28 ނޮވެމްބަރ 2017 - 15:42
ބެއިޖިން (ނޮވެމްބަރު 28) - ޒިމްބާބުވޭގެ ވެރިކަމުން ރޮބަޓް މުގާބޭ ދުރުކުރުމުގައި އެއްވެސް ރޯލެއް އަދާކޮށްފައި ނުވާނެ ކަމަށް ޗައިނާ އިން ބުނެފި އެވެ.
ޒިމްބާބުވޭގެ މަގުތަކަށް ސިފައިން ނުކުމެ މުގާބޭ ގޭ ބަންދު ކުރުމުގެ ކުޑަ ދުވަސްކޮޅެއް ކުރިން ސިފައިންގެ ވެރިޔާ ޖެނެރަލް ކޮންސްޓިން ޗިވެންގާ ވަނީ ޗައިނާ އަށް ވަޑައިގެންފަ އެވެ. އެހެންވެ ވެރިކަން ބަދަލު ކުރުމުގައި ޗައިނާ އިން ރޯލެއް ކުޅެފައިވާ ކަމަށް ގިނަ ބަޔަކު ދަނީ ބުނަމުންނެވެ.
ޒިމްބާބުވޭގެ އިންސާނީ ހައްގުތަކުގެ މައްސަލާގައި ހުޅަނގުގެ ގައުމުތަކުން މުގާބޭ އެކަހެރިކޮށްފައި ބެހެއްޓި ނަމަވެސް ޗައިނާ އަކީ ޒިމްބާބުވޭގެ އެންމެ ގާތް އެއް ގައުމެވެ. އަދި ވިޔަފާރީގައި މުހިންމު ޕާޓްނަރެއް ވެސް މެ އެވެ.
ޗައިނާ އިން ބުނެފައި ވަނީ ޒިމްބާބުވޭ ސިފައިންގެ ވެރިޔާގެ ޒިޔާރަތަކީ މުގާބޭ ވެސް ހުއްދަދީފައިވާ، ކުރިން ޕްލޭންކޮށްފައިވާ ދަތުރެއް ކަމަށެވެ. އަދި މުގާބޭގެ ވެރިކަން ބަދަލު ކުރުމުގައި ޗައިނާގެ އެއްވެސް ބައިވެރިވުމެއް ނުވާނެ ކަމަށް ޗައިނާގެ ފޮރިން މިނިސްޓްރީގެ ތަރުޖަމާން ބުންޏެވެ.
"ޗައިނާ އަކީ އެއްވެސް ގައުމެއްގެ ދާޚިލި ކަންކަމުގެ ތެރެއަށް ވަންނަ ގައުމެއް ނޫން،" ތަރުޖަމާން ބުންޏެވެ.
މުގާބޭގެ އިސްތިއުފާ އިއުލާން ކުރުމާ އެކު ޗައިނާ އިން ބުނެފައި ވަނީ އެ ނިންމުމަށް އިހްތިރާމްކުރާ ކަމަށެވެ. އަދި މުގާބޭ އަށް ތައުރީފް ކުރަމުން ބުނެފައި ވަނީ އެއީ ޗައިނާގެ ރަނގަޅު ރަހުމަތްތެރިއެއް ކަމަށެވެ.