31 ޑިސެމްބަރ 2017 - 06:50
ޖެނުއަރީ 1 ވަނަ ދުވަހަކީ ވިދްޔާ ބާލަންގެ 39 ވަނަ އުފަން ދުވަހެވެ. އެހެންކަމުން 40 އަހަރު ފުރެން ދެން އޮތީ އެންމެ އަހަރަކަށް ވާތީ އޭނާގެ އުފަން ދުވަސް ވަރަށް ގަދަޔަށް ފާހަގަކުރަން ވިދްޔާ ބޭނުންވެ އެވެ. އުމުރުން މިހާ ދުވަސް ވީއިރު ވެސް ކުއްޖަކު ނުހޯދާތީ ވަރަށް ގިނަ ބަޔަކު ވިދްޔާއާ ސުވާލު ކުރެ އެވެ.
ވިދްޔާ އާއި ފިރިމީހާ ސިދާރްތު ރޯއި ކަޕޫރުގެ ކައިވެންޏަށް މިހާރު ފަސް އަހަރަށް ވުރެ ގިނަ ދުވަސް ވެއްޖެ އެވެ. ނަމަވެސް މިހާތަނަށް ކުއްޖަކު ހޯދާކަށް އެމީހުން ވިސްނާފައެއް ނެތެވެ.
ދާދި ފަހުން ނޫސްވެރިޔަކު ވަނީ ވިދްޔާއާ އެ ސުވާލުކޮށްފަ އެވެ. ޖަވާބުގައި އޭނާ ބުނީ ދަރިއަކު ހޯދާނެ ވަގުތެއް ނެތް ކަމަށެވެ. އޭނާ ކުޅޭ ކޮންމެ ފިލްމަކީ އޭނާގެ "ދަރިއެއް" ކަމަށް ވެސް ބުންޏެވެ.
"އަހަރެންގެ މިހާރު 20 ދަރިން އެބަ ތިބި. މިވަގުތު އަހަރެންގެ ހުރިހާ ސަމާލުކަމެއް ހުއްޓިފައި ހުރީ ފިލްމީ މަސައްކަތަށް. ރަނގަޅު މަސައްކަތްތަކެއް ކުރުމަށް،" ވިދްޔާ ބުންޏެވެ.
ބޮލީވުޑް ތަރިންގެ ތެރެއިން ވިދްޔާ ހިމެނެނީ އެންމެ ހުނަރުވެރި ބަތަލާއިންގެ ތެރޭގަ އެވެ. އޭނާގެ މި އަހަރު ރިލީޒްކުރި ފިލްމުތަކުގެ ތެރެއިން "ތުމްހާރީ ސޫލޫ" އަށް ވަނީ ވަރަށް ބޮޑު ކާމިޔާބެއް ލިބިފަ އެވެ. އަދި ފިލްމުގައި ވިދްޔާ ކުޅެފައިވާ ރޯލަށް ވެސް ގިނަ ބައެއްގެ ތައުރީފުކުރި އެވެ.
ވިދްޔާ ބުނީ ކޮންޓެންޓް ރަނގަޅިއްޔާ ކޮންމެ ފިލްމެއް ވެސް ހިނގާނެ ކަން މި އަހަރު ވަރަށް ބޮޑަށް ސާބިތުވެފައިވާ ކަމަށެވެ.
"މޮޅު ޑައިރެކްޓަރުންނާއި މޮޅު ތަރިންގެ ފިލްމުތައް ގުޅިގެން އުފައްދާ ކޮންޓެންޓް ރަނގަޅު ފިލްމުތައް ބެލުންތެރިން ބަލައިގަންނަކަން ވަނީ ޔަގީން ވެފައި. ބޮޑެތި ތަރިންނަކީ ފިލްމު ހިނގާނެކަމުގެ ގެރެންޓީއެއް އޮތް ކަމެއް ނޫން،" ވިދްޔާ ބުންޏެވެ.