02 ޖެނުއަރީ 2018 - 07:10
ސްމާޓްފޯނުތައް ބޮޑެތިކަމުންނާއި އެއަށް ގެއްލި މީހާ ޣާފިލުވާ ވަރުން ކޮންމެހެން ސްމާޓްފޯނެއް ގެންގުޅެން ބޭނުންނުވާ ވަގުތުތަކުގައި ބޭނުންކުރާނެ ކުޑަކުޑަ މޯބައިލް ފޯނެއް ބާޒާރަށް ނެރެފި އެވެ.
ޒެންކޯ ޓައިނީ ޓީ1 އަކީ ދެ އިނގިލި ކުރިން ވެސް ހިފާލެވޭހާ ކުޑަ ފޯނެކެވެ. ބޮޑުވައި އިނގިއްޔަކަށް ވުރެ ކުޑަ، ލާރިފޮއްޗަކަށް ވުރެ ލުއި މި މޯބައިލް ފޯނު އުފައްދާފައިވަނީ ހަމައެކަނި ފޯނުކުރުމާއި ފޯނަށް ޖަވާބުދިނުމާއި ޓެކްސްޓް މެސެޖުތައް ފޮނުވޭ ގޮތަށެވެ. މި ފޯނު ބޮޑަށް ވައްތަރުވަނީ ނޮކިއާ މޮޑެލްގެ "ބައްތި" ފޯނަކާ އެވެ.
މި ފޯނުގެ ދިގުމިނަކީ 47 މިލިމީޓަރެވެ. ފުޅާމިނުގައި ހުންނަނީ 21 މިލިމީޓަރެވެ. ބޯމިނުގައި 12 މިލމީޓަރެވެ. ބަރުދަނުގައި 13 ގްރާމެވެ. އަތް ތެރެއަށް ލާ ފޮރުވައިލެވޭހާ ކުޑަ އެވެ. އެކަމަކު މި ފޯނުގައި 300 ނަމްބަރު ރައްކާކުރެވެ އެވެ. ފަންސާސް މެސެޖު ފޮރުވާފައި ބޭއްވެ އެވެ. އަދި މި ފޯނުގައި އެކުލެވޭ 32 މެގަބައިޓް ސްޓޯރޭޖްގެ ސަބަބުން އެންމެ ފަހުން ގުޅި 50 ކޯލް ވެސް ބަލައިލެވެން ހުރެ އެވެ.
ޒެންކޯ ޓައިނީ ޓީ1 ބޭނުންކުރެވެނީ ހަމައެކަނި 2ޖީ ނެޓްވޯކުތަކުގަ އެވެ. ބްލޫޓޫތާއި މައިކްރޯ ޔޫއެސްބީ ކަނެކްޓްކުރެވެ އެވެ. މި ފޯނު އުފެއްދި އިނގިރސިވިލާތުގެ ޒެންކޯ ކުންފުނިން ގަބޫލުކުރާ ގޮތުގައި މިއީ ގެންގުޅެން ލުއި ފޯނަކަށް ވާތީ ކަސްރަތަށް ނުކުމެ އުޅޭ މީހުން އަތުގައި ބާއްވަން ވަރަށް އެކަށޭނަ އެއްޗެކެވެ.
އިންޓަނެޓެއް، 3ޖީއެއް 4ޖީއެއް ނުގުޅުނަސް، މިއީ ދަބަހަށް ލުއި، ހައްޓަށް ފަސޭހަ ފޯނެކެވެ. ޒެންކޯ ޓައިނީ ޓީ1 މިހާރު ލިބެން ހުރީ 30 ޔޫރޯއަށެވެ. މިހާރު އޯޑަރު ދޭ މީހުންނަށް މީގެ ފޯނު ލިބޭނީ މޭ 2018ގަ އެވެ.