18 ނޮވެމްބަރ 2017 - 05:57
ޖިންސީ ގޯނާގެ ވާހަކަތައް ނޫނީ މިހާރު ހޮލީވުޑްގައި ދެއްކޭ ކަމަކަށް ނުވެ އެވެ. މަޝްހޫރު ފިރިހެން ޑައިރެކްޓަރުންނާއި ޕްރޮޑިއުސަރުންނާއި އެކްޓަރުންގެ މައްޗަށް ފުލުފުލުގައި ދަނީ ޖިންސީ ގޯނާގެ ތުހުމަތުތައް ކުރަމުންނެވެ.
މި ފަހަރު މި ލިސްޓަށް އަރާފައި ވަނީ "ރާމްބޯ" ފަދަ ފިލްމްތައް ކުޅެގެން އޮސްކާ ބޮޑު މަޝްހޫރު ކަމެއް ހޯދި އަދި އޮސްކާ ވެސް ހާސިލްކޮށްފައިވާ އެކްޓަރު ސިލްވެސްޓަ ސްޓެލޯން އެވެ. މިހާރު އުމުރުން 71 އަހަރުގެ އެކްޓަރުގެ މައްޗަށް ތުހުމަތުކޮށްފައިވާ ޖިންސީ ގޯނާގެ ވާހަކައެއް ޑެއިލީ މެއިލުން ވަނީ ފެންމަތިކޮށްފަ އެވެ.
ސްޓެލޯންގެ މައްޗަށް ތުހުމަތުކޮށްފައި ވަނީ 1986 ވަނަ އަހަރު، 16 އަހަރުގެ އަންހެން ކުއްޖަކަށް ޖިންސީ ގޯނާ ކުރި ކަމަށް ބުނާ މައްސަލައެކެވެ. ނަން ހާމަ ނުކޮށް އެ ވާހަކަ ދެއްކި އަންހެން މީހާ ބުނެފައިވާ ގޮތުގައި އޭނާގެ އުމުރުން އެންމެ 16 އަހަރުގައި ލޮސް އެންޖެލިސްގެ ހިލްޓަން ހޮޓަލުގައި އޭރު އުމުރުން 40 އަހަރުގެ ސްޓެލޯން އާއި އޭނާގެ އޭރުގެ ބޮޑީގާޑް ވަނީ ޖިންސީ ގޯނާކޮށްފަ އެވެ. އަދި އެ މައްސަލަ އޭރު ފުލުހުންނަށް ވެސް ރިޕޯޓް ކުރި ކަމަށް އަންހެން މީހާއާ ހަވާލާދީ ޑެއިލީ މެއިލުން ބުންޏެވެ.
ނަމަވެސް ސްޓެލޯންގެ ތަރުޖަމާން މިޝެލް ބެގާ ވަނީ މި ވާހަކަތައް ދޮގުކޮށްފަ އެވެ.
"އެއީ ސީދާ ކަނޑައެޅިގެން ހަގީގާ ހިލާފު ވާހަކައެއް. ފުލުހުންނަށް އެ ބުނާ މައްސަލައެއް ރިޕޯޓް ކުރި ނަމަ އެކަމާ ބެހޭ ގޮތުން ސްޓެލޯނާ ސުވާލު ކުރާނެކަމާ ދޭތެރޭ ވެސް އެއްވެސް ޝައްކެއް ނެތް،" ތަރުޖަމާން ބުންޏެވެ. "ޔަގީންކޮށް ދޭން ބޭނުންވާ ކަމަކީ މިހާތަނަށް އެފަދަ އެއްވެސް މައްސަލައަކާ ގުޅޭ ގޮތުން ކަމާބެހޭ އެއްވެސް އިދާރާއަކުން ސްޓެލޯނާ ސުވާލުކޮށްފައި ނެތްކަން. އެހެންވީމާ މިއީ ހަދައިގެން ދައްކާ ދޮދު ވާހަކައެއް ކަމާ ދޭތެރޭ އެއްވެސް ޝައްކެއް ނެތް."
ހޮލީވުޑްގައި ޖިންސީ ގޯނާގެ ވާހަކަތައް މި ފަހުން އެންމެ ބޮޑަށް ވައިގައި ހިފާލީ ނުފޫޒު ގަދަ ޕްރޮޑިއުސަރު ހާވީ ވެއިންސްޓީންގެ މައްޗަށް އެތައް އަންހެނުންތަކެއް ކުރި ތުހުމަތުތަކާ އެކުގަ އެވެ.