05 ޖުލައި 2016 - 12:32
ޕީޕީއެމްގެ އަސާސީ ގަވައިދާ އެއްގޮތަށް އަމަލުކުރުމަށް އެ ޕާޓީގެ ރައީސް މައުމޫން އަބްދުލް ގައްޔޫމަށް، އިލެކްޝަންސް ކޮމިޝަނުން މިއަދު އަންގައިފި އެވެ.
"މިހާރު" އަށް އެނގިފައިވާ ގޮތުގައި އިލެކްޝަންސް ކޮމިޝަނުން އެގޮތަށް އެންގީ، ޕާޓީގެ އަސާސީ ގަވައިދާ ހިލާފަށް މައުމޫން "ބާރުތައް ނަންގަވައި، ޕާަޓީ ހުއްޓުވާލާފައިވާ" ކަމަށް ބުނެ އަމިއްލަ މީހަކު ހުށަހެޅި ޝަކުވާއަކާ ގުޅިގެންނެވެ.
އިލެކްޝަންސް ކޮމިޝަންގެ މި އެންގުން މައުމޫންގެ މައްޗަށް އައިއިރު، ރައީސް އަބްދުﷲ ޔާމީނާއި މައުމޫނާ ދެމެދު އުފެދިފައިވާ ކޯޅުމާ އެކު ޕީޕީއެމްގެ ތެރޭގައި ވަނީ ދެބޭފުޅުންގެ ފެކްޝަން އުފެދިފަ އެވެ.
މި ބައިބައިވުމުގެ ތެރެއިން، މައުމޫން ވަނީ ޕާޓީގެ ކޮމިޓީތަކުގެ މަސައްކަތްތައް ހުއްޓުވާލައިފަ އެވެ. ބިޑް ކުރުމެއް ނެތި، ޓޫރިޒަމްގެ ބޭނުންތަކަށް ރަށްރަށާއި ބިންތަކާއި ފަޅުތައް ދޫކުރެވޭ ގޮތަށް ގާނޫނަށް ގެނައި އިސްލާހަށް ފަހު، މައުމޫން އަންގަވާފައި ވަނީ އެމަނިކުފާނުގެ ހުއްދައާ އެކު ނޫން ގޮތަކަށް ޕީޕީއެމްގެ އެއްވެސް ކޮމިޓީއެއް ނުބޭއްވުމަށެވެ. އަދި ޕާޓީގެ ކައުންސިލް ބާއްވައި ދިނުމަށް މެމްބަރުންތަކެއް އެދިވަޑައިގަތުމުން އެކަމަށް ވެސް މައުމޫން އިޖާބައެއް ނުދެއްވި އެވެ.