ކަމަށް ނިންމި ނިންމުމެވެ.
މި ނިންމުން ސުޕްރީމް ކޯޓުން އިއުލާން ކުރި އިރު ވެސް އެމްޑީޕީގެ ހަރުގެ ކައިރީގައި މީހުން އެއްވެފައި ތިއްބެވެ. އެއްވުން އާންމުކުރުމާ ގުޅިގެން އެ ސަރަހައްދުގައި މީހުން އުފާކޮށ އަތް ޖަހައި ސުޕްރީމް ކޯޓަށް ސާބަސް ދެމުން ދިޔަ އެވެ. ހަމަ އެހެންމެ، ސިޔާސީ ބައެއް ލީޑަރުން ވެސް އެ ތަނަށް ވަޑައިގަތެވެ.
ސުޕްރީމް ކޯޓުގެ ނިންމުމާ ގުޅިގެން ސިޔާސީ ލީޑަރުން ދަނީ އެކަމުގެ އުފާ ފާޅުކޮށް ޓްވީޓް ކުރަމުންނެވެ.