30 ޖެނުއަރީ 2018 - 13:03
ރައީސް އަބްދުﷲ ޔާމީން މަގާމުން ދުރުކުރަން އިދިކޮޅު ފަރާތްތަކުން ސުޕްރީމް ކޯޓަށް ހުށަހެޅި މައްސަލާގައި އިތުރު އިސްލާހުތަކެއް ގެންނަން ކޯޓުން އަންގާފައިވާ އިދިކޮޅު ފަރާތްތަކުން މިއަދު ބުނެފި އެވެ.
ރައީސް ޔާމީން މަގާމުން ދުރުކުރަން ސުޕްރީމް ކޯޓަށް ހުށަހެޅުއްވީ ކުރީގެ ރައީސް މުހައްމަދު ނަޝީދާއި ޖުމްހޫރީ ޕާޓީގެ ލީޑަރު ގާސިމް އިބްރާހިމާއި ކުރީގެ ރައީސް މައުމޫން އަބްދުލްގައްޔޫމްގެ އިތުރުން އަދާލަތު ޕާޓީގެ ނައިބު ރައީސް އަލީ ޒާހިރެވެ.
ނަޝީދު ކުރެއްވި ޓްވީޓެއްގައި ވަނީ އެ މައްސަލާގައި އިދާރީ އިތުރު އިސްލާހުތަކެއް ގެންނަން އަންގާފައިވާތީ އެ މަސައްކަތް މިހާރު ކުރަމުން އަންނަ ކަމަށެވެ.
އެކަމަކު އޭގެ އެއްވެސް ތަފްސީލެއް އަދި ނުލިބެ އެވެ. އެ މައްސަލާގައި އުޅުއްވާ އެއްވެސް ވަކީލެއްގެ ބަހެއް ވެސް އަދި ނުލިބެ އެވެ.
ސުޕްރީމް ކޯޓުގެ ގަވާއިދު އޮންނަ ގޮތުން އެ ކޯޓަށް ހުށަހަޅާ މައްސަލަތައް ބަލައިގަތުމާ މެދު ގޮތެއް ނިންމާނީ ފަނޑިޔާރުންގެ މަޖިލީހުންނެވެ. އާންމު ގޮތެއްގައި މައްސަލައެއް ހުށަހަޅައިފި ނަމަ އެ މައްސަލައެއް ރަޖިސްޓްރީ ކުރާނީ ހުށަހަޅަން ޖެހޭ ލިޔުންތައް ފުރިހަމަތޯ ބެލުމަށް ފަހު އެވެ.
ރައީސް ޔާމީން މަގާމުން ދުރުކުރަން ސުޕްރީމް ކޯޓަށް ހުށަހެޅީ ގާނޫނު އަސާސީ 100 ވަނަ މާއްދާގެ ދަށުން، ގާނޫނު އަސާސީއާ އެމަނިކުފާނު ޚިލާފްވެ ވަޑައިގަތް ކަމަށް ކަނޑައަޅައިދޭން އެދި އެވެ. އަދި އެމަނިކުފާނު މަގާމުން ދުރުކޮށް، ނައިބު ރައީސާ ވެރިކަން ހަވާލުކުރަން ވެސް އެ މައްސަލާގައި އެދިފައިވެ އެވެ.