08 ޖެނުއަރީ 2018 - 11:35
ދޯހާ، ގަތަރު (ޖެނުއަރީ 8) – ރެއާލް މެޑްރިޑާއި އިންޓަ މިލާނުގެ ކުރީގެ މިޑްފީލްޑަރު ނެދަލެންޑްސްގެ ވެސްލީ ޝްނައިޑާ ގަތަރުގެ އަލް-ގަރާފާ އަށް ބަދަލުވެއްޖެ އެވެ.
ނެދަލެންޑްސް ގައުމީ ޓީމަށް އެންމެ ގިނަ މެޗު ކުޅެދިނުމުގެ ރެކޯޑް އޮންނަ ޝްނެއިޑާ ވަނީ ގަރާފާއާ އެކު 18 މަސް ދުވަހުގެ ކޮންޓްރެކްޓެއްގައި ސޮއިކޮށްފަ އެވެ.
އުމުރުން 33 އަހަރުގެ ކުޅުންތެރިޔާ އެންމެ ފަހުން ކުޅުނީ ފްރާންސުގެ ނީސް އަށެވެ. އޭނާ އެ ޓީމަށް ކުޅެދިނީ އެންމެ ހަތަރު މެޗެވެ. އޭގެ ކުރިން ކުޅުނީ ތުރުކީގެ ގަލަތަސަރާއީ އަށެވެ.
ނެދަލެންޑްސްގެ އަޔަކްސް އިން ކެރިއަރު ފެށި ޝްނެއިޑާ އެ ޓީމާ އެކު ލީގު ކާމިޔާބުކުރުމަށް ފަހު 2007 ވަނަ އަހަރު ރެއާލް މެޑްރިޑަށް ބަދަލުވި އެވެ. އެ ޓީމަށް ކުޅުނު ދެ އަހަރުގެ ތެރޭގައި އޭނާ އަށް އެންމެ ރަނގަޅު ކުޅުމެއް ނުދެއްކެ އެވެ. އޭގެ ފަހުން އިންޓަ އަށް ބަދަލުވެ ގިނަ ކާމިޔާބީތަކެއް ހޯދި އެވެ. އެގޮތުން އެ ޓީމުން 2010 ވަނަ އަހަރު ޗެމްޕިއަންސް ލީގާއި އިޓާލިއަން ލީގު އަދި އިޓާލިއަން ކަޕް ކާމިޔާބުކުރިއިރު މޮޅު ކުޅުމެއް ދެއްކިއިރު އެ އަހަރުގެ ވޯލްޑް ކަޕުގެ ފައިނަލަށް ނެދަލެންޑްސްއާ އެކު ދިޔަ އެވެ. އޭނާ ގަލަތަސަރާއީ އަށް ބަދަލުވީ 2013 ވަނަ އަހަރެވެ.
އަލް-ގަރާފާ އަށް ވަނީ ފްރާންސާ އެކު 1998 ވަނަ އަހަރުގެ ވޯލްޑް ކަޕް ކާމިޔާބުކުރި އޭސީ މިލާނުގެ ތަރި މާސެލް ޑެސައިލީ ވެސް ކުޅެފަ އެވެ. ގަތަރު ލީގުގައި ކުޅެފައިވާ މަޝްހޫރު އެހެން ކުޅުންތެރިންގެ ތެރޭގައި ރެއާލް މެޑްރިޑާއި ސްޕެއިނުގެ ޑިފެންޑަރު ފެނާންޑޯ ހިއޭރޯ އާއި ނެދަލެންޑްސްގެ ރޮނާލްޑް ޑި ބޮއާ އާއި ފްރޭންކް ޑި ބޮއާ އަދި ބާސެލޯނާގެ ތަރި ޒަވީ ހިމެނެ އެވެ.