09 ނޮވެމްބަރ 2017 - 13:57
ގައުމީ ފުޓްބޯޅަ ޓީމަށް ގޯލްކީޕަރުން ނެގުމުގައި މި ފަަހަރު ވިސްނީ އުރީދޫ ދިވެހި ޕްރިމިއާ ލީގުގައި ދެ ވަނަ ބުރުގައި ކުޅެފައިނުވިޔަސް ޓެކްނިކަލީ މި ވަގުތު ޓީމަށް އެންމެ ފައިދާ ބޮޑު ގޯލްކީޕަރުން ނެގުމަށް ކަމަށް ގައުމީ ޓީމުގެ ގޯލްކީޕަރު ޓްރެއިނަރު އަސްލަމް އަބްދުލް ރަހީމް ބުނެފި އެވެ.
އަންނަ އަންގާރަ ދުވަހު ރަށުން ބޭރުގައި ފަލަސްތީނާ ދެކޮޅަށް ކުޅޭ މެޗަށް ނެގި ގައުމީ ސްކޮޑަށް ނެގި ތިން ކީޕަރުން ކަމަށްވާ ނިއު ރޭޑިއަންޓުގެ މުހައްމަދު ފައިސަލް އާއި އަބްދުﷲ ޒިޔަޒަން އަދި މާޒިޔާގެ ޒުވާން ގޯލްކީޕަރު ހުސެއިން ޝަރީފް އަދި އުރީދޫ ދިވެހި ޕްރިމިއާ ލީގުގެ ދެ ވަނަ ބުރުގައި އެންމެ މެޗެއް ވެސް ނުކުޅެ އެވެ.
އެފްއޭއެމް ހައުސްގައި މިއަދު އޮތް ނޫސްވެރިންގެ ބައްދަލުވުމުގައި އަސްލަމް ބުނީ އެންމެ ފަހުން އޮމާނާ ދެކޮޅަށް ކުޅުނު މެޗަށް ފަހު ށ. މިލަންދޫ އަށް މޮޅު ކުޅުމެއް ދައްކަމުން އަންނަ މުހައްމަދު އިމްރާން (ކުޑައިންމަ) ގައުމީ ޓީމުން ރިޓަޔަކުރުމުން އޭނައާ ވާހަކަ ދެއްކި ކަމަށާއި ކަންތައް ދިޔަ ގޮތުން އުނދަގޫތަކެއް ކުރިމަތިވި ކަމަށެވެ.
"އިންމަ ހުއްޓާލާ ވާހަކަ ކޯޗިން ސްޓާފުންނާ ވާހަކަ ދެއްކިގެނެއް ނޫން ގޮސްފައި އޮތީ. އަޅުގަނޑުމެންނަށް އެނގުނީ. ނޫޙުން ފެސްބުކުން. ދެން ކޯޗު އެދުނީ ކުރިއަށް އޮތް ދެ މެޗަށް އިންމަ ކުޅެދޭތޯ މަސައްކަތް ކޮށްލަދޭށޭ. ދެން އިންމައާ މަޝްވަރާކުރީމަ އަންނަ ގޮތަށް ހުރީ. އިންމަ އަންނަން ބުނީމަ އެހެން ކީޕަރުންނާ މެދު ވިސްނާކަށެއް ވެސް ނުޖެހޭ. ދެން ފުރަތަމަ ޕްރެކްޓިހަށް އިންމަ ނައީމަ ދެން އިނގިއްޖެ ހުއްޓާލީކަން،" އަސްލަމް ބުންޏެވެ.
ގައުމީ ޓީމު ދެ ވަނަ ކީޕަރަކަށް ގެނައި ޒިޔަޒަން އަކީ އުރީދޫ ދިވެހި ޕްރިމިއާ ލީގުގައި ނިއުގެ ބެންޗުން ވެސް މަދު ފަހަރަކު ނޫނީ ނުފެންނަ ކީޕަރެކެވެ. އަސްލަމް ބުނީ ޒިޔަޒަން އާއި ހުސެން ނެގީ އެމީހުންގެ ޕްރެކްޓިސްތަކަށް ބަލައި އެމީހުންގެ ފެންވަރު ރަނގަޅަށް އެނގޭތީ ކަމަށެވެ.
"ޒިޔަޒަން އަންނަނީ ކޮންމެ ދުވަހަކު ނިއު ރޭޑިއަންޓް ޕްރެކްޓިހުގައި ޕާފޯމް ކުރަމުން. އަހަރެން ވަރަށް ރަނގަޅަށް ބަލަން މާޒިޔާގެ ޔޫތު ގޯލްކީޕަރު (ހުސެން) އާއި ޒިޔަަޒަން އަށް. ނެޝަނަލް ޓީމަށް އަހަރެން މި ބޭނުންވާ އައިޑިއާ އެގޮތަށް ކުޅުންތެރިންގެ ޕްރެކްޓިސްތައް ވަރަށް ރަނގަޅަށް ބަލަން. މެޗެއް ކުޅެން ނުލިބުން އެންމެ ބޮޑު އިޝޫ އަކީ. މިސާލަކަށް ނިއު ރޭޑިއަންޓުގައި އެ ތިބީ މޮޅެތި އެއް ފެންވަރުގެ ތިން ގޯލު ކީޕަރުން. ތަފާތަކަށް މި އަންނަނީ އެމީހުންގެ ލީޑަޝިޕުގައި. އަނެއް ހެން ބުނަންޏާ އިންމަ އަށް ދޫކުރާ މީހެއް ނޫން ފައިސަލް އަކީ. ހަމަ އެ ފެންވަރުގެ ކީޕަރެއް ޒިޔަޒަން އަކީ. ދެން މެޗެއް ކުޅެން ނުލިބުނީމަ ޒިޔަޒަން އަރައިގެން ނުވާނޭ. އެއީ އަހަރެން ގަބޫލުކުރާ އެއްޗެއް ނޫން،" އަސްލަމް ކިޔައިދިނެވެ.
އޭނާ ބުނީ ކީޕަރުން ނެގުމުގައި އެ ކުޅުންތެރިންގެ ފެންވަރަށް ވެސް ވަރަށް ބޮޑަށް ސަމާލުކަމެއްދޭ ކަމަށެވެ.
"އަހަރެން ބަލަނީ އޭނަގެ ކޮލިޓީއަށް. ފުރަތަމަ ޑިވިޝަނުގައި މި ކުޅޭ އެހެން ގޯލް ކީޕަރުންނަށް ވުރެ. މިސާލަކަށް ވިސްނާލަންވީ އެހެން ޓީމެއްގައި ޒިޔަޒަން އިންނާނީ ބެންޗުގައި ތޯ. އެވެސް ކޮށްލަން ރަނގަޅު ސުވާލެއް. އަޅުގަނޑުމެން މި ބަލަނީ ޓެކްނިކަލީ ގައުމީ ޓީމުގެ ކުޅޭ ޓެކްޓިކްސް އަށް ކިހާ ވަރަށްތޯ ފިޓްވަނީ. އިންޓަނޭޝަނަލް މެޗުތައް ކުޅެވޭ ވަރުގެ ކީޕަރުންނަށް،" ކުރިން ފުރަތަމަ ޑިވިޝަންގެ ކްލަބްތަކަށް ގިނަ މެޗުތަކެއް ކުޅުނު އަސްލަމް ބުންޏެވެ.
ދިވެހި ޕްރިމިއާ ލީގުގެ ހުރިހާ މެޗުތަކެއް ކަހަލަ ގޮތަކަށް ކުޅެމުން އަންނަ ދެ ކީޕަރުންގެ ތެރޭގައި ދ. ކުޑަހުވަދޫގެ ކީޕަރު އަބްދުﷲ ޔަޒީދާއި އއ. މާޅޮހުގެ ކީޕަރު އިބްރާހިމް ޒަމީރު (އިބޭ) ހިމެނެ އެވެ. އަސްލަމް ބުނީ މި ކުޅުންރިންނަށް ފުރުސަތު ނުދިނީ އެއްގޮތަކަށް ވެސް އެއީ ދަށް ކީޕަރުންތަކެއް ކަމަށް ދެކިގެން ނޫން ކަމަށާއި އޭގެ ވެސް ޓެކްނިކަލީ ވިސްނަން ޖެހޭ ކަންތައްތަކެއް ހުރުމުން ކަމަށެވެ.
"އެއްވެސް ކޯޗަކަށް ޑިސްރެސްޕެކްޓް ކުރަނީކީއެއް ނޫން. އަހަރެން ކޮށްލަން ބޭނުންވާ ސުވާލަކީ އަތޮޅުތަކުން އައި ޓީމުތަކުގެ ތެރެއިން އައިސް އުޅޭ ޓީމުތަކުން ގޯލްކީޕަރު ޓްރެއިނިން އަށް ކިހާ ވަރަކަށްތޯ ސަމާލުކަންދެނީ. އެމީހުންގެ ޓެކްނިކްސް ރަނގަޅު ކުރަން ކިހާ ވަރަކަށްތޯ މަސައްކަތް ކުރަނީ. އެ މީހުންގެ ކޮލިޓީ ގެނެވޭނީ އެ ވަރަށް މަސައްކަތް ކުރެވިގެން. އަހަރެން މި ބުނަނީ އަހަންނަކީ އެންމެ މޮޅު ގޯލްކީޕަރު ކޯޗެއް ނޫނޭ. އެކަމަކު އެ ޓީމުތަކުގައި (މިނިވަން ޗެމްޕިއަންޝިޕުން އައި ޓީމުތަކުގައި) އެބަހުރިހޭ ގޯލް ކީޕަރު ޓްރެއިނަރުން. އޭނަ ޓްރެއިން ކޮށްފައި ހުރިއްޔާ އޭނަ އަށް ނާދެވޭނެ އެއްވެސް ސަބަބެއް ނެތް. އެކަމަކު ވިސްނަން ޖެހޭ މިއީ އެންމެ ރަނގަޅު ދަނޑިވަޅުތޯ. ގައުމީ ޓީމަށް އެމީހުން ގެނެސްގެން ކޮށްދޭންވީ ކަމަކީ އެމީހުން ޓެކްނިކު ރަނގަޅު ކުރުން ހެއްޔޭ. ނޫނީ ކުރު މުއްދަތެއްގެ ތެރޭގައި މޮޅު ކުރުން ހެއްޔޭ. ނޫނީއްޔާ މޮޅަށް ތިބި މީހުން ގެނެސްގެން އެ މީހުންގެ ޕާފޯމަންސް ނެރެން ހެއްޔޭ. ކޮބާހޭ ނެޝަނަލް ޓީމަށް އެންމެ ފައިދާ ބޮޑު ގޮތަކީ،" އަސްލަމް ބުންޏެވެ.
އޭނާ ބުނީ ކޮންމެ ގޯލްކީޕަަރަކީ ވެސް ސްކޮޑަށް އެރޭނެ ކުޅުންތެރިން ކަމަށާއި އެހެން ނަމަވެސް ހާލަތާ އެހެން ކަންތައްތަކަށް ވިސްނާލާއިރު، ކޮންމެ ފަހަރަކު ޓީމަށް ނެގޭނީ ތިން ކީޕަރުން ކަމަށް ވުމުން ގައުމީ ޓީމަށް ފިޓްވާ ކުޅުންތެރިން ނެގުމަށް އިސްކަންދޭނެ ކަމަށެވެ.
"މި ލީގުގައި ނުކުޅޭނެ އަހަންނަށް ނުފެންނަ ގޯލްކީޕަރެއް. މާލޭގައި އަހަރެން ހުރެއްޖިއްޔާ ހުރިހާ މެޗެއް ބަލަން. ރަނގަޅު ޔަންގް ގޯލްކީޕަރެއް މާޅޮސް ގޯލްކީޕަރަކީ (އިބްރާހިމް ޒަމީރު). އަދި އޭނަ އަށް އެބަ ބޭނުންވޭ ޓްރެއިނިން. އަހަންނާއެކު ނުކުރިޔަސް ރަނގަޅު ގޯލްކީޕަރު ޓްރެއިނިން އެބަ ބޭނުންވޭ. ރަނގަޅު ޓްރެއިނިން އަކާ އެކު ނުކުމެފިއްޔާ އެ ފުރުސަތު އޮންނާނެ. އަހަންނާ އެކު ޓްރެއިން ކުރުމުގެ ފުރުސަތު ވެސް އޮވެދާނެ މުސްތަގުބަލުގައި. ވާހަކަ އަކީ ކްލަބް ލެވެލްގައި ވެސް ދިމާވެދާނެއޭ،" އަސްލަމް ބުންޏެވެ.
ފުރަތަމަ ޑިވިޝަން ކްލަބްތަކުގައި ޓްރެއިނިން އަށް ވަރަށް ބޮޑަށް ވިސްނާ ކަމަށާއި މާޅޮހު ކީޕަރު ޒަމީރު ނިއު ނޫނީ މާޒިޔާ ކަހަލަ ކްލަބެއްގައި ހުރިނަމަ އޭނާ އަށް ގައުމީ ޓީމުން ޖާގަ ލިބުމުގެ ފުރުސަތު އޮތް ކަމަށް އަސްލަމް ވަނީ ބުނެފަ އެވެ.
"ނިއު ރޭޑިއަންޓާއި މާޒިޔާގައި ހުރިނަމަ މާޅޮހު ކީޕަރަށް ރަނގަޅު ޓްރެއިނިން ލިބޭނެ. ގައުމީ ޓީމަށް އެރުމުގެ ޗާންސް ބޮޑުވާނެ. އުއްމީދުކުރަން ނިއު، މާޒިޔާ ޓީސީ. މިއީ ރާއްޖޭގެ އެންމެ ވަރުގަދަ ޓީމުތައް. އަަހަރެން އުއްމީދު ކުރަން މާޅޮސް ކީޕަރު (ޒަމީރު) އަށް މި އިން ޓީމަކުން ފުރުސަތު ދޭނެކަމަށް. އަދި މާޅޮސް ކީޕަރު ފުރުސަތު ހޯދަން މަސައްކަތް ކުރާނެ ކަމަށް އުއްމީދުކުރަން،" އަސްލަމް ބުންޏެވެ.
އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް ވިދާޅުވީ ގޯލްކީޕަރު އެކެޑަމީއެއް ފެށުމުގެ މަސައްކަތް އެފްއޭއެމުން ކުރަމުން އަންނަ ކަމަށާއި އެއާ އެކު ގޯލްކީޕަރުންނާ ގުޅިގެން ކުރިމަތިވާ ދަތިތަކަށް ހައްލެއް ލިބޭނެ ކަމަށެވެ.
"އަޅުގަނޑުމެންގެ އެބަހުރި ގޯލްކީޕަރު ޓްރެއިނިން އިޝޫސް. މި ދަންނަވާލީ ގޯލްކީޕަރު ޓްރެއިނަރުން މަދުވާހަކަ. އަޅުގަނޑުމެންގެ ވިސްނުން އެބަހުރި ގޯލްކީޕިން އެކަޑަމީ އެއް. ވަރަށް އަވަހަށް އޭގެ ޓެކްނިކަލް ޑީޓެއިލްސް. ޕްލޭނާ އެކު މީޑިއާ އަށް ހިއްސާކުރާނަން. ވިސްނުމުގައި ހުރީ ހުރިހާ އުމުރު ފުރާއެއްގެ ގޯލްކީޕަރުންނަށް ފުރުސަތު އޮންނާނެ،" ޖަވާޒް ވިދާޅުވި އެވެ.
އޭޝިއަން ކަޕް ކޮލިފައިންގައި އަންނަ އަންގާރަ ދުވަހު ރަށުންބޭރުގައި ފަލަސްތީނާ ދެކޮޅަށް ނުކުންނައިރު ރާއްޖެ އަށް އޮތީ މުބާރާތަށް ކޮލިފައިވުމުގެ އަމިއްލަ ބާރު ގެއްލިފަ އެވެ. ކޮލިފައިން ގްރޫޕް ޑީގެ އެއް ވަނައިގައި، ކުޅުނު ހަތަރު މެޗުން މޮޅުވެގެން، އޮތީ 12 ޕޮއިންޓާ އެކު ފަލަސްތީނެވެ. ރާއްޖެ އޮތީ ހަތަރު މެޗުން ތިން ޕޮއިންޓާ އެކު ގްރޫޕުގެ ތިން ވަނައިގަ އެވެ. އެންމެ ފުލުގައި އޮތް ބޫޓާނަށް އަދި ޕޮއިންޓެއް ނުލިބެ އެވެ. ރާއްޖެ އަށް ދެން ފުރުސަތު ލިބޭނީ އޮމާން ދެން ކުޅޭ ދެ މެޗުން ބޫޓާނާއި ފަލަސްތީނު އަތުން ބޮޑު ތަފާތަކުން ބަލިވެ، ރާއްޖެ ކުޅޭ ދެ މެޗުން ބޫޓާނާއި ފަލަސްތީން އަތުން ބޮޑު ތަފާތަކުން މޮޅުވެގެންނެވެ.