01 ފެބުރުއަރީ 2018 - 06:30
ގަނޑުކުރި ކުކުޅާއި ގެރިމަހުން ފިނިކަނޑުވާލުމަކީ ވަގުތުގެ ތާށިކަމަށް ބަލާއިރު ބޮޑު ކަމެކެވެ. ގަނޑު ފިލުވޭނެ އިލެކްޓްރޯނިކް ސާމާނު ނެތަސް، އައިސްކުރި ކޮންމެ ބާވަތެއްގެ މަހަކުން ވެސް ޔެޓީ ޓަޗްގެ އެހީގައި ގަނޑުފިލުވާލަދެއެވެ.
ޔެޓީ ޓަޗްގައި ހިމެނެނީ އެލުމިނިޔަމް ފިލާފޮއްޗަކާއި އެ ފައްތާފައި އޮންނަ ޕްލާސްޓިކް ތަބަކެކެވެ. ގަނޑު ފިލުވަން ބޭނުންވާ މަސްބުރި ނަގާފައި ފިލާފޮތި މަތީ ބާއްވާލަންވީއެވެ. ކަރަންޓެއް ވެސް ބެޓެރީއެއް ވެސް މިކަމަކަށް ބޭނުމެއް ނޫނެވެ. މި އުފެއްދި ކުންފުނިން ބުނާ ގޮތުގައި ޔެޓީ ޓަޗްގެ އެލުމިނިޔަމް ބޯޑު ހަދާފައިވަނީ މަހުގައި ހުންނަ ފިނިކަން އެ ބޯޑަށް ދަމައިގަންނަ ގޮތަށެވެ. ނަތީޖާއެއްގެ ގޮތުން ކިތަންމެ ވަރަކަށް ގަނޑުވެފަ އޮތް މަސްބުރިއެއް ވިޔަސް ފިނިކަނޑުވާލަން ހޭދަވަނީ އާދަޔާ ޚިލާފަށް ކުޑަ ވަގުތުކޮޅެކެވެ. ކުކުޅުމަހުގެ ގަނޑު 16 މިނިޓުން ފިލުވައިދެއެވެ. ކަނޑުމަހުން ގަނޑު ފިލުވާލަން ނަގަނީ 8 މިނިޓެވެ.
މިގޮތަށް ގަނޑުފިލުވުމުގައި ހަނދާން ބަހައްޓަންޖެހޭ ކަމަކީ ފިނި ކެނޑެމުންދާނީ އެލުމިނިޔަމް ބޯޑުގައި ޖެހިފައި އޮންނަ ބައި ކަމެވެ. ވީމާ، އަވަސްކުރަން ބޭނުމިއްޔާ ޖެހޭނީ ދެ ފުށަށް ޖަހަމުން ގެންދާށެވެ. ފިނި ކެނޑުމުން ފައިބާ ފެން އެޅެމުން ދާނީ މަސްބުރި ބާއްވާފައި އޮންނަ ބޯޑު ފައްތާފައި އޮންނަ ފުން ތަބަކަށެވެ. އެއްކޮށް ގަނޑުފިލީމަ އެ ތަބަކުގައި ބާއްވައިގެން މަސް ކޮށައި ވެސް ލެވޭނެއެވެ. ދުނިޔޭގެ ބާޒާރުގައި ޔެޓީ ޓަޗް މިހާރު ލިބެން ހުރީ 34 ޑޮލަރަށެވެ.