28 ޖެނުއަރީ 2018 - 06:14
ސުޝާންތު ސިންގް ރާޖްޕޫތާއި ކްރީތީ ސަނަން އެކުގައި "ރާބްތާ" ކުޅުނު ފަހުން މި ދެ ތަރިންގެ ލޯބީގެ ވާހަކަތައް އަންނަނީ ވަރަށް ބާރަށް ދެކެވެމުންނެވެ. ސުޝާންތު އަލަށް ކުޅެން ހަމަޖެހިފައިވާ ފިލްމެއްގައި ކްރީތީގެ ކޮއްކޮ ނޫޕޫރު ބަތަލާގެ ރޯލު ކުޅެން ހަމަޖެހިފައިވާ ކަމަށް ނޫސްތަކުން އަންނަނީ ރިޕޯޓްކުރަމުންނެވެ.
މުކޭޝް ޗަބްރިޔާ ޑައިރެކްޓްކުރާ މި ފިލްމަކީ "ދަ ފޯލްޓް އިން އަވަ ސްޓާޒް"ގެ ރިމޭކް އެކެވެ. މުކޭޝް ވަނީ މި ފިލްމު ޑައިރެކްޓްކުރުމުގެ ޒިންމާ އޭނާ ނަގާފައިވާކަން ޔަގީން ކޮށްދީފަ އެވެ. އޭނާ ބުނި ގޮތުގައި މިވަގުތު އަދި ކުރަމުން އަންނަނީ ސްކްރިޕްޓްގެ މަސައްކަތެވެ. ފިލްމުގެ ބަތަލަކީ ސުޝާންތު ކަމަށާއި ބަތަލާއަކު ކާސްޓްކުރުމުގެ މަސައްކަތް ކުރަމުންދާ ކަމަށް ޑައިރެކްޓަރު ބުންޏެވެ.
ބޮލީވުޑްގެ ރިޕޯޓްތައް ބުނަނީ ނޫޕޫރް ބަތަލާގެ ރޯލަށް ފައިނަލް ވެފައިވާ ކަމަށެވެ. ކްރީތީ ތަންކޮޅެއް ކުރިން ދީފައިވާ އިންޓަވިއުއެއްގައި އޭނާގެ ކޮއްކޮ ފިލްމު ކުޅެން ޝައުގުވެރިވާކަން ހާމަކޮށްފައިވެ އެވެ. ކްރީތީ ބުނި ގޮތުގައި ކޮއްކޮ ބޭނުންވަނީ އަމިއްލައަށް މަސައްކަތް ކޮށްގެން ފިލްމީ ދުނިޔޭން ޖާގައެއް ހޯދާށެވެ. އޭނާއަކީ ވެސް އަމިއްލަ މަސައްކަތުން ކުރިޔަށްދާ ބަތަލާއެއް ކަމަށާއި އޭނާގެ ފިލްމީ ހަޔާތަށް ބަލާފައި ކޮއްކޮ ވެސް އަމިއްލައަށް މަސައްކަތް ކުރަން ބޭނުންވާތީ އުފާކުރާ ކަމަށް ކްރީތީ ބުންޏެވެ.
ކްރީތީ ބުނި ގޮތުގައި އޭނާގެ ކޮއްކޮ ލަވަ ކިޔަން ވަރަށް ޝައުގުވެރިވެ އެވެ. އަދި އެކްޓްކުރަން ދަސްކުރަން ވޯކްޝޮޕްތަކުގައި ބައިވެރިވަމުން އަންނަ ކަމަށް ވެސް އޭނާ ބުންޏެވެ.