27 ނޮވެމްބަރ 2017 - 00:14
ހަޑްސްފީލްޑް، އިންގްލެންޑް (ނޮވެމްބަރު 26) - އިނގިރޭސި ޕްރިމިއާ ލީގުގައި ފަހަތުން އަރައި ހަޑްސްފީލްޑް ޓައުން މިރޭ އަތުން 2-1 އިން ހޯދި ހަނިމޮޅާ އެކު ލީގުގެ އެއް ވަނައިގައި މެންޗެސްޓާ ސިޓީން ލީޑު ދަމަހައްޓައިފި އެވެ.
ލީގުގައި ރޭ ބްރައިޓަން އަތުން މޮޅުވެ މެންޗެސްޓާ ޔުނައިޓެޑުން ވަނީ ސިޓީގެ ލީޑު ފަސް ޕޮއިންޓަށް ކުޑަކޮށްފަ އެވެ. އެހެން ނަމަވެސް މިރޭ މޮޅުވެ ސިޓީ ވަނީ އަލުން އަށް ޕޮއިންޓުގެ ލީޑެއް ނަގައިފަ އެވެ. ސިޓީ އެއް ވަނައިގައި އޮތީ 13 މެޗުން 37 ޕޮއިންޓާ އެކު އެވެ. ދެ ވަނައިގައި އޮތް ޔުނައިޓެޑަށް 13 މެޗުން ލިބިފައިވަނީ 29 ޕޮއިންޓެވެ. ތިން ވަނައިގައި ޗެލްސީ އޮތީ 13 މެޗުން 26 ޕޮއިންޓް ހަމަކޮށްގެންނެވެ. އާސެނަލް ހަތަރު ވަނަ އަށް އެރީ މިރޭ ރަށުން ބޭރުގައި ބާންލީ އަތުން 1-0 އިން ހޯދި މޮޅާ އެކު 25 ޕޮއިންޓް ހަމަކޮށްގެންނެވެ.
ހަޑްސްފީލްޑުން ވަނީ މި ސީޒަނުގައި އަމިއްލަ ދަނޑުގައި ކުޅުނު މެޗުން ޔުނައިޓެޑް ބަލިކޮށް އެންމެން ހައިރާން ކޮށްލައިފަ އެވެ. މިރޭގެ މެޗުގައި ވެސް ސިޓީ ސިއްސުވާލުމަށް ފަހު ފުރަތަމަ ލަނޑު ޖެހީ ހަޑްސްފީލްޑުންނެވެ. މެޗުގެ ފުރަތަމަ ހާފުގެ ފަހު މިނިޓްގައި ހަޑްސްފީލްޑްގެ ޓޮމް އިންސް ނެގި ކޯނަރު ގޯލަށް ވަނީ ސިޓީގެ ނިކޮލަސް އޮޓަމެންޑީ ބޮލުގައި ޖެހިފަ އެވެ.
ދެ ވަނަ ހާފުގެ ކުޅުން ފެށިތާ ދެ މިނިޓް ތެރޭ ސިޓީ އަށް ލިބުނު ޕެނަލްޓީއަކުން އެއްވަރުކޮށްދިނީ ސާޖިއޯ އަގުއޭރޯ އެވެ. މި ޕެނަލްޓީއަކީ ހަޑްސްފީލްޑް އޭރިއާ ތެރެއިން ސިޓީގެ ރަހީމް ސްޓާލިން އަށް ފައުލުކުރުމުން ރެފްރީ ދިން ޕެނަލްޓީ އެކެވެ.
މިދިޔަ ބުދަ ދުވަހުގެރޭ ޗެމްޕިއަންސް ލީގުގައި ފެޔަނޫޑް އަތުން ސިޓީ މޮޅުކޮށްދިން ގޯލު ސްޓާލިން ޖެހީ މެޗު ނިމެން ދެ މިނިޓަށްވެފައި ވަނިކޮށެވެ. މިރޭގެ މެޗުގައި ހަޑްސްފީލްޑް އަތުން ސިޓީ މޮޅުކޮށްދިން ލަނޑު ސްޓާލިން ކާމިޔާބުކުރީ މެޗު ނިމެން ހަތަރު މިނިޓަށްވެފައި ވަނިކޮށެވެ.
ކުޅިވަރުގެ ރޫހާ ހިލާފު ކަމެއް ކުރުމުގެ ސަބަބުން ހަޑްސްފީލްޑްގެ ރަޖިވް ވަން ލަ ޕާރާ އަށް ވަނީ މި މެޗުގެ އިތުރު ވަގުތުގައި ސީދާ ރަތް ކާޑެއް ދައްކައިފަ އެވެ.
މެޗަށް ފަހު ސިޓީގެ ކޯޗު ޕެޕް ގާޑިއޯލާ ބުނީ ފަހަތުން އަރައި މޮޅުވުމުން ޓީމު ކޮންމެ ހާލަތަކަށް ވެސް ތައްޔާރުކަން އެނގިއްޖެ ކަމަށެވެ.
"އަހަރެމެން ފުރަތަމަ ހާފު ނިމުމުން ވާހަކަ ދެއްކިން ކަންތައްތައް ރަނގަޅުކުރަން. އަވަަހަށް އަލުން މެޗުގެ ތެރެއަށް އާދެވުމަކީ އެންމެ މުހިއްމު ކަންތައް. ހަގީގަތުގައި މި ފިނި މޫސުމުގައި ގާތްގާތުގައި ގިނަ މެޗުތަކެއް ކުޅެން ޖެހޭއިރު ސިޓީގެ ފައިޓިން ސްޕިރިޓް ފެނިފައި ވަރަށް ހިތްހަމަ ޖެހިއްޖެ،" ގާޑިއޯލާ ބުންޏެވެ.
މިރޭ ބާންލީ އަތުން އާސެނަލް ފަހު ވަގުތު މޮޅުވީ މެޗުގެ ފަހު ސިކުންތުކޮޅުގެ ތެރޭގައި އަލެކްސިސް ސަންޗޭޒް ވައްދާލި ޕެނަލްޓީ އަކުންނެވެ. މިއީ މެޗުގެ ފަހު ވަގުތުގައި ޖެހި ލަނޑުން ބާންލީގެ މައްޗަށް އާސެނަލް ޖެހިޖެހިގެން ކުރި ހޯދި ތިން ވަނަ މެޗެވެ.