01 ޑިސެމްބަރ 2017 - 07:56
ޝާހްރުކް ޚާނާ އެކު ކެޓުރީނާ ކައިފް ކުޅެމުން އަންނަ، ޑައިރެކްޓަރު އާނަންދް އެލް ރާއީގެ ފިލްމުގެ އަސްލު ނަމަކީ "ކެޓުރީނާ މޭރީ ޖާން" ކަމަށް ކެޓުރީނާ ބުނެފި އެވެ. ފިލްމުގެ ނަން ބަދަލުކޮށް ސްކްރިޕްޓަށް ވެސް ބޮޑު ބަދަލެއް ގެނެސްފައިވާ ކަމަށް ކެޓުރީނާ ބުންޏެވެ.
ފިލްމަށް އެ ނަން ކިޔާކަން އެނގިގެން ގިނަ ބަޔަކު އޭނާގެ ރޯލާ މެދު ސުވާލު އުފައްދާ ކަމަށް ވެސް ކެޓުރީނާ ބުންޏެވެ.
"ގިނަ މީހުން ހީކުރީ 'ކެޓުރީނާ މޭރީ ޖާން' ކިޔާތީ ފިލްމުގައި އަހަރެން ކުޅެނީ އަސްލު ކެރެކްޓާ ކަމަށް. ނަމަވެސް ހަގީގަތަކީ އެ އެއްނޫން. އަހަރެން ކުޅެނީ ބަތަލާއެއްގެ ކެރެކްޓާ ނަމަވެސް ފިލްމުގައި އަހަންނަކީ ކެޓުރީނާ ކައިފެއް ނޫން،" ކެޓުރީނާ ބުންޏެވެ.
ކެޓުރީނާ އަކީ މިހާރު ބޮލީވުޑްގެ އެންމެ ބިޒީ އެއް ބަތަލާ އެވެ. ބޮލީވުޑްގެ އެންމެ ނަން ހިނގާ ތިން ޚާނުންނާ އެކު ކެޓުރީނާ މިހާރު އަންނަނީ ފިލްމުތައް ކުޅެމުންނެވެ. އެއީ އާމިރު ޚާނާ އެކު "ތަގްސް އޮފް ހިންދުސްތާން"، ސަލްމާން ޚާނާއެކު "ޓައިގާ ޒިންދާ ހޭ" ގެ އިތުރުން ޝާހްރުކް ޚާންގެ ޑުވޯފް ފިލްމެވެ.
ކެޓުރީނާ ބުނީ އެގޮތަށް ފިލްމުތައް ކުޅެން ލިބިފައި ވަނީ ހަމަ އިއްތިފާގުން ކަމަށާއި އެއީ ރާވައިގެން ކުރި ކަމެއް ނޫން ކަމަށެވެ.