22 ޑިސެމްބަރ 2017 - 07:15
ބެންގަލޫރުގެ ރަށްވެއްސެއް ކަމަށްވާ އަދިތުޔާ ހެގްޅޭ ވަނީ ރޭލުގައި ވަރަށް ދިގު ދަތުރެއް ކޮށް ޗެންނައި ހޮސްޕިޓަލަށް ގޮސް އެތަނުގައި އޮތް މާބަނޑު އަންހެނަކަށް ލޭ ހަދިޔާކޮށްގެން ފުރާނަ ސަލާމަތް ކޮށްދީފަ އެވެ. މިދިޔަ އަންގާރަ ދުވަހު އޭނާ ލޭ ހަދިޔާކުރީ 21 އަހަރުގެ އަންހެނަކަށެވެ. ލޭ ހަދިޔާ ކުރުމުން އެ މީހާ ވަނީ ރައްކާތެރިކަމާ އެކު ވިހާފަ އެވެ.
އިންޑިއާގެ ވިލުއްޕްރަމް ޑިސްޓްރިކްޓްގެ ސަރުކާރު ހޮސްޕިޓަލެއްގައި މީތިލީ ވިހޭ މިއީ ދެ ވަނަ ފަހަރެވެ. ފުރަތަމަ ދަރިފުޅު އޭނާ ވިހެއީ މީގެ ދެ އަހަރު ކުރިން ނަމަވެސް މިދިޔަ އަންގާރަ ދުވަހު އޭނާ ހަމަ އެ ހޮސްޕިޓަލަށް ވިހަން ދިއުމުން ޑޮކްޓަރުންނަށް އޭނާ ވަގުތުން ފާހަގަކުރެވުނެވެ. ސަބަބަކީ އޭނާގެ ގައިގައި ހުރީ ވަރަށް ތަދު ލޭގެ ގްރޫޕެއް ކަމަށް ވާތީ އެވެ. އެއީ އެޗްއެޗް ނެގެޓިވް ގްރޫޕް ނުވަތަ ބޮމްބޭ ގްރޫޕެވެ.
އާންމުކޮށް މީހުންގެ ގައިގައި ހުންނަނީ އޭ، ބީ، އޭބީ އަދި އޯ ލޭގެ ގްރޫޕްތަކެވެ. އެޗްއެޗް އަކީ ވަރަށް މަދު ބައެއްގެ ގައިގައި ހުންނަ ލެއެކެވެ.
ލޭގެ ގްރޫޕް އޭ ހުންނަ މީހުންގެ ލޭގައި ހުންނާނީ އެންޓިޖެން އެވެ. ބީ ހުންނަ މީހުންގެ އެންޓިބޮޑީ އެވެ. އޭބީ ހުންނަ މީހުންގެ ހުންނާނީ އެންޓިޖަންސްތަކެވެ. އެންޓިބޮޑީއެއް ނުހުރެ އެވެ. އޯ ގްރޫޕް ހުންނަ މީހުންގެ ހުންނާނީ ހުސް އެންޓިބޮޑީޒް އެވެ. މި ހުރިހާ ގްރޫޕެއްގައި އެޗް ކިޔާ އެންޓިޖަން އެއްވެސް ހުރެ އެވެ. ބޮމްބޭ ގްރޫޕްގެ ލޭގައި ހުންނަނީ ތިން އެންޓިބޮޑީޒް އެވެ. ތިން އެންޓީޖަނުންގެ ތެރެއިން އެންމެ އެންޓިޖަން އެއްވެސް މި މީހުންގެ ލެއަކު ނުހުރެ އެވެ.
އެ ހޮސްޕިޓަލަށް މިހާތަނަށް ފާހަގަކުރެވިފައިވަނީ ބޮމްބޭ ބްލަޑް ގްރޫޕްގެ އެންމެ 10 މީހުންނެވެ. ނަމަވެސް އެ މީހުން އާރްއެޗް ޕޮޒިޓިވް ވިޔަސ. މީތަލީގެ އާރްއެޗް ނެގެޓިވް އެވެ.
މީގެ ދެ އަހަރު ކުރިން މީތަލީ ފުރަތަމަ ފަހަރަށް ހޮސްޕިޓަލަށް ވިހަން ދިއުމުން ބްލަޑް ބޭންކްގައި ތިބި މީހުންނަށް އެނގުނީ އޭނާގެ ލޭގެ ގްރޫޕް އަދި މާ ތަދު އެއްޗެއްގެ ގޮތުގަ އެވެ. މީތަލީ އަކީ އެތައް އަހަރުތަކެއް ފަހުން އެ ހޮސްޕިޓަލަށް ފަރުވާ ހޯދަން ދިޔަ ބޮމްބޭ ނެގެޓިވް ލޭ ހުރި ފުރަތަމަ މީހާ އެވެ.
"އެފަހަރު ނަސީބަކުން ލޭ އަޅާކަށް ނުޖެހުނު. އަހަރެމެން ބުނިން އެހާ އަވަހަށް ދެން ބަލިވެ ނީންނައްޗޭ. ސަބަބަކީ ދެން ފަހަރަކުން ސިޒޭރިއަން ހަދަން ޖެހިއްޖިއްޔާ ލޭ އަަޅަން ޖެހިދާނޭ،" ހޮސްޕިޓަލްގެ އޮފިޝަލަކު ބުންޏެވެ.
"މާބަނޑުވެއްޖެ ނަމަ ސިޒޭރިއަން ހެދުމުގެ 15 ވަރަކަށް ދުވަސް ކުރިން ހޮސްޕިޓަލަށް އައުމަށް އަހަރެމެން މީތަލީ އަށް ނަސޭހަތްތެރިވިން. އެއީ އޭނާގެ އަމިއްލަ ގައިން ލޭ ނަގާފައި އޭނާއަށް ފަހުން ދޭން ރައްކާކުރަން."
ނަމަވެސް ޑޮކްޓަރުން އިރުޝާދާ އެއްގޮތަށް މައިތަލީއަކަށް ކަންތަކެއް ނުކުރެވުނެވެ. ފުރަތަމަ ކުއްޖާ ވިހޭތާ އެންމެ ހަ މަސް ތެރޭ މީތަލީ އަނެއްކާ ބަލިވެ އިނެވެ. އޭނާއަށް ވިހަން ދެވުނީ ވެސް ބަނޑުގައި ރިއްސަން ފެށީމަ އެވެ.
މީތަލީ އަށް ލޭ ހޯދަން ހޮސްޕިޓަލުން ވަރަށް މަސައްކަތް ކުރި އެވެ. އެމީހުންނަށް އެހީތެރިވީ ހޮސްޕިޓަލަށް އައި މެހެމާނެކެވެ. އޭނާއަކީ ނޫހެއްގައި މަސައްކަތްކުރާ މީހަކަށް ވާތީ އެކި ސްޓޭޓްތަކުގެ ގްރޫޕްތަކަށް މެސެޖް ފޮނުވައިގެން އެންމެ ފަހުން ހެގްޅޭއާ ގުޅޭ ގޮތް ވީ އެވެ.
ހޯމަ ދުވަހު ހެނދުނު ހެގްޅޭ ރޭލުގައި ޗެންނައި އަށް ދަތުރު ފެށީ އެވެ. އަދި ދިގު ދަތުރު ކޮށްފައި ގޮސް މީތަލީ އަށް ލޭ ހަދިޔާ ކުރި އެވެ. އަނެއް ދުވަހު އަލުން އަނބުރާ ބެންގަލޫރަށް ގޮސް އޮފީހަށް މަސައްކަތްކުރަން ވެސް ނިކުތެވެ.
"އަހަރެން މިހާރު 55 ފަހަރު ލޭ ހަދިޔާ ކޮށްފިން. އާއްމުކޮށް އަހަރެން ލޭ ހަދިޔާކުރުމަށް ފަހު ކޫރިއާ ކުރަނީ. އަހަރެންގެ ލޭ މެލޭޝިޔާ، ޕާކިސްތާން އަދި ސްރީ ލަންކާ އަށް ވެސް ފޮނުވިން. ނަމަވެސް މީތަލީގެ ޑޮކްޓަރުން ބުނީ އޭނާގެ ގަޔަށް އަޅަން ބޭނުމީ ތާޒާ ލެޔޭ. އެހެންވެ އަހަންނަށް ދާން ޖެހުނީ،" ހެގްޅޭ ބުންޏެވެ.
ޑޮކްޓަރުން މީތަލީގެ ސިޒޭރިއަން ހަދަމުން ދިޔައިރު ހެގްޅޭ ރޭލުގައި ޗެންނައި އަށް ދިޔައީ ދަތުރު ކުރަމުންނެވެ. އަދި ލޭ އަޅަން ވީއިރަށް އޭނާ ހުރީ ހޮސްޕިޓަލުގަ އެވެ. އެހެންވެ މީތަލީގެ ގަޔަށް އޭނާގެ ގައިން ތާޒާ ލޭ އެޅޭ ގޮތްވެ އޭނާ އާއި ދަރިފުޅު ސަލާމަތް ކުރެވުނީތީ ހެގްޅޭ ހުރީ އުފާވެފަ އެވެ.
މީތަލީ ބުނީ ހެގްޅޭ އަކީ އޭނާއަށް ލެއްވި ރަހުމަތެއް ކަމަށެވެ. އޭނާ ނުފެނުނު ނަމަ ފުރާނައަށް ވެސް ގެއްލުންވުމުގެ ބިރު އޮތް ކަމަށް މީތަލީ ބުންޏެވެ. އެހެންވެ މީތަލީ ވެސް މިހާރު ވަނީ ލޭ ހަދިޔާކުރަން ރަޖިސްޓްރީކޮށްފަ އެވެ. ބޮމްބޭ ނެގެޓިވް ގްރޫޕް ބޭނުންވާ މީހަކު ހުރި ނަމަ މީތަލީ ވެސް ލޭ ހަދިޔާ ކުރާނެ އެވެ.