06 ޖުލައި 2016 - 22:53
މިދިޔަ ރޯދަ މަހަކީ ފަހުގެ ތާރީހުގައި އެންމެ ކުށް މަދު ރޯދަ މަސް ކަމަށް ޕޮލިސް ކޮމިޝަަނަރު އަހުމަދު އަރީފް އިއްޔެ ވިދާޅުވެއްޖެ އެވެ.
އީދު ދުވަހުގެ ތަހުނިޔާ ފޮނުއްވަމުން ޕޮލިސް ވެބްސައިޓަށް ދެއްވި ހިތާބެއްގައި އަރީފް ވިދާޅުވީ މި އަހަރުގެ ރޯދަ މަހަކީ ފުލުހުންގެ ތާރީހުގައި ކާމިޔާބީތަކެއް ހޯދުނު މަހެއް ކަމަށެވެ. އެއީ، އޭނާ ފާހަގަކުރެއްވި ގޮތުގައި، މިދިޔަ ރޯދަ މަހު ފުލުހުންނަށް ހުށަހެޅި މައްސަލަތައް މަދުވެ އިޖުތިމާއީ އަމާންކަން ގާއިމް ކޮށްދެވުނީތީ އެވެ.
"އަމުދުން ފަހުގެ ތާރީހަށް ބަލާއިރު އެހެން ރަމަޟާން މަސް މަހު ތަޖުރިބާ ކުރެވިފައިވާ ފަދަ ބޮޑެތި ވައްކަންތަކާއި ޓެކުމާއި މަގުފޭރުން ފަދަ ކަންކަން ނުރައްކާތެރި ދަަރަޖައަކަށް މި ރަމަޟާން މަހު އެއްގޮތަކަށް ވެސް ހިނގާފައި ނުވޭ،" އަރީފް ވިދާޅުވި އެވެ.
ރޯދަ މަސް ފެށުމާ އެކު ފުލުހުން ވަނީ ކުށް މަދުކުރަން ހާއްސަ އޮޕަރޭޝަނެއް ކުރިއަށް ގެންގޮސްފަ އެވެ.
ކޮންމެ ރޯދަ މަހަކު ވެސް ވައްކަމާއި ފޭރުން ފަދަ ބޮޑެތި ކުށްތައް ވަރަށް ބޮޑަށް އިތުރުވެ އެވެ. އެކަމަކު، މިފަހަރު އެކަހަލަ ކަންތައްތައް ފާހަގަކުރެވުނު ވަރު ނިސްބަތުން މަދެވެ.