01 ޑިސެމްބަރ 2017 - 07:55
ބޮލީވުޑްގެ ބޮކްސް އޮފީހުގައި އޮތީ ތިން ޚާނުންގެ ރަސްކަމެވެ. ތިން ޚާނުންނަކީ ޝާހްރުކް ޚާން، ސަލްމާން ޚާން އަދި އާމިރު ޚާނެވެ. އަޖޭ ދޭވްގަން އަކީ ވެސް ސުޕަސްޓާރެއްގެ ދަރަޖަ ލިބޭ ފެންވަރަށް ފިލްމުތައް ކާމިޔާބުކޮށް ކްރިޓިކްސްގެ ތާއީދު ވެސް ހޯދާފައިވާ އެކްޓަރެކެވެ. އެކަމަކު ތިން ޚާނުންނާ އެއްވަރުގެ ނަފާއެއް ފިލްމުތަކުން ނުލިބެ އެވެ. އަޖޭ މިހާރު ތައްޔާރުވަނީ އެކަން ނިމުމަކަށް ގެންނާށެވެ.
އަޖޭ މިހާރު އަންނަނީ އެކި ހިސާބުތަކުން ސިންގަލް ސްކްރީންތައް ގަންނަމުންނެވެ. އެގޮތުން ދާދިފަހުން އުއްތަރު ޕްރަދޭޝް އިން ސިންގަލް ސްކްރީންގެ ހަ ސްކްރީން އަޖޭ ގަނެފައި ވެ އެވެ. އަދި މިހާރު އިތުރު 100 ސްކްރީން ގަތުމުގެ މަސައްކަތް ވަނީ ފަށައިފަ އެވެ. އަދި މިި ހުރިހާ ސިނަމާތަކުން މަލްޓިޕްލެކްސްގެ ޗެއިނެއް ހަދަން އަޖޭ ގަސްތުކުރެ އެވެ.
އަޖޭގެ ތަރުޖަމާނު މި ޚަބަރަކީ ތެދެއްކަން ކަށަވަރުކޮށްދިނެވެ. އަދި މިހާރުވެސް އިންޑިއާގެ އެކި ސަރަހައްދުތަކުގައި ހިންދީ ފިލްމު ބެލުމަށް ޝައުގުވެރިވާ ގިނަ ބަޔަކު ތިބިނަމަވެސް މަލްޓިޕްލެކްސްތައް ނެތުމުގެ ސަބަބުން އެ ފުރުސަތު ނެތް ހިސާބުތައް އަޖޭ ބަލަމުން އަންނަ ކަމަށްވެ އެވެ.
މި ސިނަމާތައް އަޖޭ ހިންގާނީ އެންވައި ސިނަމާ ކިޔާ ކުންފުންޏެއްގެ ދަށުންނެވެ. އެންވައި އަކީ އަޖޭގެ ދެ ދަރިން ކަމަށްވާ ނީސާ އާއި ޔުގްގެ ނަން ފެށޭ އަކުރުތަކެވެ.
އަޖޭގެ ފިލްމުތައް ރިލީޒްކުރާ ވަރަށް ގިނަ ފަހަރު ކޮންމެވެސް ބޮޑު އެހެން ފިލްމެއް ރިލީޒްކުރާތީ ސިނަމާތައް ހޯދުމަށް އޭނާއަށް އަބަދުވެސް ހަނގުރާމަ ކުރަން ޖެހެ އެވެ. އެހެންކަމުން އަމިއްލަ ސިނަމާތަކެއް ހުރިނަމަ އޭނާއަށް މިކަމުގައި ވަރަށް ބޮޑަށް ފަސޭހަވެގެން ދާނެ އެވެ.
އަޖޭގެ "ސަން އޮފް ސަރްދާރް" އާއި "ޝިވާއޭ" ރިލީޒްކޮށްފައި ވަނީ ޔާޝް ޗޯޕްރާގެ "ޖަބް ތަކް ހެ ޖާން" އާއި ކަރަން ޖޯހަރްގެ "އޭ ދިލް ހެ މުޝްކިލް" އާ އެއް ދުވަހެއްގަ އެވެ. އެެހެންވެ އަޖޭ ބޭނުންވަރަކަށް ފިލްމު އަޅުވާނެ ސިނަމާއެއް ނުލިބުނެވެ. އޭނާއަށް ކުރިމަތިވާ މި މައްސަލައަށް، އަމިއްލަ ގިނަ ސިނަމާތަކެއް ހުރުމުން ބޮޑު ހައްލެއް ލިބުމުގެ އިތުރުން ސިނަމާތައް ހިންގާ މީހުންނަށް ބައެއް އަޅާކަށް ވެސް ނުޖެހޭނެ އެވެ.
މިއީ މިހާތަނަށް ބޮލީވުޑް އެކްޓަރަކު ކުރި ކަމެއް ނޫނެވެ. އާމިރު ކަހަލަ ހުރިހާ ކަމެއް އެންމެ ފުރިހަައަށް ހުންނަން ޖެހޭނެކަމަށް ގަބޫލުކުރާ އެކްޓަރުންނަށް ވެސް އަދި ސިނަމާތަކުން ލިބޭ ފައިދާތައް ނަގާކަށް ޚިޔާލެއް ނުކުރެ އެވެ.