16 ޖެނުއަރީ 2018 - 12:23
"ސްޕޯޓްސް ފޯ އޯލް" ގެ މި އަހަރުގެ ހަރަކާތް ލ. އަތޮޅުގައި އަންނަ މަހު ކުރިއަށް ގެންދަން ކުޅިވަރާ ބެހޭ މިނިސްޓްރީން ތައްޔާރީތައް ފަށައިފި އެވެ.
ހަރަކާތް އޮންނާނީ ފެބްރުއަރީ 16 ގައި ލ. ފޮނަދޫގައި އަދި 17 ވަނަ ދުވަހު ލ. ގަމުގަ އެވެ. ކުޅިވަރާ ބެހޭ މިނިސްޓްރީގެ އޮފިޝަލަކު މައުލޫމާތު ދިން ގޮތުގައި، ހަ ކުޅިވަރެއްގެ ވާދަވެރި މުބާރާތްތައް ދެ ރަށުގައި ވެސް ބާއްވާނެ އެވެ. އެއީ ފުޓްސަލް، ހޭންޑްބޯލް، ބަށި، ވޮލީބޯލް، ޑޮޖްބޯލް އަދި ވާދެމެވެ. މީގެ އިތުރުން އާއިލީ އިވެންޓްތަކެއްގެ ގޮތުގައި އެތުލެޓިކްސް އާއި ބައިސިކަލް ދުއްވުމުގެ މުބާރާތްތަކެއް ވެސް އޮންނާނެ އެވެ. އަދި ކުޑަކުދިންގެ ހަވީރެއް ވެސް ބޭއްވުމަށް ވަނީ ހަމަޖެހިފަ އެވެ.
މި މުބާރާތްތަކުގައި ބައިވެރިވުމުގެ އެންމެ ފަހު ތާރީހަކީ މި މަހުގެ 31 ވަނަ ދުވަހެވެ.
ކުޅިވަރު ހަރަކާތްތަކުގެ އިތުރުން ލ. އަތޮޅުގެ ރަށްރަށުގެ ސްކޫލްތަކާއި ޖަމިއްޔާތަކާއި ޒުވާނުންނާއި އާއްމުންނަށް ހާއްސަކޮށްގެން ދުޅަހެޔޮ ސިއްހަތަށް ހޭލުންތެރިންކުރުވުމުގެ ހަރަކާތްތަކެއް ވެސް ކަމުގެ ތަޖުރިބާކަރުން ބައިވެރިކޮށްގެން ބާއްވާނެ އެވެ. އަދި ހެލްތު ޗެކަޕް ޕްރޮގްރާމްތަކެއް ވެސް އޮންނާނެ އެވެ. މި ހަރަކާތްތަކުގައި ބައިވެރިވުމުގެ ފުރުސަތު ވެސް ވަނީ ހުޅުވާލައިފަ އެވެ. އެ ހަރަކާތްތައް އަންނަ މަހުގެ 12 އިން ފެށިގެން 17 ވަނަ ދުވަހާ ހަމަޔަށް ކުރިއަށްދާނެ އެވެ.
"ރާއްޖޭގެ އެސޯސިއޭޝަންތަކުންނާއި އެނިހެން ތަޖުރިބާކާރުން ވަޑައިގެން ދުޅަހެޔޮ ސިއްހަތަށް ހޭލުންތެރިންކުރުވުމުގެ ކްލާސްތަކެއް ނަގައިދޭނެ. ކުޅިވަރު ހަރަކާތްތައް ފެބްރުއަރީ 16 އަދި 17 ގައި އޮތަސް ފެބްރުއަރީ 12 އިން ފެށިގެން އެހެނިހެން ހަރަކާތްތައް ކުރިއަށްދާނެ،" އޮފިޝަލް ބުންޏެވެ.
މި އިވެންޓްތަަކަށް ރާއްޖޭގެ މަޝްހޫރު ބައެއް އެތުލީޓުން ވެސް ލ. އަތޮޅަށް ދާނެ އެވެ.
"ސްޕޯޓްސް ފޮ އޯލް" އަކީ ކުޅިވަރާ ބެހޭ މިނިސްޓްރީން 2000 ވަނަ އަހަރު ފެށި ހަރަކާތެކެވެ. ގަވާއިދުން ބާއްވަމުން އައިސް މީގެ އަހަރުތަކެއް ކުރިން މެދުކެނޑުނު ނަމަވެސް މިހާރު އަނެއްކާ ވެސް ކޮންމެ އަހަރަކު ރާއްޖޭގެ ކޮންމެވެސް ހިސާބެއްގައި އަންނަނީ ބާއްވަމުންނެވެ. މި ހަރަކާތް 2016 ވަނަ އަހަރު ބޭއްވީ ޏ. ފުވައްމުލަކުގަ އެވެ.