10 ޖުލައި 2016 - 07:28
ބޮލީވުޑް ފިލްމުތަކުގެ ތެރެއިން މި މަހު އެކަނިވެސް ތިން ފިލްމެއް ވަނީ ރިލީޒްކުރުމުގެ ކުރިން އޮންލައިންގައި ލީކްވެފަ އެވެ. އޭގެ ތެރޭގައި "އުޅްތާ ޕަންޖާބު" އާއި "ސުލްތާން" އަދި މިހާތަނަށް ވެސް ރިލީޒްނުކުރާ "ގްރޭޓް ގްރޭންޑް މަސްތީ" ހިމެނެ އެވެ.
ގިނަ ބަޔަކު މިކަމުގެ ޒިންމާ އަޅުވަނީ އިންޑިޔާގެ ފިލްމު ސެންސަރު ބޯޑުގަ އެވެ. ޚާއްސަކޮށް "އުޅްތާ ޕަންޖާބު" އާއި "ގްރޭޓް ގްރޭންޑް މަސްތީ"ގެ ލީކުވެފައިވާ ކޮޕީގައި ސެންސަރުކޮށްފައިވާ ކޮޕީކަމަށް ޖަހާފައިވާތީ ފިލްމުތައް ލީކުވީ ސެންސަރު ކުރި ފަހުން ކަމަށް ބުނެ ގިނަ ބަޔަކު ސެންސަރު ބޯޑަށް ތުހުމަތު ކުރެ އެވެ.
އެހެންކަމުން މި އިލްޒާމުން ސަލާމަތްވުމަށް ސެންސަރު ބޯޑުގެ ޗެއާމަން ޕެހެލަޖް ނިހަލާނީ ވަނީ އާ ގަވާއިދެއް ހަދާފަ އެވެ. މި ގަވާއިދުގެ ދަށުން ސެންސަރު ބޯޑަށް ޑީވީޑީ ފޯމެޓްގައި ފިލްމުތައް ހުށަހަޅާކަށް ނުޖެހޭނެ އެވެ. އާ ގަވާއިދުގެ ދަށުން ސެންސަރު ކުރަން ހުށަހަޅާ ފިލްމުތައް ހުށަހަޅަން ޖެހެނީ ޑީސީޕީ (ޑިޖިޓަލް ސިނަމާ ޕްރޮޖެކްޝަން) ފޯމެޓް ގައެވެ.
ޓައިމްސް އޮފް އިންޑިއާގައި ބުނާ ގޮތުން ސެންސަރު ބޯޑުގެ ޗެއާމަނަށް މިފަދަ ފިޔަވަޅެއް އަޅަން މަޖްބޫރުވީ މިހާރަކަށް އައިސް މާ ގިނަ ފިލްމުތައް ރިލީޒްކުރުމުގެ ކުރިން ލީކުވަމުންދާތީ އެވެ.
"ސެންސާޑް ކޮޕީ" މިހެން ޖަހާފައިވާ ޑީވީޑީ ޕްރިންޓްކޮށްފައިވާ ފިލްމުތައް އޮންލައިންކޮށް ލީކުވާތީ ގިނަ ބަޔަކު ޝަކުވާ ކުރަމުންދާ ކަމަށާއި ނަމަވެސް ސެންސަރު ކޮޕީ އަކީ ޕްރޮޑިއުސަރުން ތައްޔާރުކުރާ އެއްޗެއް ކަމަށާއި ސެންސަރު ބޯޑުން އުފައްދާ އެއްޗެއް ނޫން ކަމަށް ޗެއާމަން ބުނެފައިވެ އެވެ.
"އެހެންކަމުން ފިލްމު ލީކުވަނީ ޕްރޮޑީއުސަރުން ފިލްމުގެ ޑީވީޑީ ކޮޕީ ހަދާ ހިސާބުން އެމީހުންނާ ގުޅުންހުރި ކޮންމެވެސް މީހެއްގެ ފަރާތުން ކަމަށް ބެލެވެނީ. އެހެންވެ ޑީވީޑީ ފޯމެޓަށް ފިލްމު ގެންނަން ޖެހޭ ގަވާއިދަށް އަމަލުކުރުން މިހާރު ވަނީ ހުއްޓާލާފައި. މިހާރު ސެންސަރު ކުރަން ފިލްމު ބަލާނީ ޑިޖިޓަލް ފޯމެޓްގައި،" ޕެހެލަޖް ނިހަލާނީ ބުނެފައިވެ އެވެ.
ނަމަވެސް ފިލްމް ސަޓިފިކެޓް އެޕެލޭޓް ޓްރައިބިއުނަލް އަށް އަދިވެސް ޑީވީޑީ ކޮޕީ ބޭނުންވާނެ ކަމަށް ވެސް ޗެއާމަން ބުނެފައިވެ އެވެ. އަދި މިހާތަނަށް ލީކުވި އެއްވެސް ފިލްމަކީ ސެންސަރު ބޯޑުން ލީކުވެފައިވާ ފިލްމުތަކެއް ކަމަކަށް އެ ފަރާތުން ގަބޫލެއް ނުކުރެ އެވެ.
ސެންސަރު ބޯޑުގެ ސީއީއޯ އަނުރާގް ސްރީވާސްތަވް ބުނި ގޮތުގައި "ގްރޭޓް ގްރޭންޑް މަސްތީ" ސެންސަރު ކުރަން ގެނައީ ޖެނުއަރީ 19 ވަނަ ދުވަހު އެވެ. ހަމަ އެދުވަހު ފިލްމު ބެލުމަށްފަހު، ވަރަށް ގިނަ ތަންތަން ސެންސަރު ކުރަން ޖެހޭ ކަމަށް ބުނުމުން ފިލްމު ހިފައިގެން ދިޔައީ ކަމަށް ސީއީއޯ ބުންޏެވެ. އަދި ރިވައިސްކޮށްގެން އަލުން ފިލްމު ނުގެނެސް ޕްރޮޑިއުސަރުން ދިޔައީ ޓްރައިބިއުނަލަށް ކަމަށް ވެސް ސީއީއޯ ބުންޏެވެ. އަދި މާޗް 23 އާއި 24 ގައި ޓްރައިބިއުނަލް އިން އެއްވެސް ތަނެއް ސެންސަރުކުރުމެއް ނެތި ފިލްމު ފާސްކޮށްދިނުމަށް އަމުރުކުރުމުން އޭޕްރީލް 1 ވަނަ ދުވަހު ފިލްމަށް ސެޓްފިކެޓް ދޫކޮށްފައިވާ ކަމަށް ވެސް އޭނާ ބުންޏެވެ. އަދި ހަމަ އެ ވަގުތު ޑީވީޑީގެ ފައިނަލް ވާޝަން ސީލްކުރުމަށް ފަހު ޕްރޮޑިއުސަރުން ލައްވާ ސޮއިކުރުވައި ރެކޯޑް ރޫމުގައި ރައްކާކުރީ ކަމަށް ވެސް ސެންސަރު ބޯޑުގެ ސީއީއޯ ބުނެފައިވެ އެވެ. އެހެންކަމުން އެތަނުން ފިލްމު ލީކުވާނެ އެއްވެސް ފުރުސަތެއް އޮތް ކަމަކަށް ސީއީއޯ ގަބޫލެއް ނުކުރެ އެވެ.
"އުޅްތާ ޕަންޖާބު" ލީކުވީ ސެންސަރު ބޯޑުން ކަމަށް ދެކެވޭ ވާހަކައާ ބެހޭ ގޮތުން ސީއީއޯ ބުނީ އެ ފިލްމު ސެންސަރުކުރަން ގެނައީ ހާޑް ޑިސްކެއްގައި މޫވީ ފޯމެޓަށްކަމަށާއި ފިލްމު ދައްކާލާފައި ވަގުތުން ގެންދިޔައީ ކަމަށެވެ. އަދި އެއްވެސް އިރެއްގައި އެމީހުންގެ އަތަށް އެ ފިލްމު ނާރާ ކަމަށް ވެސް އޭނާ ބުންޏެވެ. އަދި ސެންސަރު ސެޓްފިކެޓް ދޫކުރަންވެގެން އެތަނަށް އަލުން ފިލްމު ގެނައި އިރު އޮންލައިންގައި ލީކުވެފައިވާ ކަމަށް ވެސް ސްރިވާސްތަވް ބުންޏެވެ.
ލީކުވި ދެ ފިލްމުގައި ވެސް ސެންސަރުކޮށްފައިވާ ކޮޕީ ކަމަށް ލިޔެފައިވާތީ އެކަމާ ބެހޭ ގޮތުން ސީއީއޯ ބުނީ "ސެންސާ ކޮޕީ" އެހެން ލިޔަނީ ޕްރޮޑިއުސަރުން ކަމަށާއި އެއީ ސެންސަރު ބޯޑުން ޖަހާ އެއްޗެއް ނޫން ކަމަށެވެ. މުމްބައި އިން އެކަނިވެސް އަހަރެއްގެ މައްޗަށް 2000 ފިލްމު ސެންސަރު ކުރަން ގެންނަ ކަމަށާއި އެއްވެސް ފިލްމެއްގައި އެފަރާތުން އެފަދަ އެއްޗެއް ނުޖަހާއިރު ހަމައެކަނި އެ ދެ ފިލްމުގައި ޖަހަންވީ ކީއްކުރަންތޯ މި ސުވާލު އުފެއްދި ނޫސްވެރިންނާ ސީއީއޯ ސުވާލު ކުރި އެވެ.
"އުޅްތާ ޕަންޖާބު" ރިލީޒްކުރުމުގެ ދެ ދުވަސްކުރިން އޮންލައިންގައި ލީކުވިއިރު "ގްރޭޓް ގްރޭންޑް މަސްތީ" ލީކުވެފައިވަނީ ރިލީޒްކުރުމުގެ ތިން ހަފުތާ ކުރިންނެވެ. މި ދެ ފިލްމަކީ ވެސް ބާލާޖީ މޯޝަން ޕިކްޗާޒްގެ ފިލްމުތަކެވެ. އަދި ދެ ފިލްމުވެސް ސެންސަރު ބޯޑުން މާ ގިނަ ތަންތަން ކަނޑާލަން ބުނާތީ ޓްރައިބިއުނަލް އަށް ގެންގޮސްގެން ސެންސަރު ކުރުމުގެ މައްސަލަ ހައްލުކުރަން ޖެހުނެވެ.
"ގްރޭޓް ގްރޭންޑް މަސްތީ" ކުރިން ރިލީޒްކުރަން ހަމަޖެހިފައި އޮތީ ޖުލައި 22 ވަނަ ދުވަހު އެވެ. ނަމަވެސް އޮންލައިންގައި ލީކުވުމުން އެއް ހަފުތާ ކުރިޔަށް ޖައްސާލައި މިމަހުގެ 15 ވަނަ ދުވަހު ރިލީޒްކުރާ ގޮތަށް މިހާރު ވަނީ ހަމަޖެހިފަ އެވެ.
ސަލްމާން ޚާންގެ "ސުލްތާން" ވެސް ވަނީ ރިލީޒްކުރުމުގެ ދެ ގަޑިއިރެއްހާއިރު ކުރިން އޮންލައިންގައި ލީކުވެފަ އެވެ. ނަމަވެސް މި ފިލްމު ލީކުވިޔަސް ފިލްމުބަލަން ސިނަމާތަކަށް ވަންނަ މީހުންގެ އަދަދު މަދުވެފައެއް ނުވެ އެވެ.