20 ޑިސެމްބަރ 2017 - 06:06
އަލަތު ކައިވެންޏަށް ފަހު ކެރީބިއަންގެ ރަށަކަށް ހަނީމޫނަށް ގޮސް އުޅުނު އެމެރިކާގެ ސައުތު ކެރޮލައިނާގެ އަންހެނެއް ކަމަށްވާ ސާރާ ލިލިގް، ސްނޯކްލިން ކުރަނިކޮށް ކުއްލިއަކަށް އަތުގައި އެއްޗެއް ޖެހުނު ހެން ހީވި އެވެ. އޭނާ ހީކުރީ ފިރިމީހާ ސަކަރާތް ޖަހަނީ ކަމަށެެވެ.
އަތުގައި މިޔަރެއް ދަތްއެޅިކަން އެނގުނީ ކުއްލިއަކަށް މާ ބޮޑަށް އަތަށް ތަދުވުމުންނެވެ. އެއާއެކު ވަރަށް ބާރަށް ފަތައިގަނެ މިޔަރުގެ ކިބައިން ސަލާމަތް ވެވުނެވެ. ނަމަވެސް އޭރު އޭނާގެ އަތްތިލައިން ތަންކޮޅެއް ވަނީ ވަކިވެފަ އެވެ.
ސާރާގެ ފިރިމީހާ އީވާން ކެރޯލް އެވަގުތު އޮތީ ތަންކޮޅެއް ދުރުގައި ސާރާ މޫވީ ކުރާށެވެ. މިޔަރުގެ ހަމަލާ ކުރިމަތިވީ ކުއްލިއަކަށް ކަމަށް ވާތީ އަންހެނުންނަށް އެހީތެރިވާން އެއްވެސް ކަމެއް އޭނާއަކަށް ނުކުރެވުނެވެ.
"ފެންގަނޑު ކަފާލާ ކަހަލަ ވައި އަޑެއް އަހަންނަށް އިވުނު. އަދި އެއްޗެއް އައިސް އަހަރެންގެ އަތުގައި ޖެހުނުކަން އެނގުނު. އަހަރެން ހީކުރީ ފިރިމީހާ މަޖަލަކަށް ކަމެއް ކުރިއްޔޭ. ނަމަވެސް ކުޑަ ހިނދުކޮޅެއް ތެރޭގައި އަތަށް ވަރަށް ތަދުވާން ފެށީމަ ފަހަތަށް ބަލައިލީ،" ސާރާ ބުންޏެވެ.
"ގޮގްލްސް އިން ދެ ފަރާތް އިންނަނީ ވަރަށް ބޮޑަށް ބްލޮކް ވެފައި. އެހެންވެ އެއް ފަރާތުގައި އޮތް ފަސް ފޫޓު ބޮޑު މިޔަރު ނުފެނުނީ. އަހަންނަށް ވުރެ ވެސް ބޮޑު މިޔަރު އޭރު އޮތީ އަަހަރެންގެ އަތުގައި ރަނގަޅަށް ދަތް އަޅައިގެން."
ސާރާ ބުނި ގޮތުގައި އޭނާ ކުއްލިއަކަށް މިޔަރުގެ ގައިގައި އަޅާ ކޮއްޕާލާފައި އަނެއް ކޮޅަށް ފަތައިގަތީ އެވެ.
މި ދެމަފިރިން ވަނީ މިޔަރު ހަަމަލަދޭ ވީޑިއޯ ސޯޝަލް މީޑިއާގައި އާއްމުކޮށްފަ އެވެ. ސާރާ ބުނި ގޮތުގައި އޭނާއަށް ހަމަލަދިނީ ފަސް ފޫޓުގެ 'ނާސް ޝާކެ"ކެވެ. އޭގެ ނަގުލަށް ދަމާ، ކާން ދީ ކަންތައް ނުކުރާ ނަމަ އެ ވައްތަރުގެ މިޔަރު ހަމަލާ ނުދޭނެ ކަމަށް ބުނެ އެވެ. ނަމަވެސް އޭނާ އަށް ހަމަލާ ދިނީ އެފަދަ އެއްވެސް ކަމެއް ކޮށްގެން ނޫންކަން ވީޑިއޯއިން އެނގެ އެވެ.