15 ޑިސެމްބަރ 2017 - 07:32
"ޕަދްމާވަތީ"ގެ ރޯލަށް ދީޕިކާ ޕަދުކޯން ވަރަށް ބަރާބަރު ކަމަށް އެ ފިލްމުގެ އެއް ބަތަލު ޝާހިދު ކަޕޫރު ބުނެފި އެވެ. ދީޕިކާ އަކީ ވަރަށް މޮޅު ބަތަލާއެއް ކަމަށާއި އަދި އޭނާއަކީ ފިލްމީ މައިދާނުގައި އެންމެ ކުރީގައި އުޅޭ އެކްޓަރު ކަމަށް ވެސް ޝާހިދު ބުންޏެވެ.
"ޕަދްމާވަތީގެ ރޯލަށް ދީޕިކާ ހަމަ މުޅިން ފިޓްވޭ. ފިލްމުގައި މަސައްކަތުގައި ދީޕިކާއާ އެކު ހޭދަކުރެވުނީ ވަރަށް ހިތްހަމަޖެހޭ ދުވަސްތަކެއް. ހިޔެއްވެސް ނުވޭ އަހަރެމެން އެކުގައި ފިލްމެއް ކުޅޭ ފުރަތަމަ ފަހަރޭ،" ޝާހިދު ބުންޏެވެ.
ޝާހިދު ބުނި ގޮތުގައި ކުރިން ވެސް އޭނާއަށް ދީޕިކާއާ އެކު ކުޅޭނެ ފިލްމުތައް ލިބުނެެވެ. ނަމަވެސް އޭނާ އެ ފިލްމެއް ކުޅެން އެއްބަސްވާއިރަށް ދީޕިކާއަށް ފިލްމު ކަމުނުގޮސްގެން ދޫކޮށްލާތީ އެކުގައި ފިލްމެއް ކުޅެވޭ ގޮތް ނުވީ އެވެ. ނަމަވެސް އެކަމާ ޝާހިދު ޝަކުވާއެއް ނުކުރެ އެވެ. އެއީ "ޕަދްމާވަތީ" އަކީ އޭނާ އާއި ދީޕިކާ އެކުގައި ފުރަތަމަ ފަހަރަށް ސްކްރީނަށް އައުމަށް އެންމެ ރަނގަޅު ޕްރޮޖެކްޓްކަމަށް އޭނާއަށް ގަބޫލު ކުރެވޭތީ އެވެ.
"ޕަދްމާވަތީ އަކީ ވަރަށް ފުރިހަމަ ފިލްމެއް. ރަސްކަލަކާއި ރާނީއެއްގެ މެދުގައި އޮތް ހާއްސަ ގުޅުން ވަރަށް ފުރިހަމައަށް ދައްކައިދީފައިވާ ފިލްމެއް،" ޝާހިދު ބުންޏެވެ.
ފިލްމު ކިތަންމެ ފުރިހަމަޔަސް އެ ފިލްމަށް ގިނަ މައްސަލަތަކެއް ދިމާވެ ފިލްމު ރިލީޒްކުރެވޭނެ ގޮތެއް ނުވާތީ ޝާހިދު ހުރީ ކުޑަކޮށް ހިތްހަމަނުޖެހިފަ އެވެ. ފިލްމުގައި ހިންދޫންގެ ރަސްކަލެއްގެ ވާހަކަ ގެނެސްފައިވާ ގޮތާ މެދު ހިތްހަމަނުޖެހި ހިންދޫން ގެންދަނީ ފިލްމާ ދެކޮޅަށް އަޑު އުފުލަމުންނެވެ.
"ޕަދްމާވަތީ" މިހާރު ވަނީ ފާސްކުރަން ސެންސަރު ބޯޑަށް ހުށަހަޅާފަ އެވެ. ކުރިޔަށް އޮތް ހަފުތާގައި ސެންސަރު ބޯޑުގެ މެމްބަރުން އެ ފިލްމު ބަލައި ފިލްމާ މެދު ގޮތެއް ނިންމާނެ ކަމަށް ވަނީ ބެލެވިފަ އެވެ.
އިންޑިޔާގެ ބައެއް ސްޓޭޓްތަކުގައި ވަނީ ފިލްމު ރިލީޒްކުރުން މަނާ ކޮށްފަ އެވެ. އެހެންކަމުން ސެންސަރު ބޯޑުން ފާސް ކޮށްދިނަސް އެ ސްޓޭޓްތަކުގައި ފިލްމެއް ނާޅުވާނެ އެވެ. އަދި ފިލްމު އަޅުވާ ސިނަމާތަކަށް ވެސް ފިލްމާ އިދިކޮޅަށް މަސައްކަތް ކުރާ މީހުން ގެއްލުން ދިނުން އެކަށީގެންވެ އެވެ.