18 ޑިސެމްބަރ 2017 - 11:33
ގުދުސަކީ އިޒްރޭލުގެ ވެރިރަށް ކަމަށް އިއުތިރާފްވެ، އިޒްރޭލުގައި ހުންނަ އެމެރިކާގެ އެމްބަސީ ގުދުސަށް ބަދަލުކުރުމަށް، މި މަހުގެ 6 ވަނަ ދުވަހު އެމެރިކާގެ ރައީސް ޑޮނަލްޑް ޓްރަމްޕު ނިންމެވުމާ ގުޅިގެން އެކަމާ ދެކޮޅު ހެދުމުގެ ގޮތުން ދުނިޔޭގެ އެކި ގައުމުތަކުގައި ކުރާ މުޒާހަރާތައް އިތުރުވެ ވަރުގަދަ ވާން ފަށައިފި އެވެ.
ޔޫރަޕްގައި އޮތް ހަމައެކަނި އިސްލާމީ ގައުމު ކަމުގައިވާ ތުރުކީ ވިލާތުގެ އަންކަރާގައި އިއްޔެ ވެސް ގިނަ އަދަދެއްގެ ބަޔަކު މައިދާންތަކަށާއި މަގުތަކަށް ނުކުމެ މުޒާހަރާ ކުރި އެވެ. ގުދުސްގެ މިނިވަންކަން ދެމެހެއްޓުމަށާއި ގުދުސްގެ ސަލާމަތީ ކަންތަކަށް ރައްކާތެރި ވުމަށް އެމީހުން ގޮވަމުން ދިޔަ އެވެ. އަދި ގުދުސްގެ ހިމާޔަތުގައި އިސްލާމީ ސަރުކާރުތައް ތެދުވުމަށާއި ގުދުސްގެ ހައިބަތު ހިފެހެއްޓުމަށް ގޮވާލާފައިވެ އެވެ.
އިސްލާމީ ގައުމުތަކުގައި އިއްޔެ ކުރި މުޒާހަރާތަކުގައި، އިޒްރޭލާއި އެމެރިކާ ބޮއިކޮޓް ކުރުމަށާއި އެ ދެ ގައުމަށް އަދަބު ދިނުމަށް ވެސް ގޮވާލާފައިވެ އެވެ. އަދި ގުދުސްގެ ހިމާޔަތުގައި މަސައްކަތް ކުރާ މީހުންނަށް އިސްލާމީ ހުރިހާ ގައުމުތަކުން އެހީތެރިވުމަށް ވެސް މުޒާހަރާގެ ބައިވެރިން ގޮވާލާފައިވެ އެވެ.
ތުރުކީގެ އަންކަރާގައި ބޭއްވި މުޒާހަރާ އަށް، ފަލަސްތީނުގެ ހަމާސް ޖަމާއަތުގެ ވެރިޔާ އިސްމާއީލް ހަނިއްޔާ ފޮނުއްވެވި ވީޑިއޯ މެސެޖެއްގައި، ގުދުސްގެ ހިމާޔަތުގައި ތުރުކީ ރައްޔިތުން ކުރަމުންދާ މަސައްކަތަށް ޝުކުރު އަދާކުރައްވާފައިވެ އެވެ. އަދި ގުދުސްގެ ހިމާޔަތުގައި ފަލަސްތީނު މީހުން ސާބިތުވެ ތިބީ ފިސާރި ވަރުގަދަ އަށް ކަން ކަށަވަރު ކޮށްދެއްވަައި، ގުދުސްގެ އެންމެ ކައިވަތެއްހާ މިންވަރު ދޫކޮށްނުލާނެ ކަމަށް އޭނާ ވިދާޅުވި އެވެ.
އިންޑޮނީޝިޔާގެ ވެރިރަށް ޖަކާޓާގައި ވެސް ވަރަށް ގިނަ މީހުން އިއްޔެ މުޒާހަރާ ކުރި އެވެ. އިންޑޮނީޝިޔާގެ އިލްމުވެރިންގެ މަޖިލީހުގެ ގޮވައިލުމަކަށް، މިނިވަންކަމުގެ މައިދާނަށް ނުކުތް މީހުންގެ އަދަދު މިލިއަނަކަށް އަރާނެ ކަމަށް އެ ގައުމުގެ ޚަބަރު ފަތުރާ ވަސީލަތްތަކުން ބުނެ އެވެ.
ޖަކާޓާގައި އިއްޔެ ކުރި މުޒާހަރާގައި އެ ގައުމުގެ ގިނަ އިލްމުވެރިންތަކެއްގެ އިތުރުން، އިންޑޮނީޝިޔާ ސަރުކާރުގެ އިސް ބައެއް ވެރިން ވެސް ބައިވެރިވެވަޑައިގަތެވެ. އަަދި ބޮޑެތި ޖަމިއްޔާތައް ވެސް ބައިވެރިވި އެވެ.
މި މުޒާހަރާގެ ބައިވެރިން އިންޑޮނީޝިޔާ ސަރުކާރަށާއި އިސްލާމީ އެހެން ގައުމުތަކަށް ގޮވައިލީ، އެއްވެސް ހާލަތެއްގައި އިޒްރޭލުގެ ދައުލަތް ގަބޫލު ނުކުރުމަށާއި އިޒްރޭލާއި އެމެރިކާގެ އުފެއްދުންތައް ބޮއިކޮޓް ކުރުމަށެވެ. އަދި އިސްލާމީ ގައުމުތަކާއި އަރަބި ގައުމުތަކުގައި ހުރި ދެބަސްވުންތައް އެއްފަރާތްކޮށް، ގުދުސްގެ ހިމާޔަތުގައި އެއްބަައިވުމަށް ވެސް ގޮވާލާފައިވެ އެވެ.
ޕާކިސްތާނުގެ ކަރާޗީގައި އިއްޔެ ކުރި މުޒާހަރާގައި ވެސް އެންމެ ބޮޑަށް އަޑު އުފުލާފައިވަނީ އިޒްރޭލާއި އެމެރިކާގެ އުފެއްދުންތައް ބޮއިކޮޓް ކުރުމަށެވެ. އަދި ގުދުސާ ބެހޭ ގޮތުން ޓްރަމްޕު ނިންމެވި ނިންމެވުން އަނބުރާ ގެންދަވަންދެން މުޒާހަރާތައް ކުރާނެ ކަމަށް ވެސް އެމީހުން ބުންޏެވެ.
އެމެރިކާގެ ވެރިރަށް ވޮޝިންޓަންގައި ކުރި މުޒާހަރާގައި އެމެރިކާގައި އުޅޭ އަރަބީންނާއި ފަލަސްތީނު މީހުންނާއި އެމެރިކާ ރައްޔިތުންނާއި އެމެރިކާގައި ދިރިއުޅޭ ޔަހޫދީން ވެސް ބައިވެރިވި އެވެ. ފަލަސްތީނުގެ ދިދަތައް ހިފައިގެން ވައިޓް ހައުސް ކައިރީގައި ބޭއްވި މި މުޒާހަރާގައި ވެސް އެމެރިކާގެ ނިންމުން އަނބުރާ ގެންދިއުމަށް ގޮވާލާފައިވެ އެވެ. އަދި އިޒްރޭލުން ފަލަސްތީނުގެ ބިންތައް އަޅުވެތިކުރުން ހުއްޓައިލުމަށާއި ގުދުސް މިނިވަން ކުރުމަށް ވެސް ގޮވާލާފައިވެ އެވެ.
އިނގިރޭސި ވިލާތުގެ ވެރިރަށް ލަންޑަންގައި އިއްޔެ ބޭއްވި މުޒާހަރާގައި ވެސް ފަލަސްތީނު މީހުންނާއި އަރަބީންގެ އިތުރުން އިނގިރޭސި ރައްޔިތުން ވެސް ބައިވެރިވި އެވެ. މެންޗެސްޓާ ސިޓީގެ ޕިކާޑްލީ މައިދާނަށް އެއްވި މީހުން ވެސް ގުދުސްގެ ހިމާޔަތުގައި ތިބި ކަން ފާޅުކޮށްފައިވެ އެވެ. އަދި ގުދުސްގެ މައްސަލައިގައި އެމެރިކާ އިން ނިންމާފައިވާ ނިންމުމާ ދެކޮޅު ހެދުމަށް ވިލާތުގެ ގައުމުތަކަށް ގޮވާލާފައިވެ އެވެ.