02 ޖެނުއަރީ 2018 - 16:29
ރ. އަލިފުށީ ޓްވިންޕީކްސް ގޭގައި މިދިޔަ އާދީއްތަ ދުވަހުގެ ރޭ ރޯވެ އެނދީ ބަޔަކު ގަސްތުގައި އެ ގޭގައި ރޯކޮށްލުމުން ކަމަށް، އެ ގޭގެ ވެރި ފަރާތުން މިއަދު ތުހުމަތު ކޮށްފި އެވެ.
އެ ގޭގަައި އަލިފާން ރޯވެ ބޭނުން ނުކުރެވޭ ވަރަށް ވަނީ އަނދައިފަ އެވެ. ގޭގެ ވެރިފަރާތް އަލީ ހަސަން ބުނީ ގެއްލުމެއް ދޭނެ ކަމަށް މީގެ ކުރިން މީހަކު އިންޒާރު ދީފައިވާ ކަމަށެވެ. އެހެންވެ އެއީ ބަޔަކު ގަސްތުގައި ކުރި ކަމެއް ކަމަށް އޭނާ ބުންޏެވެ.
އޮޑިދޯނިފަހަރު ބަނުމުގެ މަސައްކަތް ކުރަމުން އަންނަ އަލީ މިދިޔަ އާދިއްތަ ދުވަހު އެ ރަށަށް ދިޔައީ، އޭނާގެ ކުންފުނިން ހަދަމުން އަންނަ ޔޮޓެއްގެ މަސައްކަތްތައް ބެލުމަށެވެ.
އެ ގޭގެ މީހުން ދިރިއުޅެނީ މާލޭގައި ކަމަށްވާތީ އެ ގެ ހުންނަނީ އާންމުކޮށް ހުހަށެވެ. އެކަމަކު އަލިފާނުގެ ހާދިސާ ހިނގީ އެ ރޭ އަލީ ގޭގައި އުޅެނިކޮށެވެ.
އޭނާ ބުނީ އާދިއްތަ ދުވަހުގެ ރޭ ބޭއްވި ބާބެކިއުއެއް ނިންމާލާފައި 2:00 ހާއިރު ގެއަށް ގޮސް އުޅެނިކޮށް އެރޭ 3:00 ހާއިރު ބޭރުން އެއްޗެއް ގޮވާ އަޑު އިވުނު ކަމަށެވެ. އެ އަޑަށް ބޭރަށް ނުކުމެ ބަލައިލި އިރު ސައިކަލުގައި ރޯކޮށްލާފައިވާ ކަމަށް އޭނާ ބުންޏެވެ.
"ބާބެކިއު ނިންމާލާފައި ދޭއް ޖަހާކަށް ހާއިރު ގެ އަށް އައިސް ނިދަން ވެގެން ޖައްސާލީ. އެ ރޭ އާ އަހަރު ވީމާ ރަށުގައި ފުޅި އެއްޗެހި ގޮއްވާ ހެދިީމަ ފުރަތަމަ ހީކުރީ ފުޅިއެއް ގޮއްވީ ކަމަށް. އެކަމަކު ތިނެއް ޖަހާކަށްހާއިރު ބޭރު ބަލައިލި އިރު ސައިކަލުގައި ރޯވެފައި ހުރީ،" އަލީ ބުންޏެވެ.
"ގޭ ކައިރި މީހުންނަށް ގޮވާފައި އައި އިރު ހުޅުގަނޑު ބޮޑުވެ ގޭގައި ރޯވެފައި ހުރީ. އެ ކުޑަ ވަގުތު ކޮޅުގައި އަލިފާން ރޯވާނީ މުޅި ގެ އަށް ވެސް ޕެޓްރޯލް ޖަހާފައި ހުރީމަ. މީހުންގެ އެހީތެރިކަމާއެކު އަލިފާންގަނޑު ނިއްވާލެވުނީ 5:15 ހާއިރު،"
ރޯވި ގެއަކީ މީގެ 11 އަހަރު ކުރިން އަލީ ގަނެގެން، ޒަމާނީ ފެންވަރަކަށް ހަދާފައި ހުރި ދެ ކޮޓަރީގެ އިމާރާތެކެވެ. ގެސްޓްހައުސްއެއް ގޮތަށް ހަދާފައި ހުރި އެ ތަނުގައި ރޯވެ ލިބުނު ގެއްލުން ދެ މިލިއަން ރުފިޔާއާ ގާތްކުރާނެ ކަމަށް އޭނާ ލަފާ ކުރެ އެވެ.
"އެންމެ ޒަމާނީ ފެންވަރަށް 2،500 އަކަފޫޓަށް ގޭ ހަދާފައި ހުންނާނީ. ބިން ވެސް އެއީ މީހެއްގެ އަތުން ގަނެފައި. އެހެންވެ ގެއްލުން ދެ މިލިއަން ރުފިޔާ ވަރު އަރާނެ ކަމަށް ލަފާކުރެވޭ،" އަލީ ބުންޏެވެ.
އެ ހާދިސާގައި އޭނާ އަށް ސަލާމަތް ކުރެވޭ ވަރުވީ ލެޕްޓޮޕެވެ. އޭގައި ޔޮޓާއި ބޯޓުތަކުގެ ގިނަ ކުރެހުންތަކެއް ހުންނާނެ ކަމަށް ބުންޏެވެ.
އޭނާ ވަނީ ބޯޓް ބިލްޑިންގެ ދާއިރާ އިން ގައުމީ އިނާމު ވެސް މިދިޔަ އަހަރު ހޯދައިފަ އެވެ.