25 ޑިސެމްބަރ 2017 - 06:36
ބިގް ބޮސް ސީޒަން 11 ގައި އެންމެ ފަހުން ޝޯއިން ބޭރަށް ދާން ޖެހުނީ އަރްޝީ ޚާން އަށެވެ. އޭނާއާ އެކު މި ހަފުތާގައި ނޮމިނޭޓް ވެފައި ވަނީ ޕުނީޝް ޝަރުމާ، ވިކާސް ގުޕްތާ، ލަވް ތިޔާގީ، އާކާޝް ދަދްލާނީ އަދި ޕްރިޔަންކް ޝަރުމާ އެވެ. ސޭފް މީހަކަށް ހުރީ ހަމައެކަނި ހިނާ ޚާން އެވެ.
ޝޯ ފެށިގެން އެންމެ ފުރަތަމަ ރައްކާތެރިކަން ލިބުނީ ވިކާސް އަށާއި އާކާޝް އަށެވެ. އެއަށް ފަހު ފަހަރަކު މީހަކަށް ވޯޓު ލިބިފައިވާ ވަރަށް ބަލައި ރައްކާތެރިކަން ލިބެމުން ގޮސް މި ހަފުތާގައި ބިގް ބޮސް ގެއިން ދާން ޖެހެނީ އަރްޝީ އަށް ކަމަށް ސަލްމާން އިއުލާން ކުރި އެވެ. އަރްޝީ ގެއިން ދާން ޖެހުމުން އެންމެ ދެރަވީ ވިކާސް އެވެ.
ބިގް ބޮސްގެ ގެއިން ނުކުމެގެން ޝޯގެ ހޯސްޓް ސަލްމާން ޚާނާ ބައްދަލުކޮށް އަރްޝީ ބުނީ ޝިލްޕާ އަކީ މަންމައެއް ފަދަ މީހެއް ކަމަށާއި ހިނާ އަކީ ހަރުފައެއް ކަމަށެވެ. ސަލްމާނާ އެކު އަރްޝީ ވަނީ ބިގް ބޮސްގެ ގޭގައި ބާކީ ތިބި ބައިވެރިންނާ ވީޑިއޯ މެދުވެރިކޮށް ވާހަކަ ދައްކައިފަ އެވެ. އަރްޝީ ފެނުމާ އެކު ވިކާސް އަށް ރޮވުނެވެ.
ދިއުމުގެ ކުރިން ބިގް ބޮސް ވަނީ އަރްޝީ އަށް ވަރަށް ވަރުގަދަ ބާރެއް ދީފަ އެވެ. ކުރިޔަށް އޮތް ހަފުތާގައި ދެ ބައިވެރިޔަކު ނޮމިނޭޝަނުން ސަލާމަތް ކުރުމުގެ ބާރެވެ. އޭނާ ނެގީ ޕްރިޔަންކް އާއި ވިކާސް އެވެ. މި ދެ މީހުންގެ ތެރެއިން ސެމީ ފައިނަލަށް ދާ ބައިވެރިޔަކު ހޮވީ ވަގުތުން ވޯޓުލައިގެންނެވެ.
ޕްރިޔަންކް އަށް 67 ޕަސެންޓް ވޯޓު ލިބުނުއިރު ވިކާސް އަށް 71 ޕަސެންޓް ވޯޓުން ސެމީ ފައިނަލަށް ހޮވުނީ އޭނާ އެވެ. މިފަހަރުގެ ޝޯ ކާމިޔާބުކުރުމުގެ ފުރުސަތު ވިކާސް އަށް ވަރަށް ބޮޑު ކަމަށް، ޝޯ ގަވާއިދުން ބަލާ ގިނަ ބަޔަކު މިހާރު ގަބޫލުކުރެ އެވެ. ސަބަބަކީ ބިގް ބޮސްގެ ގޭގައި ބާކީ ތިބި ގިނަ މީހުން ވިކާސްއާ ދިމާކުރާތީ ބެލުންތެރިންގެ ހިތް ވިކާސް އަށް ލެނބެމުން ދާތީ އެވެ.
"ބިގް ބޮސް" ގެ މިފަހަރުގެ ސީޒަން ނިމެން މިހާރު ބާކީ އޮތީ ތިން ހަފުތާ އެވެ. އެހެންކަމުން މިއީ ޝޯގެ ފޭނުން ނޭވާ ހިފަހައްޓާލަން ޖެހޭ ކަހަލަ ވަގުތުތައް އަންނާނެ ދުވަސްތަކަކަށް ވާނެ އެވެ. ސަބަބަކީ މިހާރު ތިބި ކޮންމެ މީހެއްގެ ވެސް އެތައް ހާސް ފޭނުންނެއް އެބަ ތިއްބެވެ.