08 ޑިސެމްބަރ 2017 - 22:37
އުރީދޫން މި އަހަރު އަލަށް ބާއްވަން ފެށި "ކަލާ ރަން" މިއަދު ހުޅުމާލޭގައި ކުރިއަށް ދިޔައިރު ބައިވެރިންނަށް އެކަން ވީ ބޮޑު މަޖާގަނޑަކަށެވެ. ގިނަ އަދަދެއްގެ ކުޑަކުދިން ވެސް ބައިވެރިވި ދުވުން ކުރިއަށް ދިޔައިރު މިއީ ހުރިހާ އުމުރެއްގެ މީހުންނަށް ވެސް ވީ ކުލައިގެ އީދަކަށެވެ.
ހުޅުމާލޭ ސެންޓްރަލް ޕާކުން މިއަދު 3:30 ގައި ފެށި ދުވުމުގައި 3،200 އަށް ވުރެ ގިނަ މީހުން ބައިވެރިވި ކަމަށް އުރީދޫގެ އޮފިޝަލަކު ވިދާޅުވި އެވެ. އޭނާ ވިދާޅުވީ މި އިވެންޓް ވަރަށް ކާމިޔާބު ކަމަށެވެ.
މަޝްހޫރު ބޭންޑްތަކުގެ ލައިވް މިއުޒިކާއި އެކު ކުރިއަށް ދިޔަ، ކަލާ ރަންގައި ވަނީ "ދި މޯސްޓް އެންޓަަޓެއިނިން ރަނާ" އާއި "ދި ފެންސީ ރަނާ، މޭލް" އަދި "ދި ފެންސީ ރަނާ، ފީމޭލް" ހޮވާފަ އެވެ. އެ މަގާމުތަކަށް ހޮވުނީ:
- ދި މޯސްޓް އެންޓަަޓެއިނިން ރަނާ: ބިބް ނަންބަރު 1316
- ދި ފެންސީ ރަނާ، މޭލް: ބިބް ނަންބަރު 1660
- ދި ފެންސީ ރަނާ، ފީމޭލް: ބިބް ނަންބަރު 1867
ކަލާ ރަން އަކީ ދުޅަހެޔޮ ދިރިއުޅުމަކަށް، ދުވުމަކީ މަޖާ އަދި އުފާވެރިކަން ގެނުވައިދޭނެ ހަރަކާތެއްކަން އަންގައިދިނުމުގެ މަގުސަދުގައި އުރީދޫ އިން ބާއްވަން ފެށި ހަރަކާތެކެވެ. ކޮންމެ އަހަރަކު ވެސް ކަލާ ރަން ބާއްވާނެ ކަމަށް އެ ކުންފުނިން ވަނީ ބުނެފަ އެވެ.
މިއީ ވަކި ވަގުތެއްގެ ތެރޭގައި ނިންމަން ޖެހޭ ރޭހަކަށް ނުވާތީ، ހިނގާފައި، ޖޮގްކޮށްފައި، ދުވެފައި ނުވަތަ ނަށަމުން ވިޔަސް ރޭސް ނިންމެ އެވެ. އަދި ފަސް ކިލޯމީޓަރުގެ މި ރޭހުގެ ކޮންމެ ކިލޯމީޓަރަކަށް ދުވެ ނިމޭ ހިސާބުގައި ބަހައްޓާފައި ހުންނަ ކުލަ ސްޓޭޝަންތަކުން އެކަން ފާހަގަކޮށް ކުލަ ޖަހަ އެވެ. އެކި ސްޓޭޝަންތަކުން އެކި ކުލަތައް ޖަހަމުން ދިޔައިރު ބައިވެރިން ވެސް އެކަކު އަނެކަކަށް ކުލަ ޖަހައި މަޖާކުރި އެވެ.
ޖަހަނީ ހިކި ކުލަ ކަމަށް ވާތީ، ދުވުން ކުރިއަށް ދިޔައިރު ކުލަތަކުން މުޅި ސަރަހައްދު ފުރާލަ އެވެ. ފެންނަމުން ދިޔައީ ކުލައިން ސިފަ ގެއްލިފައި ތިބި އެކި އުމުރުފުރައިގެ މޫނުތަކެވެ.
ކަލާ ރަން އަކީ ހަތް އަހަރުން މަތީގެ ހުރިހާ އެންމެންނަށް ވެސް، އެއްވެސް ފީއަކާ ނުލާ ބައިވެރިވުމުގެ ފުރުސަތު ހުޅުވާލައިގެން ކުރިއަށް ގެންދިޔަ ހަރަކާތެކެވެ.