20 ޖެނުއަރީ 2018 - 17:03
ޑާކާ (ޖެނުއަރީ 20) - ޗައިނާގެ ކޮންސްޓްރަކްޝަން ބޮޑު ކުންފުންޏެއް ބަންގްލަދޭޝް ސަރުކާރުން ބްލެކްލިސްޓްކޮށް އެ ކުންފުނީން އެ ގައުމުގައި ކުރަމުންދާ މަސައްކަތްތައް ހުއްޓާލަން އަންގައިފި އެވެ.
ބަންގްލަދޭޝް އިން ބުނީ ޗައިނާ ސަރުކާރުގެ ޗައިނާ ކޮމިއުނިކޭޝަންސް ކޮންސްޓްރަކްޝަން ކޮމްޕެނީ (ސީސީސީސީ) ގެ ސަބްސިޑަރީ ކުންފުންޏެއް ކަމަށްވާ ޗަައިނާ ހާބާ އިންޖިިނިއަރިން ކޮމްޕެނީ (ސީއެޗްއީސީ) ސަސްޕެންޑް ކުރީ ސަރުކާރުގެ އޮފިޝަލަކަށް ރިޝްވަތު ދިނުމުން ކަމަށެވެ. ޗައިނާ ކުންފުނީގެ މަސައްކަތްތައް ހުއްޓާލަން ނިންމި އިރު އެ ކުންފުނިން ދިޔައީ ވެރިރަށް ޑާކާ އިން އިރު އުތުރުގެ ސިޓީއެއް ކަމަށްވާ ސިލްހެޓާ ދެމެދު ހަދާ ހައިވޭ މަޝްރޫއު ފުޅާކުރުމާ ބެހޭ ގޮތުން ސަރުކާރާ މަޝްވަރާ ކުރަމުންނެވެ.
ބަންގްލަދޭޝްގެ ރޯޑް ޓްރާންސްޕޯޓް މިނިސްޓަރު އުބައިދު ގުއާދަރު ވިދާޅުވީ ބްލެކްލިސްޓްކުރި ސީއެޗްއީސީގެ މަސައްކަތްތައް ހުއްޓާލަން އަންގާފައިވާ ކަމަށެވެ. ފައިނޭންސް މިނިސްޓަރު އޭއެމްއޭ މުހީތު ވިދާޅުވީ ސީއެޗްއީސީ ބްލެކްލިސްޓް ކުރަން ޖެހުނީ ރޯޑް ޓްރާންސްޕޯޓް މިނިސްޓްރީގެ އޮފިޝަލަކަށް ފަސް މިލިއަން ޓާކާ (60،000 ޑޮލަރު) ގެ ރިޝްވަތު ހުށަހެޅުމުން ކަމަށެވެ.
މިކަމާ ބެހޭ ގޮތުން ސީއެޗްއީސީ ވަކި އެއްޗެއް އަދި ނުބުނެ އެވެ. ސީއެޗްއީސީ އިން ދަނީ 80 އަށް ވުރެ ގިނަ ގައުމުގައި އިންފްރާސްޓްރަކްޗާ ޕްރޮޖެކްޓްތައް ހިންގަމުންނެވެ.