10 ނޮވެމްބަރ 2017 - 11:23
މެޑްރިޑް (ނޮވެމްބަރު 10) - މި ފަހަރުގެ ޓްރާންސްފާ މާކެޓްގައި ދުނިޔޭގެ ރެކޯޑް އަގަކަށް ބާސެލޯނާ ދޫކޮށް ޕީއެސްޖީ އަށް ބަދަލުވި ނޭމާ ރެއާލް މެޑްރިޑަށް ބަދަލުވާން ބޭނުންވެއްޖެ ނަމަ އެ ޓީމުން އޭނާ އަށް މަރުހަބާ ކިޔާނެ ކަމަށް ރެއާލުގެ ކެޕްޓަން ސާޖިއޯ ރާމޯސް ބުނެފި އެވެ.
ރިޕޯޓްތައް ބުނާގޮތުން 222 މިލިއަން ޔޫރޯ އަށް ޕީއެސްޖީއާ ގުޅުނު ނޭމާ އެންމެ ބޭނުންވަނީ ހަގީގަތުގައި ރެއާލާ ގުޅޭށެވެ. އަދި ޕީއެސްޖީ އަށް ބަދަލުވުމަށް ފަހު ދެން އޭނާ ގުޅެން ބޭނުންވާ ޓީމަކީ ރެއާލް ކަމަށެވެ.
ރާމޯސް ބުނީ ނޭމާ އަކީ ދުނިޔޭގެ ނިސްބަތުން ވެސް މޮޅު ކުޅުންތެރިއެއް ކަމަށާއި މޮޅެތި ކުޅުންތެރިން ރެއާލުން ފެނުމަކީ އޭނާ އަށް ލިބޭނެ އުފަލެއް ކަމަށެވެ.
"މޮޅެތި ކުޅުންތެރިން އަހަރެމެން ބޭނުން. ނޭމާ އަކީ ތަފާތު ކުޅުންތެރިއެއް. ރެއާލަށް އޭނާ އަންނަން ބޭނުންވެއްޖެނަމަ މަރުހަބާ ކިޔާނަން. ފަހަރެއްގައި ވެދާނެ ނޭމާގެ ނަޒަރުގައި ބާސެލޯނާ އިން ސީދާ ރެއާލަށް އައުމުގެ ބަދަލުގައި ޕީއެސްޖީ އަށް ފުރަތަމަ ގޮސްފައި ދެން ރެއާލާ ގުޅެން ފަސޭހަވީ ކަމަށް،" ރާމޯސް ބުންޏެވެ.
މަޝްހޫރު މީޑިއާއެއް ކަމަށްވާ ގާޑިއަން އިން ރިޕޯޓްކުރާ ގޮތުގައި ރެއާލުގެ ރައީސް ފްލޮރެންޓީނޯ ޕެރޭޒް ވަނީ ނޭމާގެ ބައްޕައާ މަޝްވަރާތަކެއް ދާދި ފަހުން ބާއްވައިފަ އެވެ.
ރެއާލަށް ކުޅޭ ބްރެޒިލްގެ ފުލްބެކް މާސެލޯއާ ހަވާލާދީ ބައެއް މީޑިއާ ރިޕޯޓްތައް ބުނާގޮތުގައި ނޭމާ ހުރީ ޕީއެސްޖީގެ ކޯޗު އުނާއި އެމެރީ ކުޅުންތެރިންނާ މެދު ކަންތައް ކުރާ ގޮތާ މެދު ހިތްހަމަ ނުޖެހިފަ އެވެ. އަދި އެ ކަމުގެ ޝަކުވާ އެ ކްލަބްގެ ރައީސް ނާސިރު އަލް ހެއްލާފީ އަށް ވެސް ވަނީ ހުށަހަޅައިފަ އެވެ.
ރެއާލުން ވަނީ ނޭމާ ހޯދަން އޭނާ ސަންޓޯސްގައި ހުއްޓައި ވެސް މަސައްކަތް ކޮށްފަ އެވެ. އެހެން ނަމަވެސް އޭރު އެކަން ކާމިޔާބުނުވީ ސަންޓޯސްގެ ބައެއް ހުށަހެޅުންތަކަށް ރެއާލުން ފުރަގަސް ދިނުމުން ކަމަށް ރިޕޯޓްތައް ބުނެ އެވެ.