10 ޖެނުއަރީ 2018 - 14:45
"ސެކިއުރިޓީ ފޯރުކޮށްދެނީ އޮންނަ އުސޫލުން" ކަމަށް ކަމަށް ބުނެ، ކުރީގެ ރައީސް މައުމޫން އަބްދުލްގައްޔޫމް ގޭ ބަންދުކޮށްފައިވާ ކަމަށް ދައްކާ ވާހަކަތަކަށް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ފިނި ޖަވާބެއް މިއަދު ދީފި އެވެ.
މައުމޫނަށް ހަމަލާއެއް ދޭން އުޅޭ ކަމަށް ބުނެ، މިދިޔަ ހޯމަ ދުވަހުގެ ރެ އިން ފެށިގެން، އެ މަނިކުފާނު ދިރިއުޅުވާ ގެކޮޅު، އެންދެރިމާގޭގައި ސިފައިން ވަނީ ފޯރިމަރަން ފަށައިފަ އެވެ. އެ ގެ އަށް ވަންނަ އެންމެންގެ ނަން ވެސް ސިފައިން ނޯޓު ކުރެ އެވެ.
މި މައްސަލައިގައި އެމްއެންޑީއެފަށް ވަރަށް ބޮޑެތި ފާޑުކިއުންތަކެއް ވަނީ އަމާޒުވެފަ އެވެ. އިދިކޮޅު ފަރާތްތަކުން ތުހުމަތުކުރާ ގޮތުގައި، މައުމޫން ވަނީ "ގޭ ބަންދުކޮށްފަ" އެވެ. ސިފައިން އެ މަނިކުފާނުގެ ގެކޮޅުގެ ބޭރުގައި ތިބެނީ، އެ ގެ އަށް ވަދެ ނިކުމެ އުޅެނީ ކޮން ބައެއްތޯ ބަލަން ކަމަށް ވެސް އެއް ބަޔަކު ތުހުމަތު ކުރެ އެވެ.
މި ތުހުމަތުތައް ކުރަނިކޮށް، އެ މަނިކުފާނަށް ދޭން އުޅޭ ގެއްލުމުގެ ތަފްސީލު ދޭން މައުމޫން ވަނީ ޑިފެންސް މިނިސްޓްރީގައި އެދިވަޑައިގެންފަ އެވެ.
މައުމޫންގެ ސެކިއުރިޓީއާ ގުޅޭ ގޮތުން މީޑިއާތަކަށް ފޮނުވި މެސެޖެއްގައި އެމްއެންޑީއެފުން ބުނީ އެ ތަނުން "ފޯރުކޮށްދޭ ސެކިއުރިޓީގެ ކަންކަން ކުރިއަށް ގެންދަނީ ހަމަޖެހިފައި އޮންނަ އުސޫލުން" ކަމަށެވެ. ސެކިއުރިޓީއާ ގުޅޭ ގޮތުން މީޑީއާ އަށް ހާމަކުރަން ޖެހޭ މައުލޫމާތެއް އޮތް ނަމަ ހާމަކުރާނެ ކަމަށް ވެސް އެ މެސެޖުގައިވެ އެވެ.
އެމްއެންޑީއެފުން އެޅި ފިޔަވަޅާ ގުޅޭ ގޮތުން މައުމޫން ވިދާޅުވެފައި ވަނީ އެ މަނިކުފާނަށް ހަމަލާއެއް ދޭން އުޅޭ ކަމުގެ މައުލޫމާތު ލިބިވަޑައިގެންފައި ނުވާ ކަމަށެވެ. އެހެންކަމުން ސިފައިން އެ ބުނާ ގެއްލުމެއްގެ ތަފްސީލް ދެއްވަން އެދި ޑިފެންސް މިނިސްޓްރީ އަށް ވަނީ ސިޓީއެއް ފޮނުއްވައިފަ އެވެ. އަމިއްލަފުޅަށް ސަލާމަތީ ކަންތައް ވަރުގަދަ ކުރެވޭނީ ވެސް އެ ތަފްސީލުތައް ލިބިގެން ކަމަށް މައުމޫން ވަނީ ވިދާޅުވެފަ އެވެ.