15 ޑިސެމްބަރ 2017 - 07:28
ޗައިނާގެ ހެނާންގައި ދިރިއުޅޭ މި ފިރިހެންކުއްޖާގެ އުމުރުން އަދި އެންމެ 12 އަހަރެވެ. ނަމަވެސް އޭނާގެ ބަލި މަންމަ ސަލާމަތްކުރެވޭތޯ ބައްޕައާ ގުޅިގެން ގޫ ގުއަންގް ޒާއޯ އަންނީ ވަރަށް ބުރަކޮށް މަސައްކަތްކުރަމުންނެވެ.
ސެކަންޑަރީ ސްކޫލެއްގައި ކިޔަވަމުން އައި ގޫ މި މަހު ކުރީކޮޅު އޭނާގެ ސްކޫލްގެ ޓީޗަރަކަށް ސިޓީއެއް ލިޔުނެވެ. އެ ސިޓީގައި ބުނީ މަންމަގެ ކިޑްނީ ޓްރާންސްޕްލާންޓަށް ފައިސާ ހޯދަންވެގެން ދުވަސްކޮޅަކަށް ކިޔެވުން މެދުކަނޑާލަން ބޭނުންވާ ކަމަށެވެ.
ގޫގެ 40 އަހަރުގެ މަންމަ އަކީ މިހާރުވެސް ގަވާއިދުން ޑައިލެސިސް ހަދަމުން ދާ މީހެކެވެ. ނަމަވެސް އޭނާގެ ހާލު ދުވަހެއް ދުވަހަކަށް ދަށަށް ދާތީ ކިޑްނީ ބަދަލުކޮށްގެން ނޫނީ ފުރާނަ ސަލާމަތް ނުކުރެވޭނެ ކަމަށް ޑޮކްޓަރުން ވަނީ ބުނެފަ އެވެ.
ޗައިނާގެ މީޑިއާއިން ބުނާ ގޮތުގައި އޭނާ ކިޔަވަމުން އައި ސްކޫލްގެ އެންމެ މޮޅު ދަރިވަރުންގެ ތެރޭގައި ގޫ ހިމެނެ އެވެ. އޭނާއަށް ކިޔެވުމުގެ ރޮނގުން ލިބިފައިވާ ކާމިޔާބީތަކަށް ގިނަ އެވޯޑުތަކެއް ވެސް ވަނީ ލިބިފަ އެވެ. ނަމަވެސް މަންމަގެ ބަލި ހާލު ހުރި ގޮތުން އަހަރެއްހާ ދުވަހު ކިޔެވުން މެދުކަނޑާލަން ގޫ ނިންމީ ކަމަށް އޭނާގެ ޓީޗަރު ބުންޏެވެ.
މީގެ ތިން އަހަރު ކުރިއްސުރެ ވަޒީފާ ދޫކޮށްލާފައި ގޫގެ ބައްޕަ ވެސް އުޅެމުން އަންނަނީ އަނބިމީހާ ބެލެހެއްޓުމުގަ އެވެ.
މިދިއަ ތިން އަހަރު ޑައިލެސިސް ހެދުމުގެ ސަބަބުން އާއިލާގެ ފައިސާ ހުސްވެ، އެތައް ބަޔަކަށް ވަނީ ދަރާފަ އެވެ. ފައިސާ އެއްކުރުމުގެ މަސައްކަތުގެ އިތުރުން ގޫ ހުރީ އޭނާގެ މަންމައަށް ކިޑްނީ ހަދިޔާކުރަން ވެސް ތައްޔާރަށެވެ. ނަމަވެސް އޭނާގެ މަންމަގެ ކިޑްނީ އާއި އޭނާގެ ކިޑްނީ ގުޅޭ ކަމެއް އަދި ނޭނގެ އެވެ.
ކިޔެވުން ހުއްޓާލާފައި ގޫ އުޅެނީ ބައްޕައާ އެކު ބަދަން ހެއްދުމުގެ މަސައްކަތުގަ އެވެ. އަދި ބަދަން ދަނޑުން އެނބުރި އައިސް ގޭގެ ގިނަ މަސައްކަތްތައް ވެސް އޭނާ ކުރެ އެވެ. އެއީ މަންމަ ލައްވާ މަސައްކަތް ނުކުރުވަން ވެގެންނެވެ.
މި ޚަބަރު ޗައިނާގެ ނޫސްތަކުން ފެނިގެން ގިނަ ބަޔަކު ވަނީ ގޫ އާއި އޭނާގެ އާއިލާއަށް ފައިސާގެ އެހީ ދީފަ އެވެ. ގޫ ކަހަލަ ދަރިއަކު ލިބޭނީ ވަރަށް ނަސީބުވެރި މަންމައަކަށް ކަމަށް ވެސް ގިނަ ބަޔަކު ބުނެ އެވެ.
އެންމެ ފަހުގެ ޚަބަރުތައް ބުނާ ގޮތުގައި ގޫގެ މަންމަ މިހާރު އޮތީ ކިޑްނި ޓްރާންސްޕްލާންޓް ކުރުމަށް ހޮސްޕިޓަލުގަ އެވެ. އޭނާއަށް އެހީތެރިވެދިން އެންމެން އެނގޭ ކަމަށާއި ބޮޑުވެގެން އެމީހުން ވެދިން އެހީތެރިކަމުގެ ބަދަލު ދޭނެ ކަމަށް ވެސް ގޫ ބުނެ އެވެ.