18 ޖެނުއަރީ 2018 - 06:00
ވަންޕްލަސްއާ ބެހޭ ގޮތުން ގަޔާނުވާ ޒާތުގެ ވާހަކަތަކެއް ދެކެވެމުން ދަނިކޮށް އަނެއްކާ ވެސް މި އޮތީ ބޮޑު ކަމެއް ޖެހިފަ އެވެ. އާ އަހަރެއް ލައިގަތުމާ އެކު ހެކަރުންގެ އުނދަގޫ އެންމެ ފުރަތަމަ ފޯރި ބަޔަކަށް ވަންޕަލްސް ވަނީ ވެފަ އެވެ.
ވަންޕްލަސް ވެބްސައިޓުން ވިޔަފާރިކުރި މީހުން ބުނާ ގޮތުގައި އެ މީހުން ނުކުރާ ވިޔަފާރި މުއާމަލާތްތަކަށް ފައިސާ ކަނޑާފައި އެބަ ހުއްޓެވެ. ކާޑު ސްޓޭޓްމަންޓުން ދައްކާ ގޮތުގައި އެ ކަމެއް ހިނގާފައި ވަނީ ވަންޕްލަސް ވެބްސައިޓުން ވިޔަފާރިކުރި ފަހުންނެވެ.
ވަންޕްލަސް އޮންލައިން ފޯރަމްގައި މިކަމާ ގުޅޭ ގޮތުން މަޝްވަރާކުރެވެން ފެށުމުން، ވަންޕްލަސްއިން ބުނީ އެކަން ދެނެތިބި ކަމަށެވެ. އަދި ވެގެން އުޅޭ ގޮތް ހޯދުމަށްޓަކައި ސެކިޔުރީ މާހިރުންގެ ލަފާހޯދައި މަސައްކަތްކުރަމުން އަންނަ ކަމަށް ވެސް ބުންޏެވެ.
އޮންލައިން ސެކިޔުރިޓީ ފާމްތަކުން ލަފާކުރާ ގޮތުގައި މިއީ ފަހަރެއްގައި ވަންޕްލަސް ވެބްސައިޓްގައި އުޅޭ މައްސަލައަކަށް ވެސް ވެދާނެ އެވެ. އެ ނޫން ގޮތެއްގައި، މާލީ މުއާމަލާތް ފުރިހަމަކުރުމަށްޓަކައި، ވަންޕްލަސް ގުޅިފައިވާ ބައެއްގެ މައްސަލައަކަށް ވެސް ވެދާނެ އެވެ.
ވަންޕްލަސް ބުނާ ގޮތުގައި އެ މީހުންގެ ވެބްސައިޓަށް ހެކަރުން ހަމަލާއެއް ނުދެ އެވެ. ވަންޕްލަސް ވެބްސައިޓް ހެކްކުރަން ފަސޭހަނުވާނެ ކަމަށް ބުނަމުން ބުނެފައި ވަނީ "ތާޑްޕާޓީ" އެހީތެރިންގެ ފުށުގައި ބަލިކަށިކަމެއް ހުރިތޯ ބަލަމުން ދާ ކަމަށެވެ.
ވަންޕަލްސް ވެބްސައިޓުން ވިޔަފާރިކުރާ މީހުންގެ ކާޑު ނަންބަރު، ވަންޕްލަސް ސާވާތަކުގައި ރައްކާނުކުރާ ކަމަށް އެ ކުންފުނިން ބުނެ އެވެ. ވަންޕްލަސްއިން ތަކުރާރުކޮށް ވިޔަފާރިކުރާ މީހުން ބޭނުންވެއްޖެ ހިނދެއްގައި ނޫނީ އެ މީހުންގެ ފަރުދީ މައުލޫމާތު ރައްކާނުކުރާނެ ކަމަށް ވެސް ބުންޏެވެ.
ޗައިނާ ސްމާޓްފޯން ކުންފުނިތަކަށް ދުނިޔޭގެ މާކެޓުތަކުގައި ފިއްތުންތަކެއް ވަނީ ކުރިމަތިވެފަ އެވެ. ވާވޭ، ޒެޑްޓީއީ، އޮޕޯ، ޝޯމީ އަދި ވަންޕްލަސް ވެސް ވިޔަފާރި މުއާމަލާތްތަކުގައި އިތުބާރުކުރެވޭ ބަޔަކަށް ވުމަށް އެ އުފެއްދުންތައް ބޭނުންކުރާ މީހުން ގޮވާލަ އެވެ. ވަންޕްލަސްގެ ފޯނުތައް އެހާ މަޝްހޫރުވެފައި ވާއިރު ވެސް، ތާކުންތާކު ނުޖެހޭ ވަރަށް މޮޔަ ކަންތައްތައް ވެސް އެ މީހުންނަށް އެބަ ކުރެވެ އެވެ.