28 ޑިސެމްބަރ 2017 - 10:49
ގދ. މަޑަވެލީގައި ހިންގަމުން އައި ފުލުހުންގެ ޕޯސްޓް، ބަޖެޓު ނެތުުމުން ބަންދުކުރަން އެ ރަށު ކައުންސިލުން ނިންމައިފި އެވެ.
މަޑަވެލީގެ ފުލުހުންގެ ޕޯސްޓް ހިންގަމުން އައީ އެ ރަށު ކައުންސިލްގެ ބަޖެޓުން ފުލުހުންގެ އެކޮމަޑޭޝަން ހަމަޖައްސައިދޭ ގޮތަށެވެ. އެކަމަކު އެ އިމާރާތައް ޚަރަދު ކުރާނެ ފައިސާ މަޑަވެލީގެ ކައުންސިލްގައި ނެތުމުން މިހާރު ވަނީ އެ ޚިދުމަތް މެދުކަނޑާލަން ނިންމައިފަ އެވެ.
ބޮޑެތި އާބާދީތައް ހިމެނޭ ރަށްތަކުގައި ފުލުހުންގެ މަރުކަޒުތައް ހަދައި ފުލުހުން ހަރަކާތްތެރިވަމުން ދިޔަ ނަމަވެސް އާބާދީ މަދު ރަށްތަކުގައި ޚިދުމަތް ދެނީ ކައުންސިލްތަކުން ވެސް ޚަރަދު ކުރާ ގޮތަށެވެ.
މަޑަވެލީގައި ފުލުހުންގެ ޚިދުމަތް ހުއްޓާލުމާ ގުޅިގެން، ފުލުހުންގެ މީޑިއާ އޮފިޝަލް މިއަދު ވިދާޅުވީ އެ ފިޔަވަޅު އެޅީ، ޚަރަދުތައް ހިއްސާ ކުރުމުގެ އުސޫލާ ގުޅޭގޮތުން ކުރި މަޝްވަރާތަކުގައި އެއްބަސްވުމަކަށް ނާދެވުމުން ކަމަށެވެ.
އެކަމާ ގުޅިގެން މަޑަވެލި ކައުންސިލްގެ ރަސްމީ ބަހެއް އަދި ވަނީ ލިބޭ ގޮތް ނުވެފަ އެވެ.
ކުރިއެކޭ އެއްގޮތަށް ދެން އެ ރަށަށް ފުލުހުން ދާނީ ކަމެއް ހިނގުމުން އެކަމެއް ތަހުގީގު ކުރުމަށެވެ. ރަށުގައި ފުލުހުން ގާއިމުވެ ނުތިބޭނެ އެވެ.
ފުލުހުންގެ މީޑިއާ އޮފިޝަލް ވިދާޅުވީ އަތޮޅުތެރޭގައި ފުލުހުންގެ ޚިދުމަތް ފުޅާކުރުމަށް މިހާރު އަމަލުކުރަމުންދާ އުސޫލުގެ ދަށުން އިސްކަންދެނީ ކައުންސިލްތަކާ ގުޅިގެން ޚަރަދުތައް ހިއްސާކުރާ ގޮތަށް ހިދުމަތް ދިނުމަށް ކަމަށެވެ.