10 ޑިސެމްބަރ 2017 - 06:40
"ޑޮން 3"ގެ ސްކްރިޕްޓް ލިޔުމަށް ވަގުތު ހުސް ކުރުމުގެ ގޮތުން، އާ ފިލްމުތަކުގައި ސޮއިކުރުން ފަރްހާން އަޚްތަރު މެދުކަނޑާލައިފި އެވެ. "ޑޮން" ސިލްސިލާގެ ފިލްމުތަކުގެ ސްކްރިޕްޓް ލިޔުމުގެ އިތުރުން އެ ފިލްމުތައް ޑައިރެކްޓްކޮށްފައިވަނީ ވެސް ފަރްހާން އެވެ.
ޝާހްރުކް ޚާން ބަތަލުގެ ބައި ކުޅެފައިވާ "ޑޮން"ގެ މިހާތަނަށް ރިލީޒްކުރި ދެ ފިލްމަކީ ވެސް ވަރަށް ބޮޑު ތަރުހީބެއް ލިބިފައިވާ ފިލްމު ތަކެކެވެ. އެހެންވެ އެއްބަޔަކު ބުނަނީ ފަރްހާން "ޑޮން 3" ފަށަން ނިންމީ އޭނާ ކުޅޭ ގިނަ ފިލްމުތަކަކަށް ފަހަކަށް އައިސް ލިބެމުންދާ ނާކާމިޔާބުގެ ސަބަބުން ކަމަށެވެ. ފަރްހާންގެ ގާތް މީހަކު ބުނެފައިވާ ގޮތުގައި އެކްޓިން ކެރިއަރު މިވަގުތަށް މަޑުޖައްސާލާފައި "ޑޮން 3" އަށް ހުރިހާ ވަގުތެއް ހުސްކުރަން ފަރްހާން މިހާރު ވަނީ ނިންމައިފަ އެވެ.
"ޑޮން 3"ގެ ބަތަލާއަކަށް ޕްރިޔަންކާ ޗޯޕްރާގެ ބަދަލުގައި ދީޕިކާ ޕަދުކޯން ހަމަޖައްސަން ނިންމާފައިވާ ކަމަށް ވެސް ޚަބަރުތައް ބުނެ އެވެ.
އިންޑިއާގެ ނޫހަކާ ވާހަކަ ދައްކަމުން ފަރްހާން ބުނެފައިވަނީ "ޑޮން 3" ގެ ވާހަކައެއްގެ ޚިޔާލު މިހާރު އޭނާގެ އެބައޮތް ކަމަށެވެ. ނަމަވެސް އެއީ ހަމައެކަނި ޚިޔާލެއް ކަމަށާއި އެ ޚިޔާލަށް އަމަލީ ސިފަ ގެނައުމުގެ މަސައްކަތް އަދި އޮތީ ކަމަށް އޭނާ ބުންޏެވެ. އަދި ފާއިތުވި ތަނުގައިި ފިލްމުގެ ކަންތަކުގައި ނޫޅެވުނީ ކުޅެން ސޮއިކޮށްފައި ހުރި ފިލްމުތަކުގެ ސަބަބުން ކަމަށް ވެސް ފަރްހާން ބުންޏެވެ.