10 ޖުލައި 2016 - 14:00
ވޮޝިންޓަން (ޖުލައި 10) - ގުއަންޓަނާމޯ ބޭ ޖަލުގެ ކުރީގެ ގައިދީއަކު އުރުގުއާއީން ގެއްލުމުން ރައީސް ބަރަކް އޮބާމާގެ ސަރުކާރަށް ޕްރެޝަރު ކުރިމަތިވެއްޖެ އެވެ.
ގާނޫނު ހަދާ މަޖިލީހުގެ ރިޕަބްލިކަން ޕާޓީގެ މެންބަރުން ބުނީ ގުއަންޓަނާމޯ ބޭ ޖަލުގެ ގައިދީއަކު ގެއްލުމަކީ ވަރަށް ބޮޑު މައްސަލައެއް ކަމަށާއި އެއީ އެމެރިކާ އަށް ހަމަލާ ދިނުމުގެ ނުރައްކާ އޮތް ކަމެއް ކަމަށެވެ.
އުރުގުއާއީން ގެއްލިފައި ވަނީ 44 އަހަރުގެ ސީރިއާގެ ރައްޔިތެކެވެ. އިތުރު ފަސް މީހުންނާ އެކު އޭނާ އުރުގުއާއީ އަށް ބަދަލުކުރީ 2014 ވަނަ އަހަރު އެވެ. ދެކުނު އެމެރިކާގެ ގައުމުގެ ރާޑަރުތަކުން އޭނާ ގެއްލުނުތާ ދުވަސްކޮޅެއް ވެއްޖެ އެވެ. ބޯޑާ ކޮންޓްރޯލް ނިޒާމަށް ފިލައިގެން އޭނާ ބްރެޒިލަށް އެތެރެވެފައިވާ ކަމަށްވެ އެވެ. ގައިދީ ބްރެޒިލަށް އެތެރެވެފައި މި ވަނީ ރިއޯގައި އޮގަސްޓް މަހު ފަށާ އޮލިމްޕިކްސްގެ ސަލާމަތާ މެދު ކަންބޮޑުވުންތައް އުފެދިފައި ވަނިކޮށެވެ.
ރައީސް ބަރަކް އޮބާމާގެ ދައުރު ޖެނުއަރީ މަހު ނިމުމުގެ ކުރިން ގުއަންޓަނާމޯ ބޭ ޖަލުގައި މިހާރު ތިބި 79 ގައިދީންގެ ތެރޭން 29 ގައިދީން އެކި ގައުމުތަކަށް ބަދަލުކޮށް ނިންމާލެވޭނެ ކަމަށް އެމަނިކުފާނު އުއްމީދު ކުރައްވަ އެވެ. އަދި ބާކީ ތިބި 50 މީހުން ވެސް އެހެން ޖަލަކަށް ބަދަލުކޮށް އޮބާމާގެ ވައުދާ އެއްގޮތަށް ގުއަންޓަނާމޯ ބޭ ޖަލު ބަންދު ކުރަން ވަނީ ނިންމައިފަ އެވެ.
އެމެރިކާ ސަރުކާރުގެ ހިސާބުތަކުން ދައްކާ ގޮތުގައި ރައީސް އޮބާމާގެ ވެރިކަމުގައި ގުއަންޓަނާމޯ ބޭ ޖަލުން މިނިވަން ކުރި ގައިދީންގެ ތެރޭން 13 ޕަސެންޓް މީހުން ވަނީ ހައްދުފަހަނަޅާ ދިއުމަށް އަލުން ރުޖޫއަވެފަ އެވެ. ގުއަންޓަނާމޯ ބޭ ޖަލު ބަންދު ކުރުމަށް ޕެންޓަގަނުން ކަނޑައަޅާފައިވާ ޚާއްސަ މަންދޫބު ޕޯލް ލުވިސް ވިދާޅުވީ ގުއަންޓަނާމޯ ބޭ ޖަލުގެ ކުރީގެ 14 ގައިދީ އަކު ވަނީ އެމެރިކާ މީހުންނާ ދެކޮޅަށް ދިން ހަމަލާތަކުގައި ބައިވެރިވެފައި ކަމަށެވެ.