02 ޑިސެމްބަރ 2017 - 18:48
ކޮލަމްބޯ (ޑިސެމބަރު 2) - ސްރީ ލަންކާގެ ރައީސް މައިތުރިޕާލާ ސިރިސޭނާގެ ކޮއްކޮ ޕްރިޔަންތާ ސިރިސޭނާ އަވަހާރަކޮށްލި ގާތިލަށް 18 އަހަރުގެ ޖަލު ހުކުމެއް އިއްވައިފި އެވެ.
ޕޮލޮއްނަރުވާ ހައި ކޯޓުގެ ފަނޑިޔާރު އިއްވި ހުކުމުގައިވާ ގޮތުން ގާތިލް ޑޮން އިޝާން ލަކްމާލްގެ މައްޗަށް ވަނީ ޕްރިޔަންތާ ސިރިސޭނާގެ އާއިލާ އަށް އެއް މިލިއަން ރުޕީސް ދިނުމަށް ވެސް ހުކުމްކޮށްފަ އެވެ. މީގެ އިތުރުން 20،000 ރުޕީސް އިން އޭނާ ވަނީ ޖޫރިމަނާކޮށްފަ އެވެ. ހުކުމުގައިވާ ގޮތުން ޕްރިޔަންތާގެ އާއިލާ އަށް ފައިސާ ނުދީފި ނަމަ އިތުރު ދެ އަހަރުގެ ޖަލު ހުކުމެއް އަދި ޖޫރިމަނާ ފައިސާ ނުދައްކައިފި ނަމަ ހަ މަސް ދުވަހުގެ ޖަލު ހުކުމެއް އަންނާނެ އެވެ.
ވިޔަފާރިވެރިއެއް ކަމަށްވާ ޕްރިޔަންތާ ސިރިސޭނާ، 42، އަވަހާރަކޮށްލީ މާޗް 26، 2015 ގަ އެވެ. ޕްރިޔަންތާ އަށް ހަމަލާދީފައި ވަނީ ކޯރާޑިއަކުންނެވެ. އޭނާ އަވަހާރަވީ ކޮލަމްބޯ ނޭޝަނަލް ހޮސްޕިޓަލުގައި ފަރުވާ ދެމުން ދަނިކޮށެވެ. ޕްރިޔަންތާ އަށް ހަމަލާ ދިން އިރު ރައީސް ސިރިސޭނާ އުޅުއްވީ ރަސްމީ ދަތުރުފުޅެއްގައި ޗައިނާގަ އެވެ.