26 ޖެނުއަރީ 2018 - 17:16
ވޮޝިންޓަން (ޖެނުއަރީ 26) - މެކްސިކޯ ބޯޑަރުގައި ރާނާ ފާރަށް ބޭނުންވާ ފައިސާ ބަޖެޓުގައި ހިމަނައިގެން ފާސްކޮށްދޭން ޑިމޮކްރެޓިކް ޕާޓީން އެއްބަސްވާ މަތިން ގާތްގަނޑަކަށް ދެ މިލިއަނެއްހާ މީހުންނަށް އެމެރިކާގެ ރަށްވެހިކަން ދިނުމުގެ ޕްލޭނެއް ވައިޓް ހައުސް އިން ތައްޔާރުކޮށްފި އެވެ.
ބަޖެޓާ ބެހޭ ތަފްސީލްތައް ހޯމަ ދުވަހު ހާމަކުރާނެ އެވެ. މެކްސިކޯ ބޯޑަރުގައި ފާރު ރޭނުމަށް ވަނީ 25 ބިލިއަން ޑޮލަރު ހިމަނައިފަ އެވެ. މި ފާރު ރޭނުމަށް ޑިމޮކްރެޓިކް ޕާޓީން ދެކޮޅެވެ.
ވައިޓް ހައުސްގެ ޕްލޭނުގައި ވަނީ 10-12 އަހަރު ތެރޭ 1.8 މިލިއަން މީހުން އެމެރިކާގެ ރަށްވެހިންގެ ގޮތުގައި ހަމަޖެއްސުމެވެ. މީގެ ތެރޭގައި ޅަ އިރު އެމެރިކާ އަށް އެތެރެވެ އެ ގައުމުގައި ދިރިއުޅެމުންދާ ގާތްގަނޑަކަށް ހަތް ލައްކައެއްހާ "ޑްރީމާސް" ވެސް ހިމެނެ އެވެ. ރައީސް ބަރަކް އޮބާމާގެ ވެރިކަމުގައި ފާސްކުރި ޑިފާޑް އެކްޝަން ފޯ ޗައިލްޑްހުޑް އެރައިވަލްސްގެ ދަށުން ޑްރީމާސް އަށް ވަނީ ހިމާޔަތާއި ރައްކާރިކަން ދީފަ އެވެ. ނަމަވެސް ޓްރަމްޕް ސަރުކާރުން ދާދި ފަހުން ބުނެފައި ވަނީ އެއީ ގަވާއިދާޚިލާފަށް ދިރިއުޅޭ ބައެއް ކަމަށާއި އެ މީހުން ޑިޕޯޓްކޮށްލާނެ ކަމަށެވެ. އެމެރިކާ ސަރުކާރު ހިންގުމަށް ބޭނުންވާ ވަގުތީ ބަޖެޓް ފާސް ނުވެ ސަރުކާރު ހުއްޓުމަކަށް އައިިސްފައި ވަނީ މި މައްސަލާގައި ދެ ޕާޓީގެ ޚިޔާލު ތަފާތުވެގެންނެވެ.