05 ޖުލައި 2016 - 14:21
ޕީޕީއެމް ހިންގުން ހުއްޓުވާލާފައިވާ ކަމަށް ބުނެ ކުރީގެ ރައީސް އަދި އެ ޕާޓީގެ ރައީސް މައުމޫން އަބްދުލްގައްޔޫމްއާ މެދު ފިޔަވަޅު އަޅައިދޭން އެދި ޕީޕީއެމްގެ ސުލޫކީ ކޮމެޓީ އަށް މިއަދު މައްސަލަ ހުށަހަޅައިފި އެވެ.
އެ މައްސަލަ ސުލޫކީ ކޮމެޓީ އަށް ހުށަހެޅުއްވި ދާންދޫ ދާއިރާގެ މެމްބަރު އަހްމަދު އައްސަދު ވިދާޅުވީ ވެރިކަން ކުރާ ޕީޕީއެމަކީ އެތައް ރައްޔިތުންގެ މަސްލަހަތާ ގުޅިފައިވާ ޕާޓީއެއް ކަމަށެވެ. ޕާޓީގެ ހުރިހާ ބާރުތައް މައުމޫން ނަންގަވައިގެން އުޅުއްވަނީ ޕާޓީގެ އަސާސީ ގަވާއިދާ ހިލާފަށް ކަމަށް ވެސް އޭނާ ވިދާޅުވި އެވެ.
"ޕާޓީ އެގޮތަށް ހުއްޓުވާލާފައި ނުބޭއްވޭނެ. އެހެންވެ އަޅުގަނޑު ހުށަހެޅީ ޕާޓީ ހިންގާނެ ގޮތެއް ހޯދަން މައްސަލަ ބަލައިދޭން،" އައްސަދު ވިދާޅުވި އެވެ.
- އިސްލާމިކް މިނިސްޓްރީގެ ސްޓޭޓް މިނިސްޓަރު އަލީ ވަހީދު
- ހޯމް މިނިސްޓްރީގެ ސްޓޭޓް މިނިސްޓަރު ޔޫސުފް އަބްދުލް ޣަފޫރު
- ހެލްތު މިނިސްޓްރީގެ ޑެޕިއުޓީ މިނިސްޓަރު މުހައްމަދު ރަފީގު ހަސަން.
- ފަލްސާ އިބްރާހިމް ރަޝީދު
މައުމޫންގެ މައްސަލަ ހުށަހަޅާފައިވާކަން ސުލޫކީ ކޮމެޓީން ޔަގީންކޮށެއް ނުދިނެވެ. ކޮމެޓީގެ މުގައްރިރު އަލީ ވަހީދު ވިދާޅުވީ ކޮމެޓީގެ ފަރާތުން މީޑިއާއާ އެއްވެސް ވާހަކައެއް ދައްކަން އަދި ނިންމާފައި ނުވާ ކަމަށެވެ.
ޕީޕީއެމްގެ ހުރިހާ ބާރުތައް މައުމޫން ނެންގެވީ ބިޑަށް ނުލައި ރަށްތައް ދޫކުރެވޭގޮތަށް ފާސްކުރި އިސްލާހަށް ވޯޓު ނުދޭން ޕާލަމެންޓްރީ ގްރޫޕަށް އަންގާފައި ވަނިކޮށް އެ އެންގެވުމަށް ޕީޖީ ގްރޫޕްގެ މެމްބަރުން އަމަލުނުކުރެއްވުމުންނެވެ.
ޕާޓީގެ ބާރުތައް މައުމޫން ނެންގެވިއިރު، ރައީސް އަބްދުﷲ ޔާމީނާއި އެމަނިކުފާނާ ދޭތެރޭގައި ވަނީ ބޮޑެތި މައްސަލަތަކެއް އުފެދިފަ އެވެ. މި މައްސަލަތަކުގައި ޕާޓީ މިހާރު އޮތީ ދެ ފަޅިވެ، މައުމޫން ވަނީ ޕާޓީގެ ކޮމިޓީތަކުގެ މަސައްކަތްތައް ހުއްޓުވާލައިފަ އެވެ. އަދި އެމަނިކުފާނުގެ ހުއްދައާ އެކު ނޫން ގޮތަކަށް ޕީޕީއެމްގެ އެއްވެސް ކޮމިޓީއެއް ނުބޭއްވުމަށް ވެސް ވަނީ އަންގައިފަ އެވެ. ޕާޓީގެ ކައުންސިލް ބާއްވައި ދިނުމަށް މެމްބަރުންތަކެއް އެދިވަޑައިގަތުމުން އެކަމަށް ވެސް މައުމޫން އިޖާބައެއް ނުދެއްވި އެވެ.
ޕީޕީއެމް އަސާސީ ގަވާއިދާ ހިލާފުވެ ޕާޓީގެ މަސްލަހަތު ނަގާލާފައިވާ ކަމަށް ވިދާޅުވެ މައުމޫން ވަނީ ޕާޓީ އިސްލާހުކުރަން އެޖެންޑާއެއް ވެސް އެކުލަވާލައްވައިފަ އެވެ.
އެކަމަކު މައުމޫނަށް ޕާޓީ "ހައިޖެކްނުކުރެއްވޭނެ" ކަމަށް ކަނޑައަޅައިދޭން ޕީޕީއެމްގެ ޕާލަމެންޓްރީ ގްރޫޕުން މިއަދު ވަނީ ސިވިލް ކޯޓަށް މައްސަލައެއް ހުށަހަޅައިފަ އެވެ.