22 ނޮވެމްބަރ 2017 - 11:58
ސޯލް (ނޮވެމްބަރު 22) - ދެ ކޮރެއާގެ ދެމެދުގައި ވަރުގަދަ އަށް ގާޑުކޮށްފައިވާ ޑިމިލިޓަރައިޒް ޒޯން ހުރަސްކޮށް ފިލަން އުޅުނު ނޯތު ކޮރެއާގެ ސިފައިންގެ މީހާ ކޯމާ އިން ހޭއަރައިފި އެވެ.
ނޯތު ކޮރެއާގެ ސިފައިންގެ މީހާ ބޯޑަރު ހުރަސްކޮށް ސައުތު ކޮރެއާގެ ޖޮއިންޓް ސެކިއުރިޓީ އޭރިޔާ (ޖޭއެސްއޭ) އަށް ވަންނަން އުޅެނިކޮށް އޭނާގެ ގަޔަށް ބަޑިޖެހުމުން ހަތް ވަޒަން ވަނީ އަރައިފަ އެވެ. ޑޮކްޓަރުން ބުނީ ސިފައިންގެ މީހާގެ ފުރާނަ އަށް ނުރައްކާވެދާނެ ހާލަތުން މިހާރު ސަލާމަތްވެފައިވާ ކަމަށެވެ.
ސިފައިންގެ މީހާ ބޭނުންވުމުން އޭނާ އަށް މިހާރު ދަނީ ސައުތު ކޮރެއާގެ ފިލްމުތައް ދައްކަމުންނެވެ. އަދި ނަފްސާނީ ގޮތުން އޭނާ އަށް ހިތްހަމަޖެހުން ގެނެސް ދިނުމަށް ހޮސްޕިޓަލުގައި ސިފައިންގެ މީހާ އޮތް ކޮޓަރީގައި ވަނީ ސައުތު ކޮރެއާގެ ދިދައެއް ހަރުކޮށްފަ އެވެ. ސިފައިންގެ މީހާއާ ބެހޭ އެއްވެސް މައުލޫމާތެއް ސައުތު ކޮރެއާ އިން ހާމަކޮށްފައެއް ނުވެ އެވެ.
ސިފައިންގެ މީހާގެ ބަނޑުގައި ގިނަ އަދަދަކަށް ފަނި ހުރި ކަމަށް އޭނާ އަށް ފަރުވާ ދޭ ޑޮކްޓަރުން ހުކުރު ދުވަހު ވަނީ ބުނެފަ އެވެ.
ނޯތު ކޮރެއާގެ ސިފައިން ވަނީ އޭނާ ގަޔަށް 40 ފަހަރު ބަޑި ޖަހައިފަ އެވެ. އެކަމަކު ސިފައިންގެ މީހާ ވަނީ ސައުތު ކޮރެއާގެ ސަރަހައްދަށް ވަދެފަ އެވެ. ސިފައިންގެ މީހާ ދުއްވަމުން ދިޔަ ވެހިކަލްގެ ފުރޮޅު ތާށިވުމުން އޭނާ އެންމެ ފަހުން ފިލަން ޖެހުނީ ފައި މަގުގައި ދުވެފަ އެވެ. އޭނާ ވަނީ ފަތްތަކެއްގެ ދަށަށް ވަދެ ފަލައިފަ އެވެ.
ނޯތު ކޮރެއާ އިން އަހަރެއްގެ ތެރޭ ގާތްގަނޑަކަށް 1،000 މީހުން ސައުތު ކޮރެއާގެ ސަރަހައްދަށް ވަދެ އެވެ. އެކަމަކު ދުނިޔޭގެ އެންމެ ބޮޑަށް ގާޑުކޮށްފައިވާ އެއް ސަރަހައްދު ކަމަށް ބެލެވޭ ޑިމިލިޓަރައިޒް ޒޯން ހުރަސްކޮށް ދަނީ މަދު ބައެކެވެ. ކޮރެއާ ހަނގުރާމަ 1953 ވަނަ އަހަރު ނިމުނު ފަހުން ނޯތު ކޮރެއާގެ 30،000 މީހުން ސައުތު ކޮރެއާ އަށް ތެރެވެފައިވާ ކަމަށް ސޯލުން ބުނެ އެވެ. ނޯތު ކޮރެއާ އިން ގިނަ މީހުން ފިލަނީ ޗައިނާގެ ބޯޑަރުންނެވެ.