31 ޖެނުއަރީ 2018 - 10:35
ވޮޝިންޓަން (ޖެނުއަރީ 31) - ގުއަންޓަނާމޯ ބޭ ޖަލު ބަންދު ނުކުރާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ރައީސްކަމާ ހަވާލުވެވަޑައިގަތުމަށް ފަހު ޓްރަމްޕް ދެއްވި ފުރަތަމަ ރިޔާސީ ބަޔާނުގައި ވިދާޅުވީ ގުއަންޓަނާމޯ ބޭ ޖަލު ހުޅުވާފައި ބެހެއްޓުމުގެ އަމުރުގައި އޭނާ ދެންމެ ސޮއި ކުރައްވާފައިވާ ކަމަށެވެ.
ސެޕްޓެމްބަރު 11، 2001 ގައި ދިން ޓެރަރިސްޓް ހަމަލާ އަށް ފަހު އެމެރިކާ އިން އަފްޣާނިސްތާނަށް އަރާ އަލްގައިދާ ހަނގުރާމަވެރިން އަތުލައިގަތުމަށް ފަހު އެ މީހުން ބަންދު ކުރަން ކިއުބާގެ އިރުމަތީގައިވާ އެމެރިކާގެ ކަނޑުގެ ސިފައިންގެ މަރުކަޒުގައި ގާއިމްކުރި ޖަލަށް ގެންދިޔަ ފުރަތަމަ ގައިދީން ތިބީ ކޮށި ކޮށީގައި ބަންދުކޮށްފަ އެވެ. ރައީސް ޖޯޖް ޑަބްލިއު. ބުޝްގެ ވެރިކަމުގައި ގާއިމްކުރި ޖަލުގެ އިންސާނީ ހައްގުތަކުގެ ހާލަތާ މެދު 2002 ވަނަ އަހަރު ވަނީ ވަރަށް ބޮޑަށް ދުނިޔޭގެ ނުރުހުން އަމާޒުކޮށްފަ އެވެ. ޖަލުގައި ފުރަތަމަ 780 ގައިދީން ތިބި ނަމަވެސް އޭގެ ތެރޭން ގިނަ މީހުން ވަނީ އެ މީހުންގެ ގައުމުތަކަށް ނުވަތަ އެހެން ގައުމުތަކަށް ބަދަލުކޮށްފަ އެވެ.
ރައީސް ބަރަކް އޮބާމާގެ ވެރިކަމުގައި ވަނީ ޖަލު ބަންދު ކުރަން ވަރަށް މަސައްކަތް ކޮށްފަ އެވެ. އެ ޖަލުގައި މިހާރު ތިބީ 41 މީހުންނެވެ. މީގެ ތެރޭން އޮބާމާގެ ވެރިކަމުގައި ދޫކޮށްލަން ނިންމި މީހުން ވެސް ޓްރަމްޕް ވެރިކަމަށް ވަޑައިގަތުމަށް ފަހު ވަނީ ހިފަހައްޓައިފަ އެވެ.
އޮބާމާ، 2009 ވަނަ އަހަރު ވެރިކަމަށް ވަޑައިގަތުމަށް ފަހު ވަނީ އަހަރެއްގެ ތެރޭގައި ގުއަންޓަނާމޯ ބޭ ޖަލު ބަންދު ކުރާނެ ކަމަށް ވިދާޅުވެފަ އެވެ.