29 ނޮވެމްބަރ 2017 - 18:59
ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު އަބްދުﷲ (މުހައްމާ) އާއި ހަނިމާދޫ ދާއިރާގެ މެމްބަރު ހުސައިން ޝަހުދީ ޕީޕީއެމުން ވަކިކުރިޔަސް އެ ދެ މެމްބަރުންގެ ގޮނޑި ނުގެއްލޭނެ ކަމަށް އިިދިކޮޅު ފަރާތްތަކުން މިއަދު ބުނެފި އެވެ.
މުހައްމާ އާއި ޝަހުދީގެ ސުލޫކީ މައްސަލައެއް ބެލުމަށް ފަހު އެ ދެ މެމްބަރުން، ވެރިކަން ކުރާ ޕީޕީއެމުން ވަކިކުރަން ނިންމިކަން، އެ ޕާޓީން އިއްޔެ ވަނީ އިލެކްޝަންސް ކޮމިޝަނަށް އަންގައިފަ އެވެ. ސުޕްރީމް ކޯޓުން މިދިޔަ ޖުލައި މަހު ކުރި ހުކުމުގައިވާ ގޮތުން މަޖިލީހަށް އިންތިޚާބުވި ޕާޓީން ވަކިވެއްޖެ ނަމަ ނުވަތަ ވަކިކޮށްފި ނަމަ ގޮނޑި ގެއްލޭނެ އެވެ. އެކަމަކު މުހައްމާއި ޝަހުދީގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން އަދި މަޖިލީހުގެ އިދާރާއަކަށް ނާންގަ އެވެ.
އިދިކޮޅު ފަރާތްތަކުން މިއަދު ހަވީރު ބޭއްވި ނޫސްވެރިންގެ ބައްދަލުވުމެއްގައި، މާފަންނު އުތުރު ދާއިރާގެ އެމްޑީޕީގެ މެމްބަރު އިމްތިޔާޒް ފަހުމީ (އިންތި) ވިދާޅުވީ ސުޕްރީމް ކޯޓުގެ ހުކުމުގައިވާ ގޮތުން، ގޮނޑި ގެއްލޭނީ އިންތިޚާބުވި ޕާޓީން ވަކިވުމުން ކަމަށެވެ. އެކަމަކު މުހައްމާ އާއި ޝަހުދީ އަކީ ޖުމްހޫރީ ޕާޓީގެ ޓިކެޓްގައި މަޖިލީހަށް އިންތިޚާބުވި ދެ މެމްބަރުން ކަން އިންތި ފާހަގަކުރެއްވި އެވެ. އެހެންވެ، ޕީޕީއެމުން އެ ދެ ބޭފުޅުން ވަކި ކުރުމަކީ މަޖިލީހުގެ ގޮނޑި ގެއްލޭނެ ސަބަބެއް ނޫން ކަމަށް އިންތި ވިދާޅުވި އެވެ.
"ޕީޕީއެމް ޓިކެޓުގައި ހޮވިވަޑައިގަތް ދެ މެމްބަރުންތޯ އެ ދެ މެމްބަރުންނަކީ؟. ނޫން. އެއީ ޖުމްހޫރީ ޕާޓީގެ ޓިކެޓްގައި ހޮވިވަޑައިގަތް ދެ މެމްބަރުން. ޕީޕީއެމްގައި، އެ ބޭފުޅުން ހުންނަވަން ނުޖެހޭ ތަނެއްގައި ހުންނެވުމަށް ފަހު ނިކުމެވަޑައިގަތީމަ ގޮނޑި ގެއްލޭނެ ހުއްޖަތެއް އެބައޮތްތޯ؟،" އިންތި ވިދާޅުވި އެވެ.
އިދިކޮޅު ގިނަ އަދަދެއްގެ މެމްބަރުންގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައަޅާފައިވާ ކަން ފާހަގަ ކުރައްވައި، އިންތި ވިދާޅުވީ އޭގެ ތެރޭގައި ސުޕްރީމް ކޯޓުގެ ހުކުމުގެ ތެރެއަށް ނުވަންނަ މެމްބަރުން ވެސް ހިމެނޭ ކަމަށެވެ. އެގޮތުން އަމިއްލަ ގޮތުން މަޖިލީހަށް އިންތިޚާބުވި ދިއްދޫ ދާއިރާގެ މެމްބަރު އަބްދުއްލަތީފްގެ ގޮނޑި ގެއްލިފައިވާ ކަމަށް ކަނޑައަޅާފައިވާ އިންތި ވިދާޅުވި އެވެ.