29 ނޮވެމްބަރ 2017 - 09:52
މެންޗެސްޓާ (ނޮވެމްބަރު 29) - މެންޗެސްޓާ ސިޓީ މިހާތަނަށް ލީގުގައި ކުޅުނު އެއްވެސް މެޗަކުން ބަލިވެފައިނުވި ނަމަވެސް އެ ޓީމު އޮތީ ހަމަބިމުގައި ކަމަށާއި އަދި ތަށި ޔަގީންނުވާކަން ހަނދާނުގައި ބަހައްޓަން ޖެހޭ ކަމަށް ޓީމުގެ ކެޕްޓަން ވިންސެންޓް ކޮމްޕެނީ ބުނެފި އެވެ.
ލީގުގައި މިހާތަނަށް ކުޅުނު 13 މެޗުން ސިޓީ އަށް ލިބިފައިވަނީ 37 ޕޮއިންޓެވެ. ވަޓްފޯޑް އަތުން މެންޗެސްޓާ ޔުނައިޓެޑް ރޭ މޮޅުވުމުން ސިޓީ ލީގުގެ އެއް ވަނައިގައި އޮތީ ފަސް ޕޮއިންޓުގެ ލީޑަކާ އެކު އެވެ.
ލީގުގައި މިރޭ އަމިއްލަ ދަނޑުގައި ސައުތެމްޓަނާ ދެކޮޅަށް ކުޅޭއިރު މެޗު ފަސޭހަ ނުކޮށްލާނެ ކަމަށް ކޮމްޕެނީ ވަނީ ބުނެފަ އެވެ.
"ފަނަރަ އަހަރު ވަންދެން އެންމެ މަތީ ފަންތީގައި ފުޓްބޯޅަ ކުޅުނުއިރު އަހަންނަށް ދަސްވެފައި އޮތް އެއް ކަމަކީ ނޮވެމްބަރު މަހާ ހަމައިން ލީގެއް ޔަގީން ނުވާނެކަން. އަދި ކުރަން އޮތް މަސައްކަތް ބައިވަރު. އަހަރެމެންނަށް މިހާރު އޮތް ޗެލެންޖަކީ އެންމެ ފަހުން އޮތް މެޗުގައި ދެއްކި ކުޅުމަށް ވުރެން ރަނގަޅު ކުޅުމެއް ކުރިއަށް އޮތް މެޗުގައި ދެއްކުން،" 2008 ވަނަ އަހަރުން ފެށިގެން ސިޓީ އަށް ކުޅެމުން އަންނަ ކޮމްޕެނީ ބުނެފި އެވެ.
މި ސީޒަނުގައި މިހާތަނަށް ސިޓީން އެންމެ ރަނގަޅު ކުޅުމެއް ދައްކަމުން އަންނަ އެއް ކުޅުންތެރިއަކީ އިންގްލެންޑުގެ ވިންގް ރަހީމް ސްޓާލިން އެވެ. ސިޓީ އެންމެ ފަހުން ކުޅުނު ދެ މެޗުން މޮޅުކޮށްދިން ލަނޑު ޖެހީ ސްޓާލިން އެެވެ. މިއީ ސްޓާލިންގެ ކެރިއަރުގައި މިހާތަނަށް އޭނާ އެންމެ ރަނގަޅު ކުޅުމެއް ދައްކަމުން އަންނަ ސީޒަނެވެ.
"އަބަދުވެސް އަހަރެން ބޭނުންވާ ޓާގެޓެއް ކަނޑައަޅަން. އެކަމަކު ގިނަ ފަހަރު އެ ހިސާބަށް ނުދެވޭ. އެކަމަކު އެއީ ހިތްވަރެއް ގޮތުގައި ދެކިގެން ދެން އޮންނަ ސީޒަނަކަށް ތައްޔާރުވީ،" ސްޓާލިން ބުންޏެވެ.
ލީގުގައި އާދިއްތަ ދުވަހުގެރޭ ކުޅުނު މެޗުން އެވަޓަން އަތުން ސައުތެމްޓަން ވަނީ 4-1 އިން މޮޅުވެފަ އެވެ. މިރޭ ސިޓީ އާއި ސައުތެމްޓަން ކުޅޭ މެޗު ފަށާނީ ރާއްޖޭ ގަޑިން ދަންވަރު 1 ޖަހާއިރު އެވެ.