18 ޑިސެމްބަރ 2017 - 06:48
އަކްޝޭ ކުމާރުގެ އާ ފިލްމު "ޕެޑްމޭން"ގެ ފުރަތަމަ އިޝްތިހާރު މިހާރު ވަނީ ދައްކަން ފަށާފަ އެވެ. އެ އިޝްތިހާރުގައި ބުނަނީ އެމެރިކާގެ އަތުގައި ސުޕަމޭން އާއި ބެޓްމޭން އަދި ސްޕައިޑަމޭން އޮތް ނަމަވެސް ޕެޑްމޭން އޮތީ އިންޑިޔާގެ އަތުގައި ކަމަށެވެ.
އަކްޝޭގެ އަންހެނުން ޓްވިންކަލް ކަންނާ ޕްރޮޑިއުސަރެއްގެ ގޮތުން އުފައްދާ ފުރަތަމަ ފިލްމު "ޕެޑްމޭން" އަކީ ހަގީގީ ވާހަކައެއްގެ މައްޗަށް ކުޅެފައިވާ ފިލްމެކެވެ. މިއީ އަރުނަޗަލަމް މުރުގަނަންތަމްގެ ވާހަކަ އެވެ. އޭނާ އަކީ ހަގީގަތުގައި ވެސް ހަަމަ ސުޕަހީރޯއެއް ފަދަ މީހެކެވެ. ދުނިޔޭގައި ފުރަތަމަ ފަހަރަށް ވަރަށް އަގުހެޔޮކޮށް ސެނިޓަރީ ނެޕްކިންސް އުފައްދާ މެޝިނެއް އީޖާދުކުރުމުގެ މުގުލުގައި ހުރި މީހާ އެވެ.
ޕެޑްމޭންގެ މި ދަތުރަކީ އެހާ ފަސޭހަ ދަތުރެއް ނޫނެވެ. މި އުނދަގޫ ދަތުރު ފިލްމެއްގެ ސިފައިގައި ސްކްރީނަށް އަންނައިރު އެންމެ މުހިއްމު ރޯލެއް ކުޅެނީ އަކްޝޭ އެވެ. މި ފިލްމުގައި ރާދިކާ އަޕްޓޭ ފެންނާނީ އަކްޝޭގެ އަންހެނުންގެ ރޯލުންނެވެ. ފުރަތަމަ އިޝްތިހާރުގައި ރާދިކާ ބުނަނީ "އަހަރެން ކަހަލަ އަންހެނުންނަށް ބައްޔެއް ޖެހިގެން މަރުވުން ވެސް، ލަދުވެތިކަމާ އެކު ދިރިއުޅުމަށް ވުރެ މާ ރަނގަޅު" ކަމަށެވެ.
މިއީ އިންޑިޔާގެ ރަށްފުށުގެ ހިސާބުގައި މައްސަރުގެ ކަންތައް ޖެހުމުން އަންހެނުންނާ ދޭތެރޭ ކަންތައްކުރާ ދަށު ދަރަޖައިގެ ނިކަމެތި ގޮތްތައް ދައްކުވައިދޭ ފިލްމެކެވެ. މިކަމާ ދެކޮޅަށް ތެދުވަނީ ޕެޑްމޭން (އަކްޝޭ ކުމާރު) އެވެ. އެހިސާބުން އޭނާ ވެސް މުޅިން ބާކީކޮށް، އެކަނި ކޮށްލަ އެވެ. އަދި އޭނާގެ އަންހެނުންގެ ފުރާނަ އަށް ވެސް ނުރައްކާވާ ހާލަތްތަކެއް މެދުވެރިވެ އެވެ. އެހިސާބުން ދެން އަކްޝޭގެ ހަޔާތަށް އަންނަނީ ސޯނަމް ކަޕޫރު އެވެ. އޭނާގެ ދަތުރުގައި އެންމެ ބޮޑު އެހީތެރިކަމެއް ފޯރުކޮށްދެނީ ސޯނަމް އެވެ.
"ޕެޑްމޭން"ގެ ދަތުރުގައި އަކްޝޭ އަށް އެންމެ ބޮޑު އެހީތެރިކަމެއް ދިނީ އޭނާގެ އަސްލު އަނބިމީހާ ޓްވިންކަލް އެވެ. ފިލްމުގައި އަކްޝޭގެ ކެރެކްޓާ މުރުގަނަންތަމް އަކީ ހަގީގީ މީހެކެވެ. މި ފިލްމުގައި ދައްކަނީ 1998 ގައި އަންހެނުންގެ ހައްގުތަކަށް މުރުގަނަންތަމް ކުރި މަސައްކަތްތަކެވެ. އަދި ސެނިޓަރީ ނެޕްކިންސް އުފައްދަން އޭނާ ތައްޔާރުކުރި މެޝިން މިހާރު އިންޑިޔާގެ 23 ސްޓޭޓެއްގައި ދަނީ ބޭނުން ކުރަމުންނެވެ.
އާރް. ބާލްކީ ޑައިރެކްޓްކޮށްފައިވާ "ޕެޑްމޭން" ރިލީޒްކުރާނީ ޖެނުއަރީ 26، 2018 ގައެވެ.